¹ Moneni fintu Lesa Tata atutemwa, ukutemwa ukwebati tuleitwa abana bakwa Lesa, nefi efintu twaba. Napali uyu mulandu, icalo tacatwishiba, pantu tacamwishiba. ² Mwebatemwikwa, nomba tuli bana bakwa Lesa, nomba tafilati fisokoloke fintu tukaba. Twalishiba ati lintu Yesu akamoneka, tukamupala, pantu tukamumona fintu aba. ³ Onse uwakwata ili subilo ilyabikwa pali ena alaiwamya nga fintu ena aba uwapwililika. ⁴ Onse uubembuka apula mwifunde, pantu ukubembuka ekupula amafunde. ⁵ Mwalishibo kwebati Klistu asokolweke ku kupiita imembu, ico muli ena tamwaba ulubembu. ⁶ Takuli uwikala muli ena uukonkanyapo ukubembuka. Takwaba nangu umo uukonkanyapo ukubembuka lintu amumona nangula lintu amwishiba. ⁷ Mwebana, mwileka umuntu nangu umo amilufye. Uucito bulungami mulungami, nga fintu Klistu abo mulungami. ⁸ Uyo uupanga ulubembu wakwa ciwa, pantu ciwa abembwike ku kwamba. Napalico umwana wakwa Lesa asokolweke, pakwebati engo naula imilimo yakwa ciwa. ⁹ Onse uwafyalwa kuli Lesa takonkanyapo ukubembuka pantu ulubuto lwakwa Lesa lwaba muli ena. Tekuti atwalilile ukubembuka pantu afyalwa kuli Lesa. ¹⁰ Muli ici emusokolokela abana bakwa Lesa naba kwa ciwa: onse uushingapanga fya bulungami tewa kwa Lesa, ninshi tatemwa munyina. ¹¹ Iyi embile intu mwaumfwile kukutampa: Tuletemwana umo no munankwa. ¹² Twiba kwati ni kaini, uwali mubifi uwaipeye na munyina. Cinshi amwipaile? Pantu imilimo yakwe yali ya bubifi neya kwa munyina iya lungama. ¹³ Mwilapapa, mweba munyinane, icalo ngacamipata. ¹⁴ Twalishiba uweba ati twalipita mumfwa no kwingila mu mweo, pantu twalitemwa ba munyinanefwe. Uyo onse uushatemwa munyina abelelela mumfwa. ¹⁵ Onse uwapata munyina ni kepaya. Mwalishiba ukwebati kepaya tekuti akwate umweo wa muyayaya ukuba muli ena. ¹⁶ Napali ici twaishiba kutemwa, pantu Klistu atuulile umweo wakwe pali fwebo. Nafwebo tutuule imyeo yesu kuli ba munyinefwe. ¹⁷ Bushe nomba onse uukwete ifintu pano calo, ngamona munyina alefwaya, nomba akana ukumumfwila uluse, ukutemwa kwakwa Lesa kuti kwaba shani muli ena? ¹⁸ Mwe bana bandi, mwileka icitemwiko cibefye mu mashiwi nangula pa lulimi, lelo mu milimo na mucishinka. ¹⁹ Nipali ici twaishibilo kwebati twafuma ku cishinka, no kulaya imitima yesu ku cinso cakwe. ²⁰ Imitima shesu ngashatuseka, Lesa ali kulisha ukucila imitima yesu, alishiba nefintu fyonse. ²¹ Mwe batemwikwa, imitima yesu ngataitusekele, natukwata isubilo kuli Lesa. ²² Fyonse ifyo tulomba tulapokelela ukufuma kuli ena, pantu tulakonka amafunde yakwe nokucita ifimusekesha. ²³ Aya emafunde yakwe: yantu tufwile twasuminamo mwishina lya mwana wakwe Yesu Klistu nokutemwana umo no munankwe, nga fintu atupeela ili funde. ²⁴ Uusunga amafunde yakwe aba muli ena, na Lesa nao aba muli ena . Nipali ici fwebo, ukupitila mu mupashi untu atupeela.