¹ Isu va kegaye utae tuolupu wa eliya ndagara waka, pigo igeva kanate gana esegi enawa imitaye kamba lataga spiriti oma avovola eliya pikiveka, paviyama agalu vata viyoma, piyavute kaisa aiyena ginape toma toma aiyena ivikibi kinapa aogi poitate viyoma. ² Pigo mapa tuwolupu wa ndakarami igeye. Amalusa yagarava Pitaye, (to ka agiwapa Saimoni ) to kapa Anduru ye anandova Jemisi ge Joni anando Sebedi ndagara lala. ³ Pilipi ya, Batalomi ya, Tomasi ya, Matiyu takisi mena ndagara paipa, Jemisi Alfias ndagara, Tadiasi. ⁴ Saimoni Jiloti isa Judas Isikerioti kevaya aindi Isu avama agama gina iyapi imiti ndagara. ⁵ Isu va isagataye tuwolupu wa ngeliya ndakara wa. Aeva poiya kite oimitaye,'' Tigeva a waiyoma ka mbala aveisa gina mikivetiva piya vute tigeva a waiyo tave teseni vindi Sameriya iva. ⁶ Piya viyo tigeva waiyo sipsipi ivala vuwanda pindi Israeli. ⁷ Tige wandilipa, pagusama piya iyo, kindomu va inatisa gumati sava ago amba wakala sawaema. ⁸ Aogima kava itaiyo aiyena ginapa, iyoga itaiyo puwakive kinapa, aogi poitiayo alepa aiyena ivikibi kinapa, kamba lataga spiriti minda kivi kinapa agaluva igosiyo. Tigeva ugamba meye ndanaya monepa a mema ugamba poitaiyo. ⁹ Tigeva a mete waiyo goliyo silivayo mone nomava aini pausili pindiva. ¹⁰ Tigeva a mete waiyo tikava tasa gupe o kaisa tiyu tasa enageva, o tigisali vuli kenana geva a pulite asa pusagi kena geva a mete waiyo, pipa nana eliya ndagara mekiye naninda eliya pikivi kava. ¹¹ Aye tave tesenili yo o aemba livaya wakivepa, aguyosa gaiyo kevaya kanarapa tava vikiyema, ago tiva mete wakilipa pavi ndama pindi mima nagali gaite waiyo. ¹² Pigo tige ka ndama pindi uvasi ndilipa, aya veyema uma imeiyo pindama pindi minda kive kinakava. ¹³ Pigo kana nama pindi i-igina ka ndama pindi nama ngama ano ava kanarane igilipa, kanara nema iyumava akusa itaiyo,pigoya ige kamba aogima akusa tita kilipa, membe liyo tiyuma akusa itakive ndanava. ¹⁴ Pigo pi kaga kina kegivaya kamba tivamete wakive kinano o kamba avikive kamana igina, pigo tige wakena vundilipa pi teseni yo namano mava tigisa lisa ini asali vugaite waiyo. ¹⁵ Tagamba kamana taka ulimuwe tigeka, pi tave teseni yo pindama nomava Anutu koti lapa, tave gunda laka mekiveye tave teseni oma meti kundava agasima Sodomu Gomora. ¹⁶ Agaiyo, nageva tisaguawa tigepa kavu gala oma awamu pindi sipsipi kandama . Piya vuwa tigeva kuya oma visa puma napiena watasa pagogo nama nasima anaga kuyenava pugagaya, paviyama kavala ngama kamba esegi enalova pugagaya suma. ¹⁷ Tigeva aogima kavi-iyo wawayaka igeva tivama kaunsole, kinata melitama tigilisama tiyegu kivene alotu nama ngwi pindi. Pavi nagetaka, aindiva tivamete tigepa gavamani ginatape wakivene. ¹⁸ Paviyama tigekapa piya enava nage nagelaka uma ikivene, mo kaga aveisa gina kegava. ¹⁹ Pigo tige tivama wasana ayapi melita igilipa, tigeva a napi napa vuwaiyo nana gamana uma ukune aya vukune mava. Pipa nana viemaye, piya gamana i kena yagava memita kamanapa kawamuta kanakivi kana ikivena. ²⁰ Pipa nana viemaye,kamba tigelipa ikiveye, piya viki vepa spiriti tivalimba nda oma aewa pagusama tiwamu tapa ikiye. ²¹ Pama agando anandopa avama agama ginama aya pindi metakana ayegukiye, piya vekina avawambava me yagara wapa paviya vekana, me yagara wambava ano avapa paviyama agama votakana a ayegu ayeguma pulita wakiveyema. ²² Kaga kina wawaya miva ikasiya vulita kivine nana viema nage nageva tige pindi mikivi kaga gana pika vikiveye.Piya vikibi mbapa kegavaya asima esegi vikivembe kava aingagogo yagava asiasima mikenana mekivene. ²³ Pigo ige kamba laga vulita kivekava pi tave teseni guma pindi,tiyegaka waiyo to tave teseni gumati, nana viemaye pipa taga kamana taka ulimuwe tige kava, wama ndagarava kanaki vipa tigeva kaga tavepe teseni vindi Israeliva kamba waye ndigina vikiye. ²⁴ Ka eliya ndagara mava aeva poyaki gagai ndagara mapa kamba asugasima mindiye, Pigoya ka kagove yagara malova kamba aeva wambapa paviyama kamba asugasima mite vundiye. ²⁵ Eliya ndagara mava aeva ago kanara poyaki gagai ndagarama pugagai ndanava aeva uga vikiye, Kagove yagara malova aeva wamba pugagai ngeliya tova aeva uga vikiye pigoya kana nama ngoma avawambaka Belsebuliye agi omita kive kava, pipa kamba laga laka puwakiye piya magi omiki vekaba kana pindama pindi migage kinaka. ²⁶ Piya viya tigeva igekava a tiyekuru viyo, pipa nana viemaye, ka ena kali votama kaka atama mi-i ndanava kamba kaka wakiye,pi nanavaya kakama aseka puma migaagai ndanava kamba laka kaka wakiye. ²⁷ Nana gamana paya avigai takive aseka taka, pi kamanapa to ala tova ikiveye, pi nana gamana paya avitepa ayoma ovina suma ulite, tigeva pi kamanapa melite gili nama atoli asu mima pagusa gasiyo. ²⁸ A tiyekuru viyo kaga kina kevaya matiyu tiyegu kive kina kava, pigoya tige tiyekuru vikibe ndagarava kevaya matauke tama ndagarage yaku pindi tatakena yagaraga tiyekuru viyo. ²⁹ Igeva tara amana kavala ando lalava kamba ka amana mbone ando gava aisaga kiye? Pigoya kamba ka ma kavala ando ndo vindisava kamba vuwakiye avawamba kamba aganda kanava. ³⁰ Pigoya tivalimba ago isu gasaye, kaga tinoviya tinonga yambuli mindipa. ³¹ Pikava tigeva a tiyekuru viyo, pipa nana viemaye tigeva inata age iwanda ena gandama mindaya, agasima pi amana kavala ando ndova. ³² Piya vikana kaga kina kevaya pagusama nageka wawayama aola ikivipa, nage lova paviyama navanemba aolapa aye ageva mema pagusa kuwe, kevaya malo inatisa gumati mindi. ³³ Pigoya naye nage mema kaka kivipa wawayami iyola, nage lova paviyama ige igelova mema navanemba aolapa kaka kuwe inatisa gumati mindi ndagara matapa. ³⁴ Tigeva piyambapa a napi-iyo mamba vindiba tauma akusama mikenana mete lumitaye mava, nageva tiyuma akusama mikena nava kamba mete luminduwe, pigoya nageva painati yogi mete lumutuwe. ³⁵ Nage tumitopa yagara wamba avawamba agama ena votakena lumutuwe, piya vekana alaga wambava anowamba tova agama votakana, pigo anatuva ayenda wapa agama votaki yema. ³⁶ Katu ngomava ka ndama pindisa agama agama vuma mikive yema. ³⁷ Wa yagarama kevaya anowamba ke avawamba kega meva puma avuwa kivipa, ageva nagenda eliya kinandepa kamba mikiye, pigoya paviyama ka yagarama masi yagara waka yo o alaga waka yoma meva puma avuwa tegina nage nagasima avuwa kivikava , aeva kamba eliya kinandepa mikiye. ³⁸ Ka yagarama kevaya alapa yawa kamba ayesaga mete amba nagalu vakibipa, aeva kamba eliya kinandepa mikiye. ³⁹ Pigoya ka yagarama aungaka avuwama aogi ena mana pota kivipa, aungapa megai kiye aindiva. Pigoya ka yagara nage ngeliya puta nasikiviti aunga megai kivipa, aindiva aungapa umekiye. ⁴⁰ Ka yagarama tivamete namanga pindi wakivipa, nage navabute wakiye,pigoya pi ka yagarama nava vikibi kava, kevaya naisagati ndagara malo ava vulite wakiye. ⁴¹ Ka kevaya profeti gina avamete wakivipa nama ngati, mapa profeti kinane utegina, profeti kinama kutapa age mekiye. Ka aogi yagara wapa aogi vuwanda yagara yeute avamete wakivipa, pipa nana viemaye ageva aogi vuwanda yagara yema vikiye, pigoya paviyama age kuta tova aogi vuwanda yagara mandava age mekiye. ⁴² Kevaya ma amana ndakara ndo ndo vindisa ka kapu tani wani amekana nakivipa, taga kamana ulimuwe, kamba ka aukwai pi kuta ngapa uma lumuwakiye."