¹ Tripela yia i go pinis nogat pait i stap namel long Aram na Israel. ² Orait em i kamap olsem long namba tri yia, Jehosafat king bilong Juda em i go long king bilong Israel. ³ Nau na king bilong Israel i tokim ol wokman bilong en, " Ating yupela i save olsem Ramot long distrik Gileat i lain bilong mipela, tasol mipela i no mekim wanpela samting long kisim long han bilong king bilong Aram?" ⁴ Orait em i tokim Jehosafat, "Inap yu bai go wantaim mi long pait wantaim ol Ramot Gileat?" Jehosafat i bekim tok long king bilong Israel olsem, "Mi yet i olsem yu, ol manmeri bilong mi i olsem manmeri bilong yu na ol hos bilong mi i olsem hos bilong yu." ⁵ Na Jehosafat i tokim king bilong Israel, "Plis painim rot long tok bilong God Yawe long wanem samting yu bai mekim pastaim." ⁶ Orait king bilong Israel i bungim ol profet wantaim, 400 man na i tokim ol, "Inap mi go pait wantaim ol Ramot Gileat o mi no ken go?" Na ol i tok, "Go na pait, bai God i givim ol i kam long han bilong king." ⁷ Tasol Jehosafat i tok, I gat narapela profet bilong God Yawe i stap bai yumi ken painim gutpela tingting long em o nogat?" ⁸ Na king bilong Israel i tokim Jehosafat olsem, I gat wanpela man i stap bai yumi ken painim gutpela tingting bilong God Yawe i ken helpim, em Mikaia pikinini man bilong Imla, tasol mi no laikim em bilong wanem em i no save mekim tok i gutpela long mi, em ol strongpela tok tasol." Tasol Jehosafat i tok, "Ating king i no inap tok olsem." ⁹ Na king bilong Israel i singautim ofisa na i tokim em, "Go kisim Mikaia pikinini man bilong Imla i kam hariap tasol." ¹⁰ Na Ahap king bilong Israel wantaim Jehosafat king bilong Juda tupela i sindaun long wanwan sia king bilong tupela na werim klos king bilong tupela na sindaun long ples nating long rot i go insait long bikpela dua bilong taun Samaria na olgeta profet i go autim tok profet long tupela. ¹¹ Sedekaia pikinini man bilong Kenana i wokim ol samting olsem kom bilong bulmakau long ain na i tok, "God Yawe i tok olsem, 'Wantaim dispela yu bai sutim ol Aram inap yu pinisim ol olgeta." ¹² Orait olgeta profet i autim tok profet wankain tasol, na i tok, "Pait wantaim Ramot Gileat na winim ol, long wanem God Yawe i givim olgeta lain long han bilong king." ¹³ Man bilong karim tok husait i go singautim Mikaia i tokim em na i tok, "Lukim nau, olgeta tok bilong ol profet i tokaut long gutpela samting long king wantaim wanpela tingting. "Plis mekim wankain tok i gutpela olsem ol i tok pinis." ¹⁴ Mikaia i bekim tok, "Long nem bilong God Yawe i stap laip, mi bai tokim wanem God Yawe i tokim mi long tokim yupela." ¹⁵ Taim em i kam long king, king i tokim em, "Mikaia, inap yumi go pait long Ramot Gileat o nogat?" Na Mikaia i bekim tok long em, "Go pait na winim, God Yawe bai givim yu long han bilong king." ¹⁶ Orait na king i tokim em, hamas taim mi askim yu long tok stret long mi long tok tru tasol long nem bilong God Yawe?" ¹⁷ Orait Mikaia i tok, "Mi lukim olgeta Israel i ranawe i go long ol maunten olsem ol sipsip i no gat wasman na God Yawe i tok, 'Ol i no gat wasman. Larim olgeta man i go bek wantaim bel isi long asples bilong ol."' ¹⁸ Tasol king bilong Israel i tokim Jehosafat olsem, "Mi bin tokim yu bai em i no inap mekim gutpela tok long tingim mi, tasol ol tok bilong givim hevi long mi." ¹⁹ Tasol Mikaia i tok, "Olsem na yupela i mas harim tok bilong God Yawe; Mi lukim God Yawe i sindaun long sia king bilong em na ol ensel bilong heven i raunim em na i sanap long han sut na han kais bilong en. ²⁰ Na God Yawe i tok, Husait bai go giamanim Ahap, long em bai go pait wantaim ol Ramot Gileat na bai ol i kilim em i dai?' Wanpela ensel i tok olsem na narapela tu i tok. ²¹ Orait wanpela spirit i kirap i kam sanap long pes bilong God Yawe na i tok, 'Mi bai go giamanim em.' Na God Yawe i tokim em, 'Olsem wanem?' ²² Na spirit i bekim, 'Mi bai go aut na kamap giaman spirit long maus bilong olgeta profet bilong em.' God Yawe i bekim, 'Yu bai giamanim em na tu yu bai mekim gut tru. Go nau na mekim olsem.' ²³ Nau lukim, God Yawe i putim giaman spirit long maus bilong ol dispela profet bilong yu na God Yawe i makim long bagarapim yu." ²⁴ Orait Sekedaia pikinini man bilong Kanana i kam antap, solapim wisket bilong Mikaia na i tok, "Long wanem rot spirit bilong God Yawe i lusim mi na i go toktok long yu?" ²⁵ Mikaia i tok, "Lukim, yu bai lukim dispela dei taim yu go insait long rum na hait." ²⁶ Na king bilong Israel i tokim ol wokman bilong em, "Holim pas Mikaia na kisim em i go long Amon, long gavana bilong biktaun na long Joas pikinini man bilong mi. ²⁷ 'Na king i tok, tokim em olsem, Putim em long kalabus na givim liklik bret na wara long em, inap mi kam bek gut. ²⁸ "Orait Mikaia i tok, Sapos yu kam bek gut, orait God Yawe i no toktok long mi." Na em i tok gen, Yupela olgeta manmeri, harim dispela tok." ²⁹ Orait Ahap, em king bilong Israel na Jehosafat king bilong Juda, tupela i go antap long Ramot Gileat. ³⁰ Na king bilong Israel i tokim Jehosafat, "Mi bai senisim mi yet na go long pait, tasol yu mas putim klos king bilong yu." Orait king bilong Israel i senisim em yet na i go long pait. ³¹ Nau king bilong Aram i mekim strongpela tok long ol 32 kepten bilong ol karis bilong en na i tok, "Yupela i no ken kilim ol soldia nating. Moabeta, kilim king bilong Israel tasol." ³² Taim ol i kamap long hap ol kepten bilong karis i lukim Jehosafat na ol i tok, "Tru tumas em king bilong Israel." Ol i go long kilim em, olsem na Jehosafat i bikmaus. ³³ Taim ol komanda bilong karis i lukim olsem em i no king bilong Israel, ol i tanim na lusim em i go. ³⁴ Orait wanpela man i kisim banara bilong en na i sutim king bilong Israel namel long sol bilong siot kapa bilong en, Orait Ahap i tokim draiva bilong karis bilong en, Yu lusim ples bilong pait na kisim mi go bek, long wanem mi kisim bikpela bagarap." ³⁵ Pait i kamap bikpela long dispela dei na king i kalap long karis bilong en na i lukluk i go long Aram na apinun em i dai. Blut bilong en i ron long hap em i kisim spia long em na i ron i go aninit long karis bilong em, ³⁶ Orait taim san i go daun, ol ami i singaut na i tok, "Olgeta man i mas go bek long biktaun na hap graun bilong ol yet!" ³⁷ Olsem na king Ahap i dai na ol i kisim em i go long taun Samaria na ol i planim em long Samaria. ³⁸ Ol i wasim karis bilong en long hul wara long Samaria na ol dok i klinim blut na i kaikai [long hap ol pamuk manmeri i save waswas ] wankain olsem tok bilong God Yawe i tokaut long en. ³⁹ Long ol arapela samting i toktok long Ahap, long wanem ol samting em i wokim long haus wantaim ol tit bilong elefan, olgeta biktaun em i wokim tu wantaim dispela, ating ol i no raitim long buk king bilong Israel i save tokaut? ⁴⁰ Orait ol i planim Ahap wantaim ol lain tumbuna bilong en, Ahasia i kisim ples bilong papa bilong en na i kamap king. ⁴¹ Orait Jehosafat pikinini man bilong Asa i kamap king bilong ol Juda long namba 4 yia taim Ahap i stap king bilong Israel. ⁴² Jehosafat i gat 35 krismas taim em i kamap king, na em i stap king long Jerusalem inap 25 yia. Nem bilong mama bilong en em Asuba pikinini meri bilong Silhi. ⁴³ Em i bihainim ol pasin bilong papa bilong en Asa, em i no givim baksait long ol, em i stap stret long ai bilong God Yawe. Tasol ples bilong lotuim god giaman em i no rausim yet. Ol manmeri i wokim ofa na kukim ol paura i gat gutpela smel long dispela ples yet. ⁴⁴ Jehosafat i kamapim wanbel wantaim king bilong Israel. ⁴⁵ Long ol arapela samting i tokaut long Jehosafat na gutpela pasin tru em i soim, olsem wanem em i mekim pait i kamap gutpela, ating ol i no raitim stori long buk bilong ol king bilong Juda? ⁴⁶ Em i rausim ol manmeri i stap long dispela ples na mekim pasin pamuk taim papa bilong em i no dai yet. ⁴⁷ Long dispela taim ol Idom i no gat king yet, husait man i stap namba tu bilong king bilong Juda i save lukautim ol. ⁴⁸ Jehosafat i wokim bikpela sip bilong i go long Ofir long kisim gol, tasol ol i no go, bilong wanem sip i bagarap long Esion Geba. ⁴⁹ Orait Ahasia pikinini man bilong Ahap i tokim Jehosafat , "Larim ol wokman bilong mi i go wantaim ol wokman bilong yu long ol sip." Tasol Jehosafat i no laikim ol long go. ⁵⁰ Jehosafat i dai na ol i planim em wantaim ol lain tumbuna bilong en long biktaun bilong Devit, tumbuna bilong en; Jehoram i kisim ples bilong papa bilong em na i kamap king. ⁵¹ Ahasia pikinini man bilong Ahap i kamap king bilong Israel long Samaria taim Jehosafat i stap king bilong ol Juda long namba 17 yia, em i stap king bilong ol Israel inap tupela yia. ⁵² Em i mekim sin long ai bilong God Yawe na bihainim pasin bilong papa na mama bilong em, em i bihainim pasin bilong Jeroboam pikinini man bilong Nebat tu, wantaim ol dispela pasin em i mekim ol Israel i mekim sin. ⁵³ Em i bihainim god giaman Bal na i lotuim em, olsem na em i mekim God Yawe i belhat, God bilong Israel, wankain olsem papa bilong em i bin mekim.