¹ Jisasi weni Kocti wen Afo pukintinkena ukucka ankani, Pori wenic aposoro wemi. Wantayic yokarika ewanai. ² Mana wayani ten tifac tionami Garesiac mam mackinkaci weyouni tanyinkecumpe. ³ Awacwac namac nanayin namaci Mayau Tifo Kocti namac Jisasi Iyeno, ⁴ ikeunamatic manda andakinkena tiwikarani Koctinic ayini awakuremi kumemoni. ⁵ Umacden yamuci wen awici yanikac ukano. Pukawe. ⁶ Jisasi wenic awacwacponi ikemi yiwicdaci wemi ececi akakaukami ena wayayuckaci yinduni munkureci wekonani anon tinduci recumpe. ⁷ Ena mam wayani wenowa tekauno, kamore waintauci Jisasin awayani manda tiyimiric uraka umam maranakonani tecumpe. ⁸ Mayauyafi, inarumpatena ensorofi wani tiyimekuna wayani wenin ecena ena waya tiyimiremi ika makusinaci wino. ⁹ Wani tiyimirukeci make yewekeci tiyimeko, "Wani marekom wayani wenimi ecemi ena waya tiyimemi weni ika makusinaci wino." ¹⁰ Teni make Koctinic yokaraci marekafuno, wantaic yokaraci marekafuno. Wanta amoyino yokam mareci Jisasinic yokar inta iyem wecumpe. ¹¹ Tifac onano, indekowanumpe, mana wayani wanta awayayaino. ¹² Wantawa tisimirena timenaino. Jisasi wenafoni afotafic usinkemino. ¹³ Judauyic mam wayani awakureci Koctin awakurewayouni anom mandaic uyinke wakunawani, ikeni indekomino. ¹⁴ Teni Judauyic mam wayasimi, tikona waintaukaci acnaric ukeci wecmokunamino. Micnimukanici ten tifonanyic mam wayani anon tifonka yinkec mokunamino. ¹⁵ Afo Kocti wenic awacwacponi ten tinon arapimi tiwic daremi demoni. ¹⁶ Micnuremi wen Akaci tenkimi afotafic urukaci, mapac iniya waintauci wayani tiyimentecumpe. Teni anasi wantakaci iyewaci yindaecumpe. ¹⁷ Yenaremi aposoroc meyousomi Jerusarempaci iyewaci urecumpe. Arabiaci oreci owekeci Damaskasic yecumpe. ¹⁸ Kamore orende acnaimpaci Sefasinan indicirani Jerusarempac undeci wen namaci 15 nurami wen namaci wecmokunamino. ¹⁹ Ena aposorouc yonec mokunamifo, Jemsi Iyenon afac manan onecmokunami. ²⁰ Mana wayani tarekunai Koctin okankac ikemi iyewaci umac tiyinkecumpe. ²¹ Micnureci Siriac namac Sirisiac makafac wecmokunami. ²² Judiaci weni Jisasinkaci manteyom mam mackinkackenuni iyewaci tenani indikenoyo. ²³ Afo yeni mana wayani indikenoyo, "Ikeunamaci tinduni munkekunawani mandaic usinkaremi anankayirani ewani, weni make mini wani wayani tiyimemino." ²⁴ Teni micnekunafoni Koctin awici yanicenono.