¹ Aike Josoe, itomi Nun, igageri pite sërari kara Sitim iranetsagentai. Iriro ikantaigeri; ''pijaige pinetsgegentiro kebatsi, irontisonori Jerico''. ² Irirojegi isotogaganake yaretaiganaka pongotsigë asi antantero ojita Rahab aito inaiganake. Ikantaigeri itingomi irasi Jerico; ''pinetse, sërarijegi ipokaige inetsentero kebatsi''. ³ Ira itingomi irasi Jerico igagero ora Rahab; ''pomisotogaigeri sërarijegi pokasitemira, ikabongotanëmi, ipogaigini iranetsero agebatsite. ⁴ Aro ora tsinane paganë pite sërari posimanakeri. Ora tsinane okanke; ''jee, ira sërari pokasitenara, teni ragote negaraka ipaniagara. ⁵ Irirojegi jatai narai ochitinegataneri, kara pënibageme osigima timomentotsi. Teni nagote jega iatagai. Ovir, pijate napage pireitagapajimari. ⁶ Karari iroro pagaiganakeri jonoganta pongatsi posimanakeri, kara opobotirori anchasonkoi kara jonokë. ⁷ Aro iro serarijegi yogeitagëri kara abatsike kenacha Jordan. Ora sitegori aroge pasitanaga ira ageatagirira isotogane nabage. ⁸ Iraegi sërarijegi teni irisomae. Kara iroro otëni onoajantiri. ⁹ Ora chinanera ikantaigeri; nigoti naro ira Tosorintsi ipaigëmiro kebatsika aisa ora pitsorogaigira paretatetaigena naro. Aisa timaigatsi yaka aro pitsongaigeri ovirojegi. ¹⁰ Nakemaige, ira tosorintsi yobariatero angaire kirajaro aronta pabisaiganake kara pisotogaiganaji kanta Ejipitoge. Nakemaigë pikantaigërira pitirosati itingomi Amorreos kara pasinigitekë Jordan, Sehon ayke Og, pitaigëra. ¹¹ Tsatimabageri naroegi nakematobaga ora kantenchara, otsorogasantanë nanegëmento aisti nasintsire pitsonganaka ira Tosorintsi irirotake pitasorontsitesonori inatsi jonogë aike asobi kebatsikë. ¹² Yamaika, pingantasantina kara Tosorintsikë, nokomeitomotaigimi ovirojegi nagaganitaigëmi, aisa ovirojegi kaninasati pogaigëro ibango apati. Pomena nagontemara aisonorika ¹³ pingabintsaigeri itimomento: irasi apati, inato, najaririegi, nirentojegi antagaisati natimakagira, aisa ovirojegi pingabintsaina nangamakenika. ¹⁴ Ira serarijegi yotabitaiganakeri: "¡aisonori nangantaigero nangabintsaigëmari! Aisonori obirojegi, teni pingengëtinaro ora nakeñira, yamëka'; kara ikanke tosorintsi imaigenaro kebatsi, naroegi nakeankemini aisati nanganinabentasantaigemi obirojegi.'' ¹⁵ Aike iroro pagitaijiri omorokë pongotsi pogeantagari sibitsa. Kara otimiri otantotati ora timagantsi. ¹⁶ Iroro okantaigeri; pijataige anchatosigë posimanaigema iraneigapëmi. Posimanaigema maba katagiteri, iroti iripigaiganajimari ira ageatagimira. Aike pigetaganajiro paboegi.'' ¹⁷ Ira serarijegira ikantaigero; Naroegi kero nakantiro ora nakantaigemira'' obiro, pingantiro basinipagera teninta pinibatagironi. ¹⁸ Naretagëmarotika oka kebatsiga, oviro pigisitikeni arositia manchanginchi kirasitero kara omorogë pobango pagitaginari, popatotaigema omagaro piri, piniro, pijaririegi antagaisa timatsi ibango piri. ¹⁹ pairiraka sotokenchinera sotokë, ingamake irironta koganontakaro kero pogibitaiganakena. Angamaigë teninta angantaigero ora akantaigera. ²⁰ Pinibabenkeroka ora nakantaigiranaro, naroegi teninaninte pigibitagaigenaro ora pigatabetaigënara. ²¹ Rahab potabitëri; ''ora pikankera pingankeroti''. Iroro pobetsataigabajari aike iataigay. Iroro pogisitigapë manchaginchi kirasitero kara omorokë ponganchi. ²² Irirojegi iatage kara anchatosige, maba katagiteri inaigë iroti ipiganagaganajari ogiatagirira. Ira agiatanterira ikogogetabetaigagari teni payro iraneera. ²³ Pitiroti serari ipigaigapaa ikaratagairi Josue, itomi Nun, ikomantagetaigëro ora ikantaigagara. ²⁴ Ikantaigeri Josue; ''Tosorintsi aisonori ipagairo kebatsika. Antagaisatisonori ira timaigatsira itsorogaiga ora akantaigagara.