¹ U'ai'akema te ni tibanimuro, bo bainti bano sipisipi hoha'ira kia enta'ahiro batirarai tiro, biba bonahiro batirairaba irera, bi baintiba muara bainti banobe biba bainti iahikara muara bareharo umina bata raraukeharo bare baibabe. ² Bainti bano entanahiro ori'etaiba biba u'a bainti bano nai sipisipi'a ra'iki baibabe. ³ Enta'a ra'iki baibama bira enta antua amitanarobe. Sipisipi bira auntama iribarabe, biba bi sipisipika auturakero araa bareroma bite bebaranarobe. ⁴ Biba hoha'ihairo nai sipisipi bitero baha'a bebakero, biba abuni bibairama sipispi birama abatabare bibarabe bira nanare, bika bira auntama iritabo. ⁵ Kiama bika bo bainti kia tabaira abatebarabe, iboma bika bira atarebabe, bira nanare, kiama bika bo bainti aunta iriabo." ⁶ Ihuba tu'antarara uba bika tibanimura, mintumanta bika kia kankomake uba bira okara biba tibanimura barora. ⁷ Ihuba bika anirantero tibanimiro tiharo, "Te u'ai'akema ni tibanimuro, te tentama sipisipi enta bauro tiro. ⁸ Taukae baaka ti abuni aniaka, bika muara baintibe, bainti ia hikara raraukeha barebarikabe, mintima sipisipi kia bika uba iriabo. ⁹ Te tentama enta bauro. Mintiro bo bainti bano ti'ahiro aniro ori'etaina, te bira bitarabe. Biba ori'ete tuburiharoma ko'e ahikama nanarobe. ¹⁰ Muara bainti bano anira biba muara autukero arukero orai'a kareba anirabe. Te tubuna bika mara'ura baratera tubunabe, bika mpi'abi mpi'a buatera te tubunabe. ¹¹ Te tetama ko'ekeha sipisipi'a ra'ikiaka bauro. Ko'e kero sipisipi'a ra'ikibai baintiba nai mara'ura kakakia keroma sipisipi kaho'ianaro. ¹² Iboma kai'a bainti bano ko'a bareharo kai'a barebaiba, kia biba sipisipi bika obaube, kia biba sipisipi ra'ikiara tabaibabe. Biba tabairo akau bairi bano aniro, biba sipisipi a'ira kero atama buanarobe. Akau bairi bano abatekaira bohau bohauma bibarabe. ¹³ Biba a'irakero atabura bira nanare, biba ko'ara kai'a baraibabe, mintiboma biba sipisipiara kia auha bataibo. ¹⁴ Te tentama ko'eke sipisipi'a ra'ikurauka bauro, te tenta sipisipi tabataura ti sipispi ti tabatabo. ¹⁵ Ti Oba ti tabatai te ti Ora tabatauro, mintima te tenta sipisipiarama mara'ura kauro. ¹⁶ Te hiniki sipisipira urauka bata bariabo kia bi bihoha ra'iraukabe. Bika bata bite bikaima, bika ti no irihama, bika bo sipisipi bo'ara baibaroma, bo kai'a bainti bano bika'a ra'ikianarobe. ¹⁷ Bi okararama, ti Oba ti antu'ari baibo, te tenta mara'ura kaka'iake te a'ima tenta barainabe. ¹⁸ Kiama bainti bano ti kau'u ihairo barakanarobe, mintima te tentama te mara'ura kaka'uro. Ti autu baibo mara'ura kaka'iainara, ti autu baibo tenta mara'ura a'i baraina. Ti Oba ti bi ubara timirabe. ¹⁹ Juda batanaka bi ubara iri, bika rauhabi anirante tarai'a burabe. ²⁰ Bika'ihai orautaha anirante tiha, "biba ora aiho batero werai'ama ibabo ti. Nanahare ne bira uba iri bariabo ti?" ²¹ Hinikiaka tiha, "Kia ora aiho bano bira'a baiboauma biba uba tibaibo ti. Ora aiho bika hoe abu impa buaka rampai nimitebabe nanabe ti?" ²² Mintubaro, Nora mono tii entaba Jerusaremini, obarai'ura. ²³ Antai entaba anubaro, Ihuba mono nabu'i nuba'iro, Solomonira enta aubahi orurora. ²⁴ Juda batanaka bira kubaike tiha, "Nana entae are tiba o'ai'ake tinabu tibatiminabe ti? Are Karaitiba irera, are abu abu'akera tinabu tibatimiane ti." ²⁵ Ihuba anirante tiba nimiro tiharo, "Te ni tiba nimurama ne kiama mara'ura utuabo tiro. Kai'a te tenta Ora autu'a barauraba ti tintarama tiba o'ai'ibabo tiro." ²⁶ Ne kia ti sipisipi antu irauka baribo, mintima ne kia mara'ura utuabo. ²⁷ Te tenta sipisipi tabama tauro, bika ti aunta irite, bika ti abatakabe . ²⁸ Te bika eka enta bai mara'urara nimiaima kiama bika aka'ibarabe, kiama bo bainti bano bika ti kau'u iharo barakanarobe. ²⁹ Ti Oba bika ti timirabe, biba nora bano baiharo hinikiaka bata atarakaibabe, kiama bainti bano ti Ora kau'u ihairo bika a'ini barakanarobe. ³⁰ Te bata ti Oba bata, tehanta bohahabe." ³¹ Juda batnaka ori e'a bata barake bira arireka autura. ³² Ihuba uba anirantero tibanimiro tiharo, "Te airu ko'e kai'a Kotirai hairo tubira ni numi'auro. Bi kai'arama ne ori ti'a a'ireka autuabo?" ³³ Juda batanaka bira tibami tiha, "kia tenabu ko'e kai'a mintianarara ai'a ori a'ire unaraube, kiabe, iboma are Kotira karana'a uba tiana birara tenabu ai'a ori a'unabe. Are umina bainti hano nena bara Kotira bo'ara kareba iaramanta tenabu mintunabe." ³⁴ Ihiba bika tibanimiro tiharo, "Uba bairobe lo buku'ira baka araruatara, te turo, ne nentama, kotika bariabo."' ³⁵ Biba kotika autu rairera, bi antukara Kotira uba bano tubirabe, (mintiboma Kotira uba bano a'i mintiroma barianobe, kiama kaka'ianarobe. ³⁶ Ti Oba nai ti atitaimanta te ma batarai tuburama, ne Kotirara karana'a uba tibariabo tiro,' bira nanare te turo, 'Te Kotira ma'ube.' ³⁷ Minti'e te tenta Ora kai'a kia barai, kiama ne bata ti'a mara'ura utibarabe. ³⁸ Iboma te mintiai bata kiama ne mara'ura utibera, ne kai'a baraina'a mara'ura utihama tabate, ti Oba ti'i baima te ti Ora'i bauro." ³⁹ Bika Ihura uata barareka ubaro, biba bika kau'u ihairo aitarero bura. ⁴⁰ Ihuba anirantero Jodani namai butu bantaraini bura, haru Joniba bainti nahenti namai a'u nimito batukainira biro, mini oru baura. ⁴¹ Airu bainti nahenti Ihu binani ani. Bika tiha, "U'ai'akero, Joniba kia bo mirikori bata mintirabe ti, iboma Jonoba ekahika ma baintirara tiba u'ama baibo ti." ⁴² Bi entara airu bainti nahenti Ihura'a mara'ura utura.