Mikitamu wakwa Davidi. ¹ Unsungilile we Lesa wandi, pantu ni muli iwe mfisama. Ndalanda kuli Yawe nati, ² “Niwefye Imfumu yandi, nshamonako umbi uwingampaala ukucila pali iwe.” ³ Yangu ifyo bacindama abamushilo abali mu calo, balanenga ukucankwa. ⁴ Lelo ishamo likafulilako kuli abo abakonkelela imilungu imbi, ine tekuti ntulekele umulopa we lambo, nshakatale numbula no tumashina twatuko mu kanwa kandi. ⁵ We Yawe niwe cuma candi, kabili ulukombo lwandi, kabili niwe we usunga umutende wandi. ⁶ Umupaka wandi ushinta mu fifulo fyansansa, ne cuma napeelwa cintu cacindama nganshi. ⁷ Nakulapaala Yawe na matotelo pakumpanda amano,na pa nshita ya bushiku alanenga ukwiluka. ⁸ Inshita shonse ntangisha Yawe pa ntanshi yandi, pantu lyonse aba mu pepi no kuboko kwandi ukwa ku kulyo, takuli icingantelentensha ⁹ Eico umutima wandi uli ne nsansa, no lulimi luleyanga, no mubili wandi wikele mu mutelelwe. ¹⁰ Pantu we Yawe tawakaleke umweo wandi ukushala mu calo ca bafwa, Tawakaleke nokuti Uwamushilo obe akabole. ¹¹ Walinangilila inshila iyitwala ku mweo, no kuba ne nsansa ishishaifulila pa cinso cobe, no kusansamuka ukwa pe na pe ku kuboko kobe ukwa ku kulyo.