¹ Mono mapike Jisasi asabem bewami beni kato waita yerabe mono'magu agatiruka, ² Afo Jisasi manisire yemi yiyimem, ma'de anene bu amone wamino? Fuga baya yiyimege, ena omi mana onamuga bu watene." ³ Olivi anufim Jisasi oma kumanture bami beni kato waita yu nampa be waka yerave semi, senu sisimeno nante mini anene yu fa'warite nafi? "Emi yinona kanaga naye anene yuga fa'waritene? ⁴ Jisasi ma'nisirem yiyimem", rafima awogu urega e'ana eno muna bu yimego. ⁵ Nayeyara setivipim amuna yu yerave sebe, semi Jisasimi bege sire amuna muna ayipa yibige bitemono. ⁶ Arubim baya yu intanonami amuna intiri iyono, nayeyara mini anene yu fakagi inani anene yu fa'warugem, minimi arafagi buyiga. ⁷ Magu mano itave ena magu nampa arubina, anom magu nampa ena anom magu (kingdom) itabem arubitem. Ano'na aranti yina, magufipake maga mano uwa item. ⁸ Mini aneneyuano iyao magara yi'o yimini ewane uga. ⁹ Naem abigem anon umantim bemi aruma fugitemi sesibika ma'dem magu yu anon umanti yimitemono. ¹⁰ Amuna yimakukum yeraremi, eno muna yimidem, eno ayiranta iwatem. ¹¹ Amuna muna kasanampa waita yu itabemi nesu yibige sapa bitemono. ¹² Savi anta anoni ina, eno ayir anta kipatem. ¹³ Afo iye erarure mini kanamo itabinani yim Goti abigatem. ¹⁴ Mana awogu waya Inaru nom maga yanti masidem yimakukum ewam waita sima mana magaga fa'warurami. Afo naemi mana maga kipatem. ¹⁵ Mi'nugami, amonana sabi anta yu nampa sabi anene yu yina, kasanampa waitami Danieli wafa atekam magufim itabem bem sigaka yebem. "(E'ana yantananiyi intano)", ¹⁶ E'ana Judia wam inimwaita yerare anufa'ana urogo, ¹⁷ Ma'amuga wananim waita e'anam beyi naupake anene bu kumarano. ¹⁸ Yunapim wananiyi e'ana yewayegem naupake wado bu omarano. ¹⁹ Amuba inina nampa sito iya'onto rukayi siguno siyikafa mini nuram. ²⁰ Yigau mukina binona kana iyondinanipim nampa Sabati kana buyino. ²¹ Nayeyara, anon umaru wafa mana nom maga fa'warimi buye'enim umaru yitem, afo mini enawa i'naem buyitem. ²² Mini kana manta akigyi buratem mini mana'bayi ba fa'wa iwatem. Koti uya'dem rukam watanasi yenti kana mante akiga ratem. ²³ Naem, mana waita enanti sem, amonano manami Jisasi bemino, a'a me'ami Jisasi bemino sina buyintano. ²⁴ Muna waita yerabem semi Jisasibe sire, muna kasanampa munatirem Koti uyadem rukam waitanasi yibigem sabi ayika birantem anon anene yu nampa berara anene yu uwaratem. ²⁵ Amonago wafa yigem mini waya siyimidukaunabe. ²⁶ Mi'nugami, enanti semi me'ami wata iwa magufim bemino sina minifa bubono, oma naupa bane sinamote amakukum buyono. ²⁷ Inaru asina ano omi a'unte wapakem yem afu kupege wapa kumina minimi Koti aga ano yitem. ²⁸ Ite agafi mana waiwam fukaganam minifa masidem akiki ruwantitemono. ²⁹ Anon umantanoni kanaga a'ano ayufuni inam biyommano saganti wamitem, ofuyu Inarufake kugufe kuminam, afo Inaru nomaga uwaitem. ³⁰ I'naemi Kotini aga'ano yinanim anene yu konaka yema fa'warinami, maside mana magaga wanu yigun anenefim watemo. Wata aga ano konaka beni anon eran nampa anon oka yina amonatemo. ³¹ Beni ankero yu ufen arebe yewami bemo mana magaga fo'a conafim uyaduka inim waita manta mana aiyapa ruwantitem. ³² Fiki yaga amonare intim marago. Amaru ano auweni emi ana yu'dana, miniga amonago a'iga kanami yema adekagi'emi. ³³ Minugafo mini anene yu amonare intano, Kotini aga ano yinanim kana a'dekagi em, ontaga yibem. ³⁴ Fuga baya yigemi yiyimege, mana akupike watanasi bu fukam mini anene yu fa'waritemino. ³⁵ Inaruwa magawa kipatemifo, setami bu kipatem. ³⁶ Mini kanaga, mana wayi wa buyintagem, Inarufakena ankero nampa benaga ba buyintagem, Koti mana intagem. ³⁷ Noani kanaga'o ugam antami itemi wata aga ano yirantem ina. ³⁸ Mini nurami mana kana ma'e Noani kana'gaose inte inami watanasi yunam newaganam, non newaganam, anasi mare waganam, anasi ame waganam afo Noami beyi sipifim upekani item. ³⁹ Watanasi yu mana anene yanti buyintanti bami nom mano yema masidem fikaruka. Minuganam afo Wata aga yinanim kana yitem. ⁴⁰ Kam waita kantano yunapim waganam, mana wayi binam mana wayi watem. ⁴¹ Kar inikantano witi akarafewam wantafim, mana'wayi bina mana'wayi watem. ⁴² Mi'nugamifo, rafi'dega wago, ano'na yinanim kana buyintagane. ⁴³ Mana'wa intago, umom waita yinanim kanami ma'afo'e intarukatem miniga rafi'dem wagana ma'i yema bu rabintitem. ⁴⁴ Mi'nugami sefo, emi rafidewa wano, bu yintano nafim bata aga yitem. ⁴⁵ Minugami iyewa intim makena ami intebena awakurebe nafi, rafisintano bemi manta rafisiri beyi naupa item, bemanami yuna nakana yinam yunam yimitem? ⁴⁶ Mini yogam waita amo yitem beni anom yema amonanam. ⁴⁷ Fuga baya yiyimege, beni anomi ma'de anene mini yogam waita ayapim ratemi. ⁴⁸ Mana sabi yogam waita ben arapem sem, 'seti anomi ame urem buyitene', ⁴⁹ mi'ni siremi, agona yogam waitayu yirurem yunanu nampa nonu agonayu nampa nem, ⁵⁰ afo miniga beni rafisintano beyi yogam waita waka yitem bemo buyintananika, sini aki kana be buyintananika. ⁵¹ Ben anomi arurem mini yogam waita sito sito ka akefaremi manta manayom anta uwaratemi kar awauntose makam waitayi, afo mini magufim yiwayam yi'e waganam anom ifi dagatemono..