Kuli kembisha mukalamba. Ukulingana ne ciunda ca “Insebula ya ku maca.” Ulwimbo lwakwa Davidi. ¹ We Lesa wandi, we Lesa wandi, bushe cinshi wandekelesesha? Cinshi watalukila kukungafwa, nangu kufyo ndelilishika? ² We Lesa wandi nakuuta mu nshita yonse iya kasuba ukwabula ukunjasuka, na mu nshita ya bushiku, ndefilwa ukusanga utulo. ³ Lelo iwe uli Wamushilo, uwacindamikwa ku malumbo ya bena Israeli. ⁴ Ifikolwe fyesu fyatetekele muli iwe, fyalikutetekele kabili walefipususha. ⁵ Niwe fyalelililako na iwe wafipususha, na lintu fyalekutetekela tafyalelengwa insoni. ⁶ Nomba ine ndi mwambo nshili muntu, nalisuulwa kabili ndashobaulwa na bantu bonse. ⁷ Bonse abalemona balanseka, balansenteka no kukunta imitwe yabo. ⁸ Balantumfya abati, “Asubila muli Yawe, lekeni eo amupokololeko pantu alimutemwa.” ⁹ Lelo niwe wamfumishe mwifumo muli mayo, no kunenga ukukutetekela na pa nshita naleonka kwibele lyakwa mayo. ¹⁰ Ukufuma ku kufyalwa kwandi niwefye nashintamo umutima, ukutula ku kufyalwa kwandi niwefye Lesa wandi. ¹¹ Wintaluka ico ubwafya buli mupepi, elyo takuli uwakungafwa umbi. ¹² Abalwani bandi nabanshinguluka, kwati ni bacilume wa ŋombe aba ku Bashani. ¹³ Nabasamuna no tunwa nge nkalamo, ishilebuluma kukusantaula. ¹⁴ Ndepongololwa nga menshi, amafupa yandi yalefyutuka mu mfyufyu, no mutima uli nge pula ililesunguluka mu nda yandi. ¹⁵ Akanwa kandi kauma nge ciinga, no lulimi lwandi nalukakatila ku ncendwa, kabili bandalike mu lukungu pamo ngo muntu uufwile. ¹⁶ Imbwa nashinshinguluka, ibumba lya fipondo fya bantu nalishinguluka, nafilasaula iminwe yandi na makasa yandi. ¹⁷ Kuti napenda amafupa yandi yonse ayashele pa mbilibili,abalwani balendolekesha no kulaceceta. ¹⁸ Bayakana insalu shandi, pa mwingila wandi pena bapendwilapo. ¹⁹ Nomba we Yawe wintaluka, we Mpalume yandi ungafweko. ²⁰ Mpokolola ku balefwaya ukunjipaya, pususha umweo wandi ku maka ya mbwa. ²¹ Mpokololako ukufuma ku kanwa ka nkalamo, no kumpususha ukufuma ku nsengo sha mboo! Waŋumfwa no kunjasuka, ²² eico na ine nakulashimikila bamunyinane peshina lyobe, kabili nakulakulumbanya mu lukuta. ²³ Nakulatila, akulumbanyeni Yawe mwe bamutiina, mulemucindika mwe lupwa lonse ulwakwa Yakobo muleba na katiina mwe ba mu lupwa lwa bena Israeli bonse. ²⁴ Pantu talekelesha umulanda uulecula, nangufye ukumusuulako iyoo. Tafisa icinso cakwe kuli ena, lelo alomfwa ku nkuuta yakulomba ubwafwilisho. ²⁵ Ni kuli iwe ekufuma ukulumbanya kwandi ukwa mu lukuta lukalamba, na pa cinso ca bantu bonse abakutiina epo nkafikilisha ifilayo fyandi. ²⁶ Abalanda bakalya bakekuta, abafwaya Yawe bakulamulumbanya, muleke imitima yenu ikalilile pe na pe. ²⁷ Abantu bonse aba pano isonde bakebukisha no kwalukila kuli Yawe, ne mishobo ya bantu yonse ikamupepa. ²⁸ Pantu Yawe e mwine wabufumu, kabili euteeka imishobo ya benafyalo. ²⁹ Aba fyuma fya pano isonde bakailemena no kumupepa, na babwelela kwiloba bali nokumufukamina, pamo pene nabafilwa ukuikalila abomi. ³⁰ Abantu ba nko sha kuntanshi bakalamubombela, na ba mu nkulo shakuntanshi shonse bakabashimikila ubunte bwa pa Mfumu. ³¹ Bakalashimika pa mulandu wa bulungami bwakwe, kuli bonse abo abashilati bafyalwe, pantu ifi fyonse efyo Imfumu yacita.