¹ Ene ngoli ove, ghu ghambe evi vyakuliyendo nolirongo lya hungamo. ² Ronga vakafumu vova kondi vadire vikorwita, vakwate dimutjima, vakare vakukuyika, vakore mulipuro namusihoro namulididimiko. ³ Ronga vawolikadi wovakadi, navo uvatantere asi vakare vakadidjuni, moomu vavya wapera vapongoki, vasa kara vokukavauka ndi vomakurunwa, nani ngoli vakare varongi enevi vyoviwa, ⁴ no kudeura vakadona vahore vavya vavo no kuhora vana vavo, ⁵ vakare vanamanguruka, vokuruwana nawa pamapata ghavo,no kulimburukwa kuva vya vavo, mposi nkango da Karunga kapisi vadiswaure. ⁶ Shimpe nka, mukorangede vamati varuwanite marutu ghavo nawa. ⁷ Ove ko anaumoye muvininke navintje kara sihonena soviruwana vyoviwa. muvirongwa vyoye, neyeda likene, lyalyo lihungame. ⁸ nombudi yoye yihungame yitwe vantu kudimutjima, no nkore doye dife ntjoni vivalimbe kututamba. ⁹ Korangeda vakareli vayuvhite vapongoki vavo vava hafite mwanavintje, kapisi vakare nomutomonono, ¹⁰ ndi vasa vaka kwavo, ngoli vamoneke kehe pano asi vavo vawa kuvahuguvara, varupwite mwanavintje lirongo lya Karunga, muyowoli wetu. ¹¹ Ufenkenda waKarunga kwauhorwera uyite liparu kuvantu navantje. ¹² Vavo kuturonga asi tusuve kudina Karunga no madowo ghopaudjuni uno,atwe tu karere Karunga muundjuni uno. ¹³ siruwo sino tuna kara mulitaterero nomulihuguvaro lya liparu nalimoneko lyouyerere wa Karunga wetu gho munene na muyowoli wetu Jesus Kristus, eli twahuguvara. ¹⁴ Uye kwa kutapa murwetu atuparure mumaundjoni ghetu, atu kuse tukare muhoko wamwene ghomupampi mukurughana vyoviwa. ¹⁵ Uronge vininke vi, uvakorangede ,okuno ghu va tughumukire mukondo dopa umpititi woye. Nokuvakengererasi vakudine.