¹ Pasoba enta aumaui'ubaro, Ihuba tabero biba ma batara tutero nai O-o binai buaina entaba obarai'ubaro. Biba nai antu batai bariakara antu'arura, biba bikara bo'ake antu'aru'i biro buru utubura. ² Sataba Judas Isikariotira Saimonira ma'u irira hika'ira kai'a baraibaro, Ihura bitakero nabutaka kau'u'ira bataina. ³ Ihuba baka tabero, bira Oba ekahika bira kau'u'ira bataibaro. Biba tabero biba Kotirai hairo tubiba biba Koti binaini tuburantero birebabe. ⁴ Ihuba himpiro kara a'ira kero biba nai bukai utaba'a bi'u kero. Biba tauri b arakero nai tabarana rumpa tero. ⁵ Biba kuampa bo'ia namai rauru kero nai kai'a bainti ai'u hi'a nimite baura. Biba nai tabarana tauri rumpa taira nohairo nai kai'a bainti ai'u unka nimitora. ⁶ Biba Saimini Pitara'a anibaro Pitaba bira tibamiro tiharo, Nora baubo, are tinabu ai'u hi'arebae iaro tiro?" ⁷ Ihuba bira anirante tibamiro tiharo, "Nanahika bate te mintiaina, kiama are tabenabe, iboma nantiarama are tabenabe." ⁸ Pitaba bira tibamiro tiharo, "Kiama are ti ai'u hi'enabe tiro." Ihuba bira anirante tibamiro tiharo, "Minti'e kia te ai ai'u hi'aina, kiama are bohika ti batakera batenarabe." ⁹ Saimoni Pitaba bira tibamiro tiharo, Nora baubo kia are ti ai'u'ai hi'a timitane, are ti kau'u bata iata bata hi'a timitane tiro. ¹⁰ Ihuba bira tibamiro, bainti taukae namai tuntukaka, kiama bika e'a namai tuntibabe tiro, iboma bika ai'u'aima hi'ebabe tiro. Ne taku'uma buabo, iboma kiama ne eka taku'u buabo." ¹¹ Ihuba baka tabora tabae bira nabutaka kau'u'ira bataina, mintibo biba tiharo, "Kia ne ake taku'u buabo tirabe." ¹² Ihuba bika ai'u hi'a nimitora nantiara, biba nai saketi barakero biba e'a o'ubiro baiharo bika ira nimitero tiharo, "Ne bira okara tabee te nini mintuna okarara? ¹³ Ne tiriara tiha 'iata bainti'o' 'Nora baubo tibariara' bira abu abu'ama ibo. Te Tentama iata bainti baihama te Norabe. ¹⁴ Minti'e Te ni Nora bata Iata bainti bata baiha ni ai'u hi'arera, ne bata boha'arina okarara barehama boka ai'u hi'a nimitate. ¹⁵ Bira nanare te ni numi'auro ne bata boha'arina okarara te mintunateke mintihama ne bariate. ¹⁶ U'ai akema, ni tibanimuro, kai'a bainti bano kiama nai ra'ikirara atara kaibo; noo bainti bano uba barero biraba, kiama biba tabae bira atitaira atara kaibo. ¹⁷ Mintira ne bihaikara okara tabe bi ubara abataibera, ne uahate. ¹⁸ Kia te ni ekau karauma bi ubara turo. Te tabauro taukae te makimi'a taurauka, mintima te bi ubara tiairo Kotira ubabano u'ai iairerabe. Bi ubaba mintiroma baibo, 'Bainti tabae ti kantiro pareti nairaba, bibama ti nabutai inarobe.' ¹⁹ Bate te bihaikarara ni tiba nimiairoma nantiarama bihaiba obarai irama, ne mintiakema mara'urama utibarabe Te Tentama Bauro tibarabe. ²⁰ U'ai'ake, te ni tiba nimuro, tabae te atitaina baintira bitairaba biba tima bitaibo, tabae ti bitairaba biba ti atitaira batama bitaibo." ²¹ Ihuba bi ubara tibakero ibaro, bira auha bano mararobaro biba tiharo, u'ai'akema te ni tibanimuro ni'i hairo bobanoma ti bitakeroma nabutaka kau'u'i batanarobe." ²² Bira kai'a bainti nai tabe nai tabe iha airu abuato iriha bika ta baintirarae tiboti. ²³ Kai'a bainto bobano Ihuba bo'akero antu'ari bauba, biba Ihura batakero tainta'a o'ubiro baubaro. ²⁴ Saimoni Pitaba nai kau'u nohairo bohika bi kai'a baintira mintiakero tiharo, "irakera tabane ta baintiba birara tiba kaiboe tibo tiro." 25 Mintitibo bi kai'a baintiba Ihura aumanto'a biro bira iramitero tiharo, "Nora baubo are bi baintira tarare tiaro tiro?" ²⁶ Ihuba bira tibamiro tiharo, "Te pareti barake hapura'i bate bira amiaima ne tabate, bira bi baintirabe." Mintubo biba pareti barakero hapura'i batero, biba Judasira amura, Saimoni Isikariotira ma'u. ²⁷ Ihuba bira pareti amira nantiara, Judasira'i Sataba ori etora. Ihuba bira tibamiro tiharo, "Nanahika mintireba irera, are totara mintiane tiro." ²⁸ Kia bo bainti bano bata tabora biba nana okararae bi ubara birara tura. ²⁹ Hinikia kai'a baintika iri tiha Ihuba birara tiharo Nora mono ti entara'a kara ko'ai iairerae tiboti o behi bainti nimiane tiroe tibo ti bira nanare, Judasiba mone uta ra'iki bauba umanta. ³⁰ Judasiba pareti barero bira nantiara, totara baha'aini bebarora. Batuka bano konkirai'a bura'i. ³¹ Judasiba bebare binubaro, Ihuba tiharo, "Batema Bainti Baiinti bano nora autu barairoma Kotiba bainti Baiinti'a hiroma nora autu baranarobe. ³² Kotira nora autu bano bainti Baiinti'i hairo a'ira'a obarai'a biroma totarama Kotiba bira nora autu amianarobe. ³³ Ti inara baiintitibe, te abo entama ni hampata bairiama. Ne tiriara rantebarabe, te Juda batanaka tiba nimuna tekebe, taie te buai nanaini, kiama ne anibararbe.' Bate te niara bata boha'ari ubarama turo. ³⁴ Bate te araka lo mantiakema nimura, ne bokara bo'akema antu'aruate, te niara antu'aruna teke, boha'arake ne bata bokara antu'aruate. ³⁵ Bi okararama bainti nahenti tabe tiha, ne bata ti kai'a baintima bariabo tibarabe, ne bokara u'ai'ake antu'arirara." ³⁶ Saimoni Pitaba bira tibamiro tiharo, "Nora baubo are tai birabae tiaro tiro?" Ihuba bira uba anirante tibamiro tiharo, "Taie te buainanai, are kiama ho ti abatabare binara tiro, iboma nantiarama are ti abatenarabe tiro." ³⁷ Pitaba anirantero tiharo, "Nora baubo, bira nanti'ee kia te bate ai abatarabe tiro? Te tenta mara'ura ariaro tima kaka'ia karabe tiro." ³⁸ Ihuba anirante tiharo, "Are nena mara'ura tiriara kaka'inae or kiae? U'ai'akema te ai tibamuro, kokorara bano kia uba tirama, tara tata boha tatama are tiha, kia te bira tabaunabe tinarabe.