¹ Te Jonika iata bainti te ma arara araruake ti ko'e atabakara Kaiusira amitauro, tarae te bo'ake antu'aru narabe. ² Ko'e atabakao te nunabu iha are eka hika'a ko'ebi baiha kia robara bata barairo ai mara'ura bano bata ko'ebiro bariaire ti. ³ Te bo'ake uahaunabe atabakauka ani ai ko'e okara biri tiamanta, are abu abu abira nuana okarara tiamanta. ⁴ Ti uahara hikabano kia bo uhara hika bo'ara bairabe, te irura ti baintiti u'a okara'i nii bariamanta. ⁵ Ko'e atabakao,are u'ai akera arara amihama atabakauka kaini bata hinikika abutana bariakani bata kai'a bare bariaro, ⁶ taukae ai ko'e okara tiba o'ai'ake mono'ira bariakara antu'ari bariana. Are u'a okara minti hama bika ntita barera Kotiba antu'ari arara'ama bibariaro. ⁷ Bira nanare, bika Nora autu'ahai a'ini'ama buabo, kiama bika bainti nahenti kia Juda batanaka iahikara barabo. ⁸ Minti'e tenabu boha arina okarara'i bi bainti nahenti kaini mintiha, tenabu u'a uba kai'a bainti bariare. ⁹ Te ara araruake mono'i bariaka nimi taunarabe , ibo Diotorepasiba, biba bika bauni'a birare tiro, kia tinabu bitatarae. ¹⁰ Minti'e te uri eka okara biba minti baina te ko'ekema tabarabe, biba kia koei ubara tinabuni tikaina. Biba kiama bi okarara'ata mpi'abibo, mintiboma biba kiama nai atabakauka ntitakero ko'e'ibo. Taukae bika bitare kiakara bata kiabe tibakero, mono'i bariaka bata a'ira aru beba kaibo, ¹¹ Ko'e atabakao, ora okara are kia abatane, mintira are ko'e okara abatane. bainti tabae ko'e okara minti bairaba, biba Koti bibama baibo, tabae ora okara minti baiba kiama Kotira tabaibo. ¹² Eka mara'ura utua bainti nahentika Demtiriasi raini ko'e ubama tiabo, bika tiba o'ai'ake mintima tiabo. Tenabu bata bira tabauro, are tabane tenabu tunara bira u'ai'ama ibo. ¹³ Te oora hikama ai ararua mitaina baibo, ibaroma kiama eka bi haikara ara'ira ararua mitauro. ¹⁴ Te aumantoka ai tabare tiha iri baurabe, Te nina biri'i tabeha aikanti uba tirerabe. ¹⁵ Kotira iha'ara auha bano ai batake bariaire. Atabakauka ariara kuari abema tiabo. Te kuari'abe tiaina atabakauka bohau bohau batama tiba nimiane.