¹ Aike omagaro itingomipage amoreosati timatsi antatijanta Joraran aisati itingomipage ira cananeosati timatsi kara angaaregë Meriteranio ikemaigabakeri iraTosorintsi yobiriatero nija Joraran irooti imontiaiganaka ira israeritajegi, kara isankanekë itsorogasantaiganake teni ingatsimabintsatanae kara igisabakagaigari, irironta timagaitsira israeritajegi kantero. ² Kara ikankeri Josue Tosorintsi: Pobetsike koshiro mopëminta pitotagëtiri omasi itegi sëraripage israeritajegi. ³ Aro Josue yobetsikë koshiro mopëminta aro itotagekeri omasi itegi omagaro israeritajegi kara anchatosi ojita Ararot. ⁴ Aro imonkero Josue itotagekeri omasi itegi arosata sotogëtanaigimi kara Egipitokë. Ira sotogëganakegitsi kara Egipitokë aganipokipage ikamageke. ⁵ Aro antagaisati sëraripage itotagekeri omasi itegi irari ira janeki, irirai tsomaacha aganipogipage teni iritotaitiri omasi itegi. ⁶ Aro poeboro israeritajegi yanëtaigai 40 osarini kara saagiteri. Aike ira sërarijegi antobaganari sotoganaigitsi Egipitokë itsonka ikamake, tenta iromonkaratiroti ora ikantiri Tosorintsi. Tosorintsi ikantasantëri kero paretaro ora kibatsi ikantabetanaimi picharine, aiti kibatsi, kara inasanti irichi, aisati ichirone eiroto. ⁷ Ira itomintaiganakara iriro arekimarone, aronta ikanke Tosorintsi, ira Josue aro itotagekeri imasitegi terainta ira itiomijanipage iritotagetiri omasi itegi kara aganipogi abatsi. ⁸ Kara itsonkeri itotagekeri omasi itegi, aro imagoriaigë irooti kara ibegasantaigaa omagaro. ⁹ Aro Tosorintsi ikankeri Josue: Yamai katagiteri aroge naageetajiro ora pomiritsitomokimi kara Egipitokë obirojegi. Aike yarekaro kara ojita Gilgal irooti ojika yamai. ¹⁰ Aike israeritajegi itimaigai kara ojika Gilgal, ikimoseretaige ora Pascuakite pareta 14 katagiteri manchakori chopinigitekai kara itimonomitaigaro ora Jeriko. ¹¹ Kara yogabisaigairo Pascua irooti katagiteri iparintagaro yopëgairo ora pangirintsipage inatsi kibachikai ora pan te ongonagema aisati obengipage omotagaga. ¹² Aro opañaga mana pitsonka arokenta yapëro ora pangiretsipage iyachi kara ojita Canaankë. ¹³ Aro Josue yareserekaro ora Jeriko aro yatianke inetsasantai iniake sërari yatianke arionisati ipogomingiti okibeminta sabiri. Aike Josue iatasikeri ikankeri: obianti nakaratira, obiantiko kisanijintina. ¹⁴ Aike yotabitanairi kagarina; naanti itingomi iromerarooki Tosorintsi. Nipoganta naro yamai, aike Josue yobatigagerokitanaka kibatsikë itsrogatsatasantoberi, ikankeri: jega pikanti natingomi ira nakaratatëgi?. ¹⁵ Aike ira itingomi iromeraroegi Tosorintsi ikankeri Josue: pinotsakiri pisabato pogasega pigitikëra, kara pinasegi, ponatikasegi iroonti saangagiterisonori.