¹ Mago sabati-le Jesu uno mago Farisi waya aite agenopa vega-mo nopi nesaya ne.Hige-a yagai-a alagepa hutae. ² Mago aiya aya apafule-ni vega Jesu haopa-le maiye. ³ Jesu ma-ke huno apafige,lo-te afi waya-e Farisi waya-e."Sabati-le kanale kari waya alita alagepa hugupi osugune?" ⁴ Hiyana apaga ke anona-a mago ke osae.Higeno Jesu awaleno aga kari-a alino alagepa hute-teno atale geno viye. ⁵ Jesu ma-ke huno hapa-paiye,"Mago tapi-moa mafane-ao pulmakau-a ani keri-fi Sabati-le asagau-no aisiyana,malage-a apawale-ta malaga osuga-fiye?" ⁶ Apaga mani ke-le ke anona-a haopaiye. ⁷ Jesu apage-gea mani nesaya-te ae,apaga ala waya-ai sia-le mai-gesa.Jesu ma-ke huno alino apaya hiye, ⁸ Inagi mago vega moa ve a apaya alia hapai-sa nesaya-te eno hinage-gaemo,gaga ala waya-ai sia-le omaiyo.Naya fene hawigu mago ala vega-e ani nesaya-te ke nehu yae-nagi. ⁹ Ani vega moa lanaga ke hinageta eta-nae-mo,aga ma-ke huno hapai-giye,'Gaga hogote sia ma-vega amiyo.Gaga kawagage husi gega apamelaga faimi-gane. ¹⁰ Inagi mago vega moa nesaya negau ae huno apa-aisi gegae-mo,gaga uga agame-laga maiyo.Aga gage-teno,ma-ke huno hapai-giye,'Waya-niye,gaga heti-ga uga hogote sia-le faimiyo.Inagi gagai-e nesaya nesa waya-mogi gagi ala kamigae. ¹¹ Apagi alia haisa waya-na,God-ti apawa-leno afaga hugiye.Hiyana afaga haya wayana God-ti apawale-no anaga nehiye." ¹² Jesu na nesaya-te ke higeno e vega ma-ke huno hapaiye,Inagi gaga nesaya talo humale gae-mo,waya-gagi gogana gamogi,kola-ga,ku-gagemi ya hane-tenesi vega ke hugea omeyo,hawigu gaga ani ya hua ke hua nesaya-gale anona-a kami-gae. ¹³ Inagi ala nesaya lalo hugae-mo,kagemi ya-api ohane-nesi waya apa aiyo,apiya apaya haviya hunesi ve ane apa aiyo,ke olagau-a apau-laga fali-gae nesi ve ane ke huwo. ¹⁴ Inani agufa ve ane mogi nesaya anona-a ogami-gae.Hiyana God-ti asumi hugate-gaiye.God-ti ani nesaya anona-a kami-giye,fatago ve ane matmat-ti fati hetisa afina." ¹⁵ Mago-apimo-a Jesu-e fai-mino nesaya ne vega moa mani ke afi-teno,Jesu na ma-ke huno hapaiye,"Hai ve ane mogi God-ti kumate nesaya ne aemo apaga amuse hugae." ¹⁶ Inagi Jesu ma-ke huno hapaiye,Mago vega moa ala nesaya lalo huma-leno hailaga ve ane ani nesaya-te apa-aiye. ¹⁷ Nesaya ne ya higeno,aliya waya-a alino apate ke huni waya-aitaga apatale-gea wae.Hapa-paino-aemo nesaya ne ya higi eyo hiye. ¹⁸ Mani aliya vega moa uno apa-aiya na mugi amogi ome-gaune hae.Mago vega moa ma-ke hiye,Naga mago mopa miya huwana-gena una agege-suwe.Ome-gauwe,nahu huwe. ¹⁹ Mago vega moa ma-ke hiye,Naga faif[5]aliya bulmakau miya huwana-gena,una aliya alina apamina agegauwe.Nahu huwe,omegauwe. ²⁰ Inagi mago vega moa ma-ke hiye,Meni-to a alu-wana gena omegauwe. ²¹ "Ani aliya vega moa eno Oyafa-a mugi ke hapaiye.No-mo afo-amoa haivai-teno aliya vega-a ma-ke huno hapaiye,Malage uga taun kate kagemi ya api ohane-nesi waya,apaiya apaya haviya hunesi waya,apau-laga apogae nesi waya-e ke nosa waya apawa-lega eno." Aliya vega-a uno oyafa-amo hapai ya hiye.Henaga eno ma-ke ²² huno hapaiye,Oyafae,aliya namina yamo ago ali-malowe.Hiyana nona hawai-oteniye." ²³ Oyafa moa aliya vega-a ma-ke huno hapaiye,"Gaga ala kate nagi ala guma mo malaga ke logiya ke hapapai-gea hai-eyo,ea noni fai-hawai teyo. ²⁴ Naga lama-ke hapauwe,Naga nesaya neyo huna ke hu waya-na nagai nesaya moa nea afio-gegae." ²⁵ Hailaga ve ane Jesu e wae.Jesu maino hanaga-lino ma-ke huno hapa-paiye, ²⁶ Inagi mago vega moa nagai taga eno ae mo,ita afo amogi, ane mafane agi,gogana asa amogi,agai a-e kame huwo apatesi mona,inagi aga nagame mafane omai-giye. ²⁷ Inagi mago vega moa yofo yosa-a alino nagame osu-siyana,aga nagame mafane omai-giye. ²⁸ Mago tapi moa kawa yagai-a mai no gige huno aemo,hogote ya-a aga maineno namagi mone moa mani no gina hano hugufi ya-a agetafo hugiye. ²⁹ Hawigu ina ya osu neno simeni hute-no ani no kino hano osu-sigi,mugi waya mogi mani no age-tea agame-laga ke hugae. ³⁰ Ma-ke hugae,'vega moa no ayamufa ya hiyana gino hano osiye.' ³¹ Inagi mago sauwe wega moa mago sauwe vega-e kame hugemo,inagi mai-neno agetafo hino.Ten tausen kaweta waya agai-taga mai-nageno mago sauwe vega laga twenti tausen kaweta waya kame huno apagase gai-fi oapagase gai-fi ya-a agetafo hino. ³² Inagi kanale osunesi yana,mani kame waya afagite maine-sa-ae,mago waya alino apatale nagea ua kege hute-a kame osua apaipa falu ya alia eyo. ³³ Ani ya huno,inagi mago tapi moa mugi ya-a alino oatale siyana,aga nagame mafane omai giye. ³⁴ Jesu ke mago-e hiye,"sole alagepa yane,inagi ani sole moa haga-a atale siyana,halate hai ya huno haga-a ali giye? ³⁵ Inani agufa sole mopafi alagepa osuniye,inagi kao mo aifa-e alia magopi hu yate.Apaga mani sole alia yaga au-taleyo.Agesa hane-nesi vega moa mani ke afino."