¹ Elo Yobo wayasukile nokusosa, ² ''Nalelo line ukuilishanya kwandi kwabukali; ukuboko kwandi kuli finine pa mulandu wa mutendp wandi. ³ Yangu, nga ningeshiba uko nkomusangila! Yangu, nganingaya kwakwe! ⁴ Nganingatula ubwafya bwandi kuli wo nokwisusha akanwa kandi kufitala. ⁵ Kufyo ukongasuka nkosambilila amashiwi kabili nkoiluka ifyo ukososa kuii ne. ⁶ Bushe mumaka yakwe yakukulisha wingatalikana nandi? Iyo kuti wangumfwa. ⁷ Kuti watalikanafye nomololoke. Muli ii nshila kuti nalubulwafye nakapingula wandi umuyayaya. ⁸ Mona ndile ku kabanga lubali, lelo taliko, kabili kumasamba, lelo nshikomusanga. ⁹ Kukapinda ka kukulyo, uko akobomba, lelo nshikomumona, kabili kukapinda kakukuso, eko abelama ukuti nimumona. ¹⁰ Lelo walishiba inshila nyenda; ulo wanjesha nkafuma kubati ni golide. ¹¹ Amakasa yandi yaliketwe muntampulo shakwe; Naliba munshila yakwe kabili nshakapilibukemo iyo. ¹² Ntatalukako kufipope fya milomo yakwe; Nalisungilila amashiwi yakukanwa kakwe ukucila umwine wa filyo fyandi. ¹³ Lelo wabafye eka, nani wingamwalula? Ifyo wafwaya, efyo acita. ¹⁴ Lelo ufikilisha ifyo wasosa pali ne; fingi ifyakuba ifi. ¹⁵ Eico, ndatutuma muceni cakwe; ulo natontonkanya pali wo, ndamutina. ¹⁶ Ico Lesa alilengele umutima wandi ukunaka uwamaka yonse alintinishe. ¹⁷ Imfimfi taimpwilishe iyoo, pamulandu wamfimfi yakutikama iifimbile ukumoneka kwa cinso candi.