¹ Tiopilasibe, tibake te tota ararua tauna, ekahika Ihuba antakero kai'a bareharo tibanimura birara tunabe, ² bi entara Kotiba bira bitabarero bini orubura. Biba Aiho Bainti aikaro batakero kempuka uba nai kai'a bainti tibanimiharo bika makimi'a tora nantiara bihaikaba obarura. ³ Biba utu biro uri himpura nantiara, biba a'ira'a obarai'a biro nai bika nai numi'ora. 40 enta bira'ira, biba bikaini obarai'a biro, Kotira kindomu'i haina hikara bika tibanimi baura. ⁴ Biba bikara hampata baiharo biba bika tibanimiro tiharo kiama Jerusaremi tutate tiro, mintira ne ti Oba tibataina birara bekai'iate, biba minti tibakero tirabe, "Ne baka te tuna iriarabe, ⁵ Joniba nama'ira namai a'u nimitaira bo'ara, ne bokina entara nantiara Aiho Bainti'ama namai barebarabe." ⁶ Bika eka ani ruba'uabi bira ire tiha, "Nora baubo ti, Isirari batanaka Kintomu uri himpikera entabae ma bate anibo?" ⁷ Biba bika tibanimiro tiharo, ti Oba bihaikara tiba taina entara kiama ne tabebarabe. Biba naima tabataibo. ⁸ Iboma ne kekau hikama barebarabe, Aiho Bainti bano ni'a tubina entara ne ti no barema Jerusaremi batuka uba tibarabe, eka Judia, Sameria batukai haima ekaa bataini tai'a kebarabe . ⁹ Ihuba bi ubara tibakero biba bini orubumanta, eka bira tabebaubo tonabu bano bira a'uraba'ukero bitakero bumanta kia bira ho e'abata tabora. ¹⁰ Bika biba bunaini buru tabebaubaro, totara tara bainti hanta utaba'a autuakahanta bika aumanto ani himpi baura. ¹¹ Bikahanta tiha, "Ne Karirini haina baintibe, ne nanahare ma'a himpi baiha narubai autu'uate bariabo? Bi Ihura, Kotiba ni'ihairo bitakero narubai bina, boha'ara kero narubai binatekeroma orurante tubua narorabe. ¹² Mintumanta bika Oribi Ai'ina'ahi, orurante Jerusaremini tubura, bira nanare Oribi ai'ina bano Jerusaremi aumanto baimantara ti. ¹³ Bika bira'a ani obarai'abi, bika baria nabura'ira bika orubura. Bika autu baireba, Pitaba, Joniba, Jemisiba, Enturuba, Pilipiba, Tomasiba, Botolomiuba, Matiuba, Jemisiba Alpiusira ma'u bano ibo, Saiminiba Selotini haina bainti bano ibo Judasiba Jemisira ma'u bano, eka bika baura. ¹⁴ Bika eka ruba'uabi baiha bo'a bata nunabu tiha baura, nahenti haika bata Mariaba Ihura bira nora batake bira atabakauka baura. ¹⁵ Bi entara Pitaba mara'ura ututa baintika abutana himpiro, bika 120 bainti baubo biba tiharo, ¹⁶ Atabakaukabe, bira ko'ehabe, kairo Kotira uba aratanu'i bairaba a'ira'a obarai'iaire, haru Aiho Bainti bano Debitira no'a hiro Judasirara, biba tiharo, ma baintibama bainti numi'airama Ihura uata barebarabe tura. ¹⁷ Tabae tinabu antu bano baiharo tinabu kai'a bo'arake baranarobe." ¹⁸ ( Bate bi baintiba mone nohairo bata ko'ai'akero kia ko'e'i okarara batakero baraiba, nantiara biba araihairo bataini hi'irubaro, bira auha bano rape bubaro bira arara bano a'ini aitarora. ¹⁹ Eka bainti nahenti Jerusaremini bariaka bihaikara tababo, bika uba tiaka bata iriabo, bika bi batara autureha tiha, "Akeldamabe tura," bi ubara okara baireba, "nare hi'irura'abe tura." ) ²⁰ "Kotira uba bano ihi aratanu'ira baintekero, a'ira kairo bibira ekahika bano tai'a buaire, kia bo bainti kairo bariaire. Ekara bo bainti banoma bira nora autu baranarobe, ²¹ Bira ko'ehabe, bo bainti bano eka enta tinabu hampata baira, biba Nora Ihu Karaitibabe naima tinabu abuta baibo, ²² Joniba namai a'umitaitaira'a hiro aniro Kotiba bira tinabu'ihairo bitaira, biba nai utiro uri himpuaina birara'i tibaura." ²³ Bika tara bainti bara himpite, Josepirara Basabasirabe ti bira bo autuma Jastusirabe ti bata Matiasira bata. ²⁴ Bika nubu'iha tiha, Are Nora banobe ti, "are eka bainti nahenti auha tabaro ti, are bikahanta ihaira bora a'ira'a barakairo aitaraire ti. ²⁵ Bika Judasira batuka bare aposol kai'a barate ti. Biba a'irakero nai ma'a bairebama bibo." ²⁶ Mintumanta bika mintahika a'uke bikahanta ihairo tabae bi kai'ara baraina, Bika Matiasira bara himpike tiha, bibama 11-kai'a bainti nabu batakero kai'a bara'iro bura.