¹ To'a'ira abunihaina wiki'ira enta'a, entara hikabano a'i baubaro, Mariaba Makdarai hainaba matimati'i aniro biba tabobaro enta tinte baria oriba kia baubaro. ² Biba kantero Saimoni Pitara bata bi kai'a baintira Ihuba bo'akero antu'ari baura, Mariaba bikahanta tibanimiro tiharo. "Bika Nora matimati'i hai a'inima barakabo kiama tenabu bata tabauro bira taie batara." ³ Mintubo Pitaba bata bi kai'a baintiba bata baha'a bebare kante hanta matimati'ira otubura. ⁴ Bikahantai'ake kante otubura, mintubo bi kai'a baintiba aikarokero kantero Pitara bata atarakero biba nane matimati'ira oturora. ⁵ Biba iata bara mintubi kero bera tabobaro Ihura baata'a a'umita utaba'aba baubaro, ibo biba nai kia birai'i ori etora. ⁶ Saimoni Pitaba bira nantiara tubiba matimati'ira ori'etora. Ori'etero tabobaro Ihura baata'a a'umita utaba'aba kia baura, ⁷ boki utaba'aba iatai batoba bata baura. Bi utaba'aba, kia hiniki utaba'ara batakero baura, mintibo bi utaba'aba u'urata biro ko'e biro baura. ⁸ Mintubo bi kai'a baintiba bobano tabae biba nane matimati'a tubiba, biba bata ori'etora. Biba bihaikara tabero biba mara'ura utura. ⁹ Bi entara, bika kia Kotira aratanu'ira tiharo Ihuba matimati'i hairo a'i himpuanobe ti ubara tabora. ¹⁰ Mintumanta bi kai'a baintika nai nabu'ira anirante bura. ¹¹ Mintubo, Mariaba matimati a'irakero baha'a baiharo i'irate baura. Biba i'irateharo, batakarua biro matimati'ira bera tabora. ¹² Biba tabomanta tara ankero hanta utaba'a autuaka o'ubi baura, bobano iatai baubo bobano ai'u tarai baka Ihura baata batora'a baura. ¹³ Bika bira tibami tiha, "Nahenti baubo, are nanahare i'irate bariaro ti?" Biba bikahanta tibanimiro tiharo, "Bika ti Nora bare buabo, kiama te tabauro bira taie batara." ¹⁴ Biba bi ubara tibakero, tu'antabiro tabobaro Ihuba himpiro baubo, kiama biba tabero kia Ihu baubema tiro. ¹⁵ Ihuba bira tibamiro tiharo, "Nahenti baubo, are nanahare i'irate bariaro? Nanare rante bariaro?" Mariaba iriro tiharo, bo bainti bano naho'ira ra'ikira bainti bano tiro, mintibo biba tiharo, "Nora Bainti baubo, are bira bare birera, tiba ti timiane tae are bira bataina, tibatimi'e te bira bare buare." ¹⁶ Ihuba bi nahentirara tiharo, "Mariao tiro." Mariaba tu'anta biro Hiburu uba'ihairo birara tiharo, "Raboni tiro," (Bi ubara okara baireba, "Iata bainti baubo"). ¹⁷ Ihuba bira tibamiro tiharo, "Kia are ti uatabarane tiro, kaima te tenta Obinai buro tiro, iboma are ti ata bakauka inaini birama buru tibanimira tiha, te tenta Oba bata ni Oba bata inanaima orubuainabe, ti Kotira bata ni Kotira batabe." ¹⁸ Mariaba Maktarai hainaba kai'a bainti bi tibanimiro tiharo, "Te Nora tabauro tiro," Ihuba nanahikara tira biba bika bata bi tibanimura. ¹⁹ Erobaro, bi entara bira abunihaina entara'a, Ihura kai'a bainti Juda batanakara etake enti kempukai'ake tintate baubaro. Totara Ihuba bika abunana obarai'a biro tiharo, "Iha'ara auha bano ni hampata bariaire tiro." ²⁰ Biba bi ubara tibakero, biba kau'u bata nai ta'e bata bika numi'ero. Kai'a bainti nai Nora tabe bika nora uahara hika'ira mpi'a bura. ²¹ Ihuba bika anirante tibanimiro tiharo, "Iha'ara auha bano ni hampata bariaire tiro. Ti Oba ti aititai tuburaukabe, boha'arakema, te ni atitauro." ²² Ihuba bi ubara tibakero, biba nai aiho bika'a bua'akero tiharo, " Ne Aiho bainti barate tiro. ²³ Ne bainti kumi bi'u nimitaibo, Kotiba bata bika kumi bi'uma nimitanarobe, ne kia bainti kumi bi'u nimitaibo, bika kumi bano a'ima barianarobe." ²⁴ Tomasiba, bira bo autu Didimasiba, biba kai'a bainti bo bano 12-nabu ihainaba, biba kia bikara hampata baubo Ihuba bira'i anura. ²⁵ Nantiara hinikia kai'a baintika bira tibami tiha, "Tenabu Nora tabauro ti."Tubaro Tomasiba bika tibanimiro tiharo, "Te kia niri nohai aruara bira kau'u'i tabarai, kia niri nohai aruara'i kau'u batarai ti, te kia ta'eni aruara'ira kau'u batarai ti, kiama te mara'ura utirabe tiro." ²⁶ 8-nabu enta nantiara Ihura kai'a bainti nabu'ira baubaro, Tomasiba bata bikara hampata baubo. Bika enti bata tintate baubaro Ihuba bika abutana obarai'a biro, tiharo, "Iha'ara auha banoma ni hampata barianarobe tiro." ²⁷ Biba Tomasirara tiharo, "Nena kakahi ti kau'u'ira bateha tabane tiro,nena kau'u, ta'eni bata batehara tabane tiro. Kia are tara auha batarai tira, are mara'ura utuane tiro." ²⁸ Tomasiba bira uba anirante tibamiro tiharo, "Are ti Nora bano bata ti Kotiba batabe tiro." ²⁹ Ihuba bira tibamiro tiharo, "Bate are ti taberae are mara'ura utuaro tiro. Iboma bainti kia ti tabarai ti mara'ura utika, bi baintika uahate." ³⁰ Ihuba nai kai'a bainti hampata baiharo airu mirikori autimanta bika tabora. Bi mirikorira kia bika ma aratanura'ira ararua tabo, ³¹ Iboma bira ma eka uba ararutara ne mara'ura uti tiha Ihu Karaitirara Kotira ma'ube tiaterabe. Mintiboma ne mara'ura uti, bira autu'ama aiho barebarabe.