¹ Wakumbushe kumvwila olamulila na amadango, kuwamvwila nakuwa okonzeka pa mulimo ulionse uweme, ² osatukwana aliyense, osafuna kunyatana, nipo iwani olicefya, nakuonesha ulemu kuli onse. ³ Pakuti nase seo pansita imo tenze tiliye malingalilo wino wino na osamvwila. Tenze osovyewa notolewa wazya kumakumbwilo navotemweshesha. Tenkhala mu viipa nalukumbwa. Tenze aviipa nipo otinkha umo na muyake. ⁴ Koma lusungu lwa Leza mpuzumushi wasu na cinthemwa cake kuwanthu ceonekela kuwanthu, ⁵ cenze lini cikomo ca milimo ituwa itecita, koma cikomo ca lusungu lwake kuti tipuzumusyiwe, etipuzumusya kupitila mukuti sambisha kwa kuvyalikwa kwa lomba na kutisuka kwa mzimu mutuwa, ⁶ Leza weciti pozela kupitila mu mpuzumushi wasu Yeso Khristu, ⁷ koma kuti mwakulungamishiwa na cawanzi cake, tingawe apokeshi na colindila ciyake ca moyo wosasila. ⁸ Awa malizuniwa cendi.Nufuna mweo mukonkhomezye pa ivi vinthu kuti awo amene ocetekela Leza angawe achelu kuziika mumilimo iweme. Ivi vinthu niviweme nipo vyosewenzeshewa na aliyense. ⁹ Lomba pewani kusushana kwa tyala tyala na kunena zovyalikwa kwa makolo nakusamvwana nakukangana pa ivyo vinthu visayavya nipo viliye milimo. ¹⁰ Kanani aliyense uyo oleta kumwazyikana pakati panu, pakafume umo kano awili omucenjezyani, ¹¹ poziwa kuti munthu otetyo wafuma mnjila iweme nipo wa cimwa na kuziyeluzya yeka. ¹² Nikayo tuma Artema kano Tikiko kuli weo,ukafulumile nakuza kuli neo ku Nikopoli,kwamene kunalinga kuti nikankhale nsita ya cisanu yukuza. ¹³ Cita vilivyonse vungacite kuti ukatumizye Zena mkulu wa nsakana Apolo,kuti asasobe kanthu. ¹⁴ Wanthu wasu ofunika kusambila kulitwala mu milimo iweeme yamene yuleta vyopangwika wangu wangu,nakuti asankhala osatwala vitwalo. ¹⁵ Onse awo ali na neo okupani moni,muwape moni awo onitemwa mu cicetekelo,ca wanzi ciwe na mweo monse.