¹ Em i kamap long dispela taim Devit na ol soldia bilong em i kam kamap long namba tri dei long Siklak, na ol Amalek i bin kam pait long ol Negev na long ol Siklak. Ol kam pait long ol Siklak na i kukim, ² na kisim olgeta lain olsem kalabus, ol meri, ol liklik na bikpela tu tasol ol i no kilim wanpela, ol i karim ol na i go. ³ Taim Devit na ol soldia bilong em i kam long dispela biktaun, ol i kukim pinis na kisim meri na pikinini man na meri bilong ol olsem kalabus. ⁴ Na Devit wantaim ol man husait i stap wantaim em i bikmaus na krai i go inap olgeta strong bilong ol pinis long krai. ⁵ Tupela meri bilong Devit ol i kisim olsem kalabus, em Ahionam bilong Jesrel na Abigel husait i bin meri bilong Nabal bilong Kamel. ⁶ Devit i wari tru, long wanem ol man i toktok long stonim em, long wanem ol man i belhat long ol i lusim pikinini man na pikinini meri bilong ol; tasol Devit i kisim strong insait long God Yawe, God bilong em. ⁷ Devit i tokim Abiata pikinini man bilong pris Ahimelek," Mi askim yu long bringim dispela samting bilong painim aut tingting bilong God i kam long mi." Abiata i bringim dispela samting bilong painim aut tingting bilong God i kam long Devit. ⁸ Devit i beten long God Yawe long gutpela tingting, i tok," Sapos mi i ron bihainim ol birua, bai mi winim ol o nogat?"God Yawe i tokim em," Ron bihainim ol long wanem bai yu winim ol na bai yu kisim bek olgeta samting bilong yu." ⁹ Olsem na Devit i go na 600 man i bihainim em; ol i kam long liklik wara Beso, na ol sampela man i no kam ol i stap bek. ¹⁰ Tasol Devit i ron bihainim ol yet, em wantaim ol 400 man, long wanem 200 man i stap bek, husait i no gat strong long brukim wara Beso na i go long hapsait. ¹¹ Ol i painim wanpela man bilong Isip long dispela ples na kisim em i kam long Devit; ol i givim em bret na em i kaikai na ol i givim em wara long dring; ¹² na ol i givim em liklik hap mekpas bilong pikinini fig na tupela mekpas bilong drai wain. Taim em i kaikai pinis, em i kisim strong gen, long wanem em i no kaikai bret na dring wara long tripela dei na nait. ¹³ Devit i tokim em," Yu wokman bilong husait? Na yu kam long wanem hap?" Em i tok, "Mi yangpela man bilong Isip, wokman bilong wanpela Amalek; bosman bilong mi i lusim mi bilong wanem mi i bin sik tripela dei i go pinis. ¹⁴ Mipela i pait wantaim ol Negev bilong ol Keret, mipela kisim ol samting bilong Juda na ol Negev bilong Kelep na mipela i kukim Siklak." ¹⁵ Devit i tokim em, "Inap yu kisim mi i go daun long dispela ol Amalek?" Dispela Isip man i tok, "Promisim mi long God olsem bai yu i no inap kilim mi o givim mi long han bilong bosman bilong mi na mi bai bringim yu i go daun long ol Amalek." ¹⁶ Taim dispela Isip man i kisim Devit i go daun, ol Amalek i go sindaun long olgeta hap long dispela graun, ol i kaikai, dring na danis bilong wanem ol i kisim ol planti abus i kam long graun bilong ol Filistia na long graun bilong ol Juda. ¹⁷ Devit i pait wantaim ol long moning taim tru i go inap long abinun bilong narapela dei. Ol i kilim olgeta man, tasol 400 man i kalap long kamel na ol i ranawe. ¹⁸ Devit i kisim bek olgeta samting ol Amalek i bin kisim na Devit i sevim tupela meri bilong em. ¹⁹ Nogat wanpela samting i lus, liklik o bikpela, pikinini man, pikinini meri, abus, i no gat wanpela samting ol Amalek i kisim bilong ol yet. Devit i kisim bek olgeta samting. ²⁰ Devit i kisim olgeta sipsip na bulmakau na ol man i kisim i go putim wantaim ol arapela bulmakau. Ol i tok," Dispela em ol abus bilong Devit." ²¹ Devit i kam bek long ol dispela 200 man husait i bin nogat strong long bihainim em, ol dispela husait i stap long wara Beso. Dispela ol man i go pas long bungim Devit na ol man i stap wantaim em. Taim Devit i kam kamap long ol dispela man, em i tok gut dei long ol. ²² Tasol ol nogut man na ol kranki tingting man namel long ol lain i go wantaim Devit i tok," Bilong wanem ol dispela man i no go wantaim mipela, bai mipela i no givim ol abus mipela i kisim. Tasol ol inap kisim i kam ol meri na pikinini bilong ol na i go." ²³ Tasol Devit i tok," Yupela i noken mekim olsem, ol brata bilong mi, wantaim long ol samting God Yawe i givim mipela. Em i sevim mipela na i givim ol birua bilong mipela i kam long mipela husait i kam pait wantaim mipela. ²⁴ Husait bai i harim yupela long dispela ol kain toktok? Long wanem wankain skel bai i go long man bilong pait na wankain skel bai i go long man husait i wet long kisim kago, olgeta bai kisim wankain skel tasol. ²⁵ Em i kamap olsem long dispela dei i kam inap long nau, long wanem Devit i mekim dispela em mak na lo bilong ol Israel. ²⁶ Taim Devit i kam kamap long Siklak, em i salim sampela abus i go long ol bikman bilong Juda, i go long ol poroman bilong em, na i tok," Lukim, dispela em ol presen bilong yupela long ol abus i kam long ol birua bilong God Yawe." ²⁷ Em i salim sampela i go long bikman husait i stap long Betel, ol lain i stap Ramot bilong hap Saut na ol lain i stap long Jati, ²⁸ na long ol lain husait i stap long Aroa, long ol lain i stap long Sipmot na long ol lain i stap long Estomoa. ²⁹ Em i salim sampela tu i go long ol bikman i stap long Rakal, long ol lain i stap long biktaun bilong Jerame na long ol lain i stap long biktaun bilong Kenan. ³⁰ na long ol lain i stap long Homa, long ol lain long Bo Asan na long ol lain i stap long Atak, ³¹ na long ol lain husait i stap long Hebron na long olgeta ples we Devit em yet na olgeta man bilong em i go wantaim em.