Kuli kembisha mukalamba. Ulwimbo lwakwa Davidi. ¹ Imyulu ilanga ubucindami bwakwa Yawe, ukwandalala kwa lwelele kulanga imilimo yakwe. ² Cila kasuba kalikwata ifyo kalanda, na cila bushiku busokolola amano. ³ Tafilanda, nangu ukusosa, ne shiwi lya ifi fintu talyumfwika iyoo. ⁴ Lelo iciunda cafiko cilasalangana pano calo ponse, ne mbila yafiko ilafika ukwapelela isonde. Ni mu mulu emo abikila akasuba icakwikalamo. ⁵ Emo kafuma kwati ni shibwinga uulefuma mumwakwe, kwati ni mpalume iyilepekanya ukubutuka ulubilo. ⁶ Katula ku mpela ya mulu, no kuya ku mpela ibiye, takwaba icishumfwa icikabilila cakako. ⁷ Amafunde yakwa Yawe yantu yapwililika, kabili yalatalalika umutima wa muntu. Ifisambilisho fyakwa Yawe fyakucetekela, kabili filapeela amano ku bantu abashayakwata. ⁸ Amalango yakwa Yawe yantu yalungama, yalapeela insansa ku mutima. Ifyo Yawe akonkomesha filasanikila, filalenga amenso ukumona. ⁹ Ukukwatila Yawe akatiina kwaliwama, kabili kulabelelela. Ifya bupingushi fyakwa Yawe fyacishinka, fyonse apo fyapela fyalilungama. ¹⁰ Fyaliwama ukucila golide uwalopololwa bwino, ukucilafye na pali golide wine wine. Fyalilowa ukucila na pa kulowa kwa buci, ukucila no luto ulutona ku cipepe ca buci. ¹¹ Efinsoka ine ne mubomfi wakwa Yawe, na mukuyakonka mwaliba ipaalo. ¹² Bushe nani engeluka umo ifibi fyakwe fyalola? Njelelako pa fyabubifi fyandi fyonse ifyo nshingeshiba. ¹³ Yawe ulengafwako ne mubomfi obe, pakuti nilalufyanya ku mufulo. Wileka ububifi bunteeke ubusha pakuti ndeba uwakaele, uwabula ifyabubifi ifikalamba. ¹⁴ Leka amashiwi yandi na matontonkanyo yandi yasekelelwe pa cinso cobe, we Yawe, we Cilibwe candi kabili Kalubula wandi.