¹ Yakobo muina ngunu mua bora Ndjambe ndo kumu Yezu Kristu, u marondjo ishanga ando mape, mana ma pandjisha ndak bu wimbishi. ² Bana ba maya, wosh'anana makikiri ma makimi mi mapu ndo mapua maka buiwire ngo rueye bunyaka bua yemene, ³ Bu yebe ande makikiri mi maweshere mini maka buyeke bunono. ⁴ Kek'ake mawindjuwu ma nteme miyemeshe makerere ma manda, keke buara bayoro ndo buara bayemene buik'a buiki, ishini buini ubere shoto ikete a imoko bi. ⁵ Mbe ke moto u ndenge a yini ashoto buanya, yi burombo u boro Ndjambe, yon'ameke yeke ba bakimi ando nteme moko, ndo ubere rende bube bua moto yon'amaka nombo, ndo yi nyenyeka bundu. ⁶ Kek'ake yi bu rombo a maweshere, u bere shiki nyana, ishin'ande ndjua nkimi antshiki nyana yiyi ngo ipakara ra mashe ma ndjara ndja inene' ramiki ba tindiyi ubora pungu keke ri nyu-nyungu umbete shashikimi. ⁷ Moto yono areke a boko buany'ande yi wowosho ikete u bora Kumu. ⁸ Moto ndjua ngowo yiyi iyene akapa ndjua shumu u mboko shanda sha shikimi. ⁹ Keke mua maye yone ndjua poto , yi yatonosho u matotoro mande. ¹⁰ Ndo yono muini biroko, yi ya tonosho u makitishi manda, shin'ande ishashamba ngo itendere ri bushobo. ¹¹ Shin'ande itanga a mpunuku rindi ndo muanya mua munono muwomosho nenge, itendere ribuaka ndo rishotosho busheke bua rinde. Ipu imoko, muini biroko ibua buaka u mingunu nyi biroko djande. ¹² Bunyaka u moto yono antshiki bunono u makikiri, shina ambishi ba u umane u nkiki,yi wowosho poko ndja monyo, ini Ndjambe a raka yande u bana bangondo. ¹³ Areke moto, a meke bande aror'ande:" Ndjambe a mbeke. Shin'ande Ndjambe ba kapa ruene u meke u bube. Ndo yand'aki ka ntsheke we meke moto bi. ¹⁴ Kek'ake moto ndjua nkimi ba meke meke u mboka nying'ande ndja ibe, yindi ya ka nana ndo ya ku muishi. ¹⁵ Ambish'ina nyingi ini a puru indi iboto bube, ndo bube a toro bundu u ma manasha, bu boto iwa. ¹⁶ Areke bu ya rimbi, bana bamaye bi ruwondo. ¹⁷ Ikapa ra rikimi ra risheke ndo muambe mua bara bara dja miki punu ku riki, u bora Tata ndjua nyanya, u yanda yono ibere wiyi ando mabarama mbe ngo irurumbu ra mereke barama. ¹⁸ Ndjambe u ruwondo ruande a tshuboto, u rototo rua bara bara shin'ande tshuara bi bukoto u ndjini dja wanga yande. ¹⁹ Yeb'anana, rueyi runu buinu bana ba maye bi ruwondo, ande moto ndjua nkimi yara a mawokoro ma buasha, reke yara mbanga shi toto, ndo reke awata kabua mbanga a mbanga. ²⁰ Shin'ande kabua sha bora moto kasha meke yemeshe rongo bua Ndjambe. ²¹ Iraki rini teya nana mbinde sha shikimi ndo bu bube bua shamba, buwosho rutoto ando u yakitiyi runu rua wono bande u ndenga yini ndo rua nyemene uwondjoro nyonyo nyinu. ²² Buar'anana bakere rutoto, areke buara pa ba woko bi, u ya rimbi buin'amene. ²³ Shin'ande mbe moto a woko rutoto, ndo a bere wara nkere a runde, yiyi ngo moto yono amaka ya rende bosho buanda ipu ra bundu u rumone. ²⁴ Ndo ke amana yanda ya rende, kek'anana aye yande iwu pimbi mun'anana ipu ri yande. ²⁵ Kek'ake yono yi rende mishi nkendje mua musheke, nkendje mu mawarara, ndo amaka ya yeke buika buiki, u bere wara ngoko djua iwu pimbi, kek'ake a maka ya shiki u neme, yono ngowo yak'wara a bunyaka u ngunu muande. ²⁶ Mbe moto aboko buany'ande yi muini Ndjambe, mbe abere rondo runeme ruanda, kek'ake animbiki nteme muande, bu muina ndjambe bua moto yono buiyi ngona ngono. ²⁷ Bu muina ndjambe bua busheke ndo bu bere wiyi a itobo, u bosho bua Ndjambe tata, buiyi ukereshe bana ba mboro, ba maya bana ba wushu barungu u kata mitanda nya bande, ndo u yarondo u mbindi sha shina mane.