¹ Elyo aba Falise bamo naba kalemba baishile kuli Yesu ukufuma ku Yelusalemu. Batile, ² "Ninshi abasambi bobe bonawila intambi sha fikolwe? Pantu tabasamba ku maboko ilyo balelya umukate." ³ Ayaswike nokuti kuli bene, "Nomba ninshi monawila ifunde lyakwa Lesa pamulandu wa ntambi shenu? ⁴ Pantu Lesa atile, 'cindika wiso nanoko elyo ilyo uulanda icibi pali wishi atemwa nyina akafwa.' ⁵ Lelo mutila, 'Onse uwatila kuli wishi nangu nyina, "Bonse ubwafwilisho mwali nokupokelela kuli ine caba nomba ca bupe kuli Lesa." ⁶ Uyo umuntu takabile ukucindika wishi muli iyi nshila mwapondamikilamo icebo cakwa Lesa pamulandu wa ntambi shenu. ⁷ Imwe ba mumbi munda! Calinga fye ngefyo Isaiah aseseme pali imwe ilyo atile, ⁸ 'aba bantu bancindika no tunwa twabo lelo umutima uli ukutali naine. ⁹ Bampepa apafye pantu bapunda nge fisambilisho amafunde ya bantu."' ¹⁰ Elyo aite bumba nokuti kuli bene, "umfweni no kufiluka. ¹¹ Takuli cimo icingila mu kanwa icikowesha umuntu. Lelo icifuma mu kanwa, ici ecikowesha umuntu." ¹² Elyo abasambi baisa nokutila kuli Yesu, "Bushe nawishiba ukuti aba Falise balikalipwa ilyo baumfwile uku ukulanda?" ¹³ Yesu alyaswike nokuti, "Icilimbwa conse ico tata wa kumulu asha limba cikanukulwa. ¹⁴ Balekeni fye nintungulushi ishapofula. Ngacakuti umuntu uwapofula atungulula impofu ibiye, shonse shibili shikawila mucilindi." ¹⁵ Elyo Petelo mukwasuka atile kuli Yesu, tulondolweleko uyu mulumbe." ¹⁶ Yesu atile, "Bushe naimwe tamulailuka? ¹⁷ Tamwiluka ukuti conse icaya mukanwa cipita mu citombo elyo cafumina mu cimbusu? ¹⁸ Lelo ifintu ififuma mukanbwa fifuma mu mutima, Eifyo ifintu ifikowesha umuntu. ¹⁹ Pantu mu mitima emufuma amatontokanyo ayabi ukwipaya, ubucende ubupulumushi, ukwiba, bumboni bwabufi no lwambo. ²⁰ Ifi fintu ifikowesha umuntu. Lelo ukulya ukwabula ukusamba ku maboko takukowesha muntu." ²¹ Elyo Yesu aile ukufuam palya nokulungama kuncende sha fitungu fya misumba ya Tale na Sidoni. ²² Moneni na mayo waku Kenani aisa ukufuma mulya mu citungu. Apundile nokubilikisha ati, "Ngufwileniko uluse shikulu, mwana mwaume wakwa Dabidi! umwana wandi umukashana natebelelwa ne fimipashi fyakowela. ²³ Lelo Yesu tamwaswike ishiwi nangu limo. Abasambi bakwe baisa no kumulomba abati, "mutamfye, pantu aletupundilila." ²⁴ Lelo Yesu ayaswike nokuti, "nshatuminwe kuuli onse kanofye ku mpanga ishaluba isha mu ng'anda yakwa Israeli." ²⁵ Lelo na Mayo aishile kontamina pali wene, nokuti, "Shikulu, ngafwa." ²⁶ Ayaswike no kuti, "Tacilolelemo ukusenda umukate wa bana nokuposela kutwana twambwa." ²⁷ Namayo atile, "nifyo shikulu lelo no twana twambwa twine tulalya tumo utubufungau utulepona kwi tebulo lyakwa cilolo. ²⁸ Elyo Yesu ayaswike nokuti kuli wene, "we mwanakashi icicetekelo cobe cikulu; nacitile kuli iwe ukulingana nefyo ulekabila." Mwane umukashana alipola ukufumafye pali ilya ine nsa. ²⁹ Yesu afumine pancende palya nokuya mupepi na bemba wa Galili. Elyo aninika ulupili nokwikala kulya kwine. ³⁰ Amabumba ayakulu yaishile kuli wene. Baishile naba lemana, impofu, bacibulu naba kontotana, nabambi abengi abalwele. Babatoulile pa makasa yakwa Yesu nao alibaposha. ³¹ Eico ibumba lya lipapa ilyo bamwene ba cibulu ba sosa abalemana baba bwino, ifilema fyala enda, nempofu balamona. Ba lumbenye Lesa wakwa Israeli. ³² Yesu aitile abasambi nokuti, "ndi nenkumbu pe bumba pantu bekele naine panshiku shitatu elyo tabakwete fyakulya. nshilefwaya ukubasalanganya ukwabula ukulya, epali bafwa ulushile mu nshila." ³³ Abasambi batile kuli wene, "Nikwi twinga fumya umukate uwalinga pabantu bonse aba ukwikuta muno mumatololo?" ³⁴ Yesu atile kuli bene kuli bene, "mukate unga mukwete?" Batile, "cine lubali, no tusabi utunono." ³⁵ Elyo Yesu aebele ibumba ukwikala panshi. ³⁶ Asendele tulya utusabi cine lubali napanuma yakutotela, amokwele umukate no kupela ku basambi. Abasambi bapele kwi bumba. ³⁷ Abantu bonse balilya nokwikuuta elyo balonganika ubufungau ubwashelepo imiseke cine lubali. ³⁸ Abo abalile bali abaume amakana yane ukwabula ukupedelapo abanakashi na baice. ³⁹ Elyo Yesu asalangenye ibumba nokwingila mu bwato nokuya ku citungu ca Magadani.