¹ Nítorí náà, ẹ̀yin ará mi olùfẹ́ tí ọkàn mi ń ṣe àfẹ́rí, ayọ̀ mi àti adé mi, báyìí ni kí ẹ̀yin dúró ṣinṣin nínú Olúwa, ẹ̀yin ọ̀rẹ́ mi ọ̀wọ́n. ² Mò ń rọ Éúódíà, mo sì ń bẹ Síńtíkè, ẹ ní ọkàn kan náà nínú Olúwa. ³ Bẹ́ẹ̀ sì ni mò ń rọ ìwọ náà pẹ̀lú, alábàáṣiṣẹ́pọ̀ mi tòótọ́: ran àwọn obínrin wọ̀nyí lọ́wọ́. Nítorí wọ́n ṣe làálàá pẹ̀lú mi fún ìtànkálẹ̀ ìhìnrere pẹ̀lú Klẹ́mẹ́ńtì àti àwọn alábàáṣiṣẹ́pọ̀ mi yòókù tí orúkọ wọn wà nínú Ìwé Ìyè Náà. ⁴ Ẹ máa yọ̀ nínú Olúwa nígbàgbogbo. Lẹ́ẹ̀kansíì màá tún sọ pe, ẹ máa yọ̀. ⁵ Ẹ jẹ́ kí ìwàpẹ̀lẹ́ yín di mímọ̀ fún gbogbo ènìyàn. Olúwa wà nítòsí. ⁶ Ẹ má ṣe káyàsókè nítori ohunkóhun. Kàkà bẹ́ẹ̀, nínú àdúrá áti ẹ̀bẹ̀, pẹ̀lú ọpẹ́, ẹ sọ ẹ̀bẹ̀ yín di mímọ̀ fún Ọlọ̀run, ⁷ àlàáfíà Ọlọ́run tí ó tayọ gbogbo òye yíò sì pa àwọn ọkàn àti àwọn èrò yín mọ́ nínú Krístì Jésù. ⁸ Níparí, ẹ̀yin ará mi, àwọn ohunkóhun yówù tí ó jẹ́ òtítọ́, àwọn ohunkóhun yówù tí ó lọ́lá, àwọn ohunkóhun yówù tí ó tọ́, àwọn ohunkóhun yówù tí ó mọ́, àwọn ohunkóhun yówù tí ó wuni, àwọn ohunkóhun yówù tí ó ní ìròyìn rere, bi ohunkóhun bá pegedé, bi ohunkóhun bá yẹ fún ìyìn, ẹ máa ronú lórí àwọn nǹkan wọ̀nyí. ⁹ àwọn nǹkan tí ẹ ti kọ́ tí ẹ sì ti gbà, tí ẹ ti gbọ́ tí ẹ sì ti rí nínúù mi, ẹ máa ṣe àwọn nǹkan wọ̀nyí, àlàáfíà Ọlọ́run yíó sì wá pẹ̀lú yín. ¹⁰ Mo yọ̀ gidigidi nínú Olúwa nítorí nísinsìnyí, lẹ́yìn-ọ̀-rẹyìn, ẹ ti sọ àníyán yín fún mi dọ̀tun. Lóòótọ́ ni ọrọ mí ti ká yín làra tẹ́lẹ, ṣùgbọ́n ẹ kò ní àǹfàní láti ṣe ìrànlọ́wọ́. ¹¹ Èmi kò sọ èyí nítorí pé mo ṣe aláìní. Nítorí mo ti kọ́ láti ní ìtẹ́lọ́rùn nínu ipòkípò tí mo bá wà. ¹² Mo mọ ohun tí ó pè fún láti ṣe àìní, bẹ́ẹ̀ sì ni mo mọ ohun tí ó pè fún láti ní ọ̀pọ̀lọpọ̀. Ní gbogbo ọ̀nà àti nínú ohun gbogbo mo ti kọ́ bí a ṣe ń jẹ àjẹyó tàbí bí a ṣe ń wà lébi, bí a ṣe ń wà nínú ọ̀pọ̀ tàbí bí a ṣe ń ṣe aláìní. ¹³ Mo lè ṣe ohun gbogbo nípasẹ̀ Ẹnití ó fi okun fún mi. ¹⁴ Síbẹ̀síbẹ̀, ẹ ṣe dáadáa láti nawọ́ sí mi nínú ìṣòro mi. ¹⁵ Ẹ̀yin ará Fílípì mọ̀ pé, ní ìbẹ̀rẹ̀ pẹ̀pẹ̀ ìhìnrere, nígbàtí mo kúrò ní Masidóníà, ìjọ kankan kó kún mi lọ́wọ́ níti fífúnni àti gbígbà bíkòṣe ẹ́yin níkan. ¹⁶ Kódà nígbàtí mo wà ní Tẹsalóníka, ẹ fi ìrànwọ́ ráńṣẹ́ láti mójúto àìní mi ju ẹ̀ẹ̀kan lọ. ¹⁷ Kìíṣepé mò ń wá ẹ̀bùn náà. Kàkà bẹ́ẹ̀, mò ń wá àlékún èso fún un yín. ¹⁸ Mo ti gba gbogbo àwọn nǹkan náà, mo sì ní ní ọ̀pọ̀lọpọ̀. Mo ti ní ànító. Èpáfródítu ti fi àwọn nǹkan tí ẹ fi rán an jíṣẹ́ fún mi. Wọ́n jẹ́ ọrẹ olóòórùn-dídùn, tí ó ṣe ìtẹ́wọ́gbà tí ó sì wu Ọlọ́run. ¹⁹ Ọlọ́run mi yíò bá gbogbo àìní yín pàdé ní ìbámu pẹ̀lú ọrọ̀ Rẹ̀ nínú ògo nínú Krístì Jésù. ²⁰ Ǹjẹ́ nísinsìnyí ògo ni fún Ọlọ́run àti Bàbá wa láí àti láíláí. Àmín. ²¹ Ẹ kí olúkúlúkù onígbàgbọ́ nínú Krístì Jésù. Àwọn arákùnrin tí wọ́n wà pẹ̀lú mi ń kí yín. ²² Gbogbo àwọn onígbàgbọ́ níbí ń kí yín, pàápàá jùlọ àwọn ará ilé Késárì. ²³ Kí oore-ọ̀fẹ́ Olúwa Jésu Krístì wà pẹ̀lú ẹ̀mí yín. Àmin.