¹ Loshi ulu ukuyana nakabalilo kala u Helodi umwene akabika inyobe pa bamu babo bakaba muchalichi chilachila ukuti abafunde. ² Akamughogha u Yakobo ubamwabo wa Yohani nichilwilo. ³ Bwo aketa ifi ukuti fyabahobosha abayuda, akendelela ukumupinya u Peteli wepe. Pakaba popakabalilo ka chibama chicho chita nifilungo. ⁴ Bwo amupinya, akamubika mu jele, akamubika muchilundilo cha bamu folo abasilikali ukuti bamuketeleshaghe; akinong'onagha ukuti akise nawe kubandu pala upasaka apululila. ⁵ Po u Peteli akasungiwa mu jele, lole aba muchalichi bakamwiputilagha inyiputo kwa Chala ukushita kuleka. ⁶ Mukati mubushiku bwo u Helodi akaya pakufumia ukuti aye alonhgiwe, u Peteli akaghonagha pakati pabasilikali babili, bwo apinyiwe na bocheni, bwo abalindilili bali pamulyangobakaketeleshanga mujele yoshi. ⁷ Keta, ubandumi wa Chala akamuwonekela papo napapo sona ubwelu bukabala mu jele. akamupalamasha u Peteli palubafu nukumunyamusha sona akati, ''Nyamuka lubilo,'' po abocheni bakasatuka. ⁸ Po uwandumi akayugha akati, ''fwala ulamba nifilato fyako.'' U Peteli akabomba mumwo bakamushikisha. Uwandumi akati kukwake, ''Fwala umuselekesha nukungonga.'' ⁹ Po u Peteli akamukonga uwandumi yula nukufumamwo. umwene atakamanya ukuti fifyo fikabombiwanga nubandumi fikawa fyanaloli. Akinong'ona ukuti akuketa ichilota. ¹⁰ Mwo bendapo pa mulindilili uwakwanda nu wachibili, bakafika pamulya wa fyela ghugho ghukaya mjukaya; ghukighuka ukuti bendepo. Bakafuma nukuya mukaya, po uwandumi akamuleka paponapapo. ¹¹ Bwo u Peteli ashaghania akati, ''ulu namanya ukuti u Chala atumite uwandumi wake nukufumia une mutukono twa Herod, pakugfumila ku fyoshi fifyo abayuda baklalindililagha.'' ¹² Bwo ashaghania ishi, akabuka ku nyumba ya Mele ung'ina wa Yohani, yuyo akwitishiwa ukuti Maliko, kuko abandu abingi bakabunganagha sona nukwiputa. ¹³ Bwo akong'osha pamulyango, uwambombo umulindu yuyo wi akisa pakubighulila. ¹⁴ Bwo aghamanya amashu gha Peteli, nu buhoboke akapotwa ukuti ighule kumulyango; mubuyo bwake, akisa nukukinda ukwingila muchipinda; akaya ayugha ukuti u Peteli imilile pa mulyango. ¹⁵ Po bakayugha kukwake, ''ulunganite.'' Lole akashimikisha ukuti mwomwo shibelile. Bakati, ''Wandumi wake.'' ¹⁶ Lole u Peteli akabukilila ukukong'osha bwo bighula kumulyango bakamuketa nukunyomoka. ¹⁷ U Peteli akababula ukuti bawe mwee nakakono kake, nukubabula mumwo u Chala akamufumikisha ukufuma mujele. Akati, ''Muye muyughe ifindu ifi kwa Yakobo nabo wamwabo.'' Akafumapo nukuya kubuyo ubungi. ¹⁸ Po mwo ishiku lila lyisa, patakabako ukukangana napanandi pakati pabasilikikalipa fifyo fikabombiwa kwa Peteli. ¹⁹ Bwo u Helodi amulondalonda nokumwagha, akabalalusha abalindilili nukulamula ukuti baghoghiwe. Po akilomoka ukufuma ku Yudeya nukuya ku Kayesaleya pakwikala kulakula. ²⁰ Po u Helodi akakala ingani nabandu baku Tayile na Sidoni. Bakabuka ninyinong'ono shimushene kukwake, sona mwo bamulambilisha u Bulasitasi, umwimilili wa mwene, ukuti abafwe, bakasuma umutendele papo akaya kabo kakapokelagha ichakulya ukufuma kukaya ka mwene. ²¹ Pishiku lilyo likabikiwa u Helodi akafwala ifyakufwala ifya bumwene nukwikala pachitengo; akayugha kukwabo. ²² Abandu bakakolela, ''Agha ghogho mashu gha ko chala, ghata gha mundu.'' ²³ Nakalinga ubandumi wa Chala akamukoma, papo atakamupanga ulughindiko u Chala; iminyololo yikamulya nukufwa. ²⁴ Lole ishu lya Chala likabukilila nukubala. ²⁵ Po bwo u Banabasi nu Sauli bamalisha imbombo, bakanyokela ukufuma ku Yelusalemu, bakisa nu Yohani, yuyo akwitishiwa ukuti Maliko.