¹ Taim King Sol i kam bek bihain long em i ronim ol Filistia, ol i tokim em olsem, "Devit i stap long ples drai bilong Engedi." ² Orait Sol i kisim 3,000 man ol Israel i makim na i go panim Devit wantaim ol lain man bilong em i go long ples Ston bilong Wel Meme. ³ Em i kam long rot we banis bilong sipsip i save stap long en, i gat ples hait i stap long maunten. Sol i go insait long kisim win. Devit wantaim ol lain man bilong em i stap insait tru long beksait bilong dispela ples hait. ⁴ Ol lain man bilong Devit i tokim em, "Dispela dei nau God Yawe i bin tok, taim em i tokim yu, "Mi bai givim ol birua bilong yu long han bilong yu na yu bai mekim wanem yu laik mekim." Orait Devit i kirap na i go isi long Sol na katim hap klos bilong en. ⁵ Bihain liklik Devit i bel sori long Sol long wanem em i katim hap klos bilong em. ⁶ Devit i tokim ol lain man bilong em, "God Yawe i tok nogat long mi long mekim ol dispela kain pasin long bosman bilong mi, God Yawe i makim em olsem na mi noken putim han antap long em, long wanem God Yawe i makim em pinis." ⁷ Olsem na Devit i rausim ol lain man bilong em waintaim dispela tok na i no larim ol lain man bilong em i pait wantaim Sol. Sol i kirap lusim ples hait na wokabaut i go. ⁸ Bihain, Devit tu i kirap, lusim ples hait na singaut long Sol: "Bosman king bilong mi." Taim Sol i tanim na lukluk bek, Devit i putim het i go daun long soim em daun pasin. ⁹ Devit i tokim Sol, "Bilong Wanem yu harim tok bilong ol man ol i tok olsem, 'Lukim, Ating Devit i panim rot bilong bagarapim yu?' ¹⁰ Nau yu bin lukim wanem God Yawe i putim yu long han bilong mi taim yu bin stap insait long dispela ples hait. Sampela man i tokim mi long kilim yu tasol mi larim yu. Mi tok, 'Mi noken bagarapim bosman bilong mi, Em God Yawe i bin makim.' ¹¹ Lukim, papa bilong mi, lukim hap klos mi holim long han bilong mi. Em i tru olsem mi katim hap klos bilong yu na mi i no kilim yu, bai yu save na lukim olsem mi nogat wanpela tinting nogut long bagarapim yu, tasol yu wok long panim mi raun long kilim mi. ¹² Larim God Yawe tasol bai i skelim yu na mi na larim God Yawe tasol i ken bekim bek tasol mi i noken bagarapim yu. ¹³ Olsem saveman bilong bipo i tok, man nogut i save mekim pasin nogut,' Tasol mi no dispela kain man bai mi bagarapim yu. ¹⁴ Bihain em husat king bilong Israel bai kamap? Mi husat na yu wok long ronim mi a? Mi olsem dok i dai pinis! Mi olsem laus! ¹⁵ God Yawe tasol bai skelim na givim pei long yu na mi na lukim, Em i stap long sait bilong mi na Em i helpim mi long ranawe long han bilong yu." ¹⁶ Taim Devit i pinisim dispela toktok long Sol, Sol i tok, "Em nek bilong yu, pikinini man bilong mi Devit?" Sol i singaut bikmaus na i krai. ¹⁷ Em i tokim Devit, "yu stretpela man na i winim mi. Yu bin mekim gutpela pasin long mi taim mi tingting nogut na laik bagarapim yu. ¹⁸ Yu bin tokaut nau, olsem yu bin mekim ol gutpela pasin long mi, yu no bin kilim mi taim God Yawe i putim mi long han bilong yu. ¹⁹ Sapos wanpela man i painim birua bilong en , em bai lusim em i go fri a? Larim God Yawe i givim yu gutpela pei long wanem yu mekim long mi. ²⁰ Nau, mi save olsem yu bai kamap king na kindom bilong Israel bai i stap aninit long han bilong yu. ²¹ Mekim tok promis long mi long nem bilong God Yawe olsem yu bai i no inap rausim ol lain tumbuna bilong mi na noken rausim nem bilong mi long haus bilong papa bilong mi". ²² Na Devit i mekim stronpela tok promis long Sol. Orait Sol i go long haus bilong em, tasol Devit wantaim ol lain man bilong em i go antap long ples hait bilong ol.