¹ Birua pasin i laik kamap long ol lain Israel olsem na Devit i kauntim ol manmeri bilong Israel. ² Devit i toktok long Joap wantaim ol man i go pas long ol soldia. " Yu mas i go na kauntim olgeta manmeri bilong Israel inap long ples Beseba i go inap long ples Dan na karim ripot i kam bek long mi na bai mi save long namba bilong ol." ³ Joap i tok," larim God Yawe mekim soldia bilong em i kamap planti. Tasol bosman bilong mi king, Yu no save olsem olgeta manmeri i stap aninit long yu? Bilong wanem na bosman i laikim dispela? Bilong wanem na em i laik kisim nogut i kam long ol manmeri bilong Israel?" ⁴ Tasol king i tok strong moa olsem Joap i mas bihainim tok bilong em. Olsem na Joap i lusim na i go long olgeta hap bilong Israel. Na em i kam bek long Jerusalem. ⁵ Orait Joap i go ripot long Devit olsem, ol Israel i gat 1,100,000 man bilong pait na ol Juda i gat 470,000 soldia. ⁶ Tasol Joap i no kauntim ol lain bilong Livai na Benjamin, long wanem king em i givim narapela wok. ⁷ God Yawe i no amamas long wok ol i bin wokim olsem na em i bagarapim ol lain Israel. ⁸ Devit i beten long God Yawe, "Mi bin kamapim bikpela rong taim mi mekim dispela pasin. Nau lusim rong bilong wok man bilong yu, mi wok olsem longlong man tru. ⁹ God Yawe i tok long Gad, profet bilong Devit. ¹⁰ " Yu go na tokim Devit, 'Dispela em God Yawe i tok olsem: Bai mi soim yu tripela rot long yu. Yu bai makim wanpela bilong ol.'" ¹¹ Orait Gad i go lukim Devit na i tok long em " God Yawe i tok olsem, 'makim wanpela bilong ol dispela tripela samting: ¹² Yu laik tripela yia bilong hangre na tripela mun bilong ol birua bilong yu i pait long yu na kilim yupela olgeta, o ensel bilong God Yawe i kam na bagarapim olgeta lain bilong Israel long tripela dei.' Nau yu tokim mi long tingting bilong yu wanem yu laik na mi laik karim i go long man husat i salim mi." ¹³ Orait Devit i tok long Gad, " Mi stap long bikpela pen tru! Larim mi pundaun long han bilong God Yawe long wanem sapos mi go long han bilong narapela lain long wanem gutpela pasin bilong em i bikpela tumas." ¹⁴ Olesm na God Yawe i salim bikpela sik i kam long Israel, Na namba bilong ol manmeri i dai long dispela sik i olsem 70,000 manmeri. ¹⁵ God i salim wanpela ensel bilong bagarapim Jerusalem. Taim ensel i redi long bagarapim ol, God Yawe i lukluk na i senisim tingting bilong bagarapim ol. Na em i tokim ensel bilong bagarapim ol, "Em inap. Nau yu stop long bagarapim ol." long dispela taim ensel bilong God Yawe em i sanap long hap we ol i save rausim wit na lip long en, em graun bilong Onan wanpela bilong lain Jebus. ¹⁶ Devit i lukluk i go antap na i lukim ensel bilong God Yawe sanap klostu long graun na skai, em i holim wanpela bainat i makim Jerusalem. Orait Devit na ol hetman bilong em ol i werim kolos bilong sori na putim pes i go daun long graun. ¹⁷ Devit i beten i go long God Yawe, " Em mi tasol i tok long kauntim ol manmeri? Mi mekim pasin nogut. Tasol ol dispela manmeri ol i nogat wanpela rong long yu? God Yawe! Yu bagarapim mi na ol famili bilong mi, tasol noken larim sik i stap yet long ol dispela manmeri." ¹⁸ Orait ensel bilong God Yawe i tokim Gat long i go na toktok long Devit, long em i mas i go na wokim alta bilong God Yawe long ples bilong Onan bilong Jebus long hap em i save kisim kaikai bilong wit. ¹⁹ Orait Devit i go olsem Gat i tokim em long en, long nem bilong God Yawe. ²⁰ Taim Onan i wok long gaden wit i stap na taim em i tanim na i lukim ensel. Em yet na ol 4-pela pikinini man bilong em ol i go hait. ²¹ Taim Devit i kam long Onan, Onan i lukluk i go na i lukim Devit. Em i lusim ples bilong wok long wit na i brukim skru long Devit na em i putim pes i go daun long graun. ²² Orait Devit i tok long Onan, " Salim dispela wit gaden long mi, bai mi ken mekim ples bilong lotu long God Yawe. Bai mi baim long pei stret yu makim long en, Olsem bai sik nogut i lusim olgeta manmeri." ²³ Orait Onan i tok long Devit olsem, "Mi no laik olsem bai you baim dispela graun, yu kisim tasol. Yu ken kisim wanem samting yu lukim i gutpela bilong mekim ofa, Bai mi givim bulmakau long yu long mekim ofa na ol hap plang bilong paitim wit i ken helpim long mekim paia na sampela wit bilong kukim ofa; bai mi givim olgeta long yu." ²⁴ Tasol King Devit i tokim Ornan, "Nogat, Bai mi baim long pei bilong em stret. Mi no inap mekim ofa long God Yawe long samting bilong yu. Sapos mi no baim long pei bilong em stret." ²⁵ Orait na Devit i baim dispela hap graun long 6-kilogram gol. ²⁶ Na Devit i wokim alta bilong God Yawe na ofa bilong paia i kukim olgeta na ofa bilong wanbel wantaim God Yawe. Na Devit i beten long God Yawe, God Yawe i harim beten bilong em long heven na i salim paia i kam long kukim ofa antap long dispela alta. ²⁷ Na God Yawe i tokim ensel na em i putim bainat long ples bilong en. ²⁸ Taim Devit i lukim olsem God Yawe i harim beten bilong em long ples bilong Onan long Jebusait olsem na Devit mekim ofa long dispela hap. ²⁹ Long dispela taim, Haus sel bilong God Yawe, Moses i bin wokim long ples nating na alta bilong mekim ofa, em i stap long ples ol i kolim Gibeon. ³⁰ Na long dispela taim Devit i no inap i go long painim aut tingting bilong God. Long wanem em i pret long bainat bilong ensel bilong God Yawe.