¹ Panuma Yesu asosa ifi fyebo, aima aya naba sambi bakwe ukwabuka umukonko wa Kidironi, ekwali ibala ilyo wene nabasambi bakwe baingilemo. ² Nomba Yuda uwali pakumubemba, nao alishibe incende, pantu inshita shimo Yesu nabasambi bakwe eko baalekumanina. ³ Kanshi Yuda uwaletungulula ibumba lya ba shilika nabamushika bamo ukufuma muli bashimapepo mukalamba naba Falise, baile kulya nabasenda imyenge, ifisaniko, elyo ne fyanso. ⁴ Eico Yesu, uwaishibe ifintu fyonse ifyalecitika pali wene aileko apalamina nokubepusha, Ninani uo mulefwaya?" ⁵ Nabo bamwaswike abati, "Ni Yesu umwina Nazareti." Yesu atile kuli bene, "Nine wine" Yuda, uwamubembele aiminine pamo nabashilika. ⁶ Eico ilyo asosele kuli bene, "Nine wine," babwelele cimfuta numa nokuwa panshi. ⁷ Elyo nakabili abepwishe, "Ninani uo mulefwaya?" Nakabili batile, "Yesu umwina Nazareti." ⁸ Yesu ayaswike, "Nacimweba ukuti nine wine, kanshi ngamulefwaya ine, lekeni aba baleya." ⁹ Ici cali mubutantiko bwakufikilisha icebo ico wene asosele:" Palyabo abo wampele, nshalufyapo nangu umo." ¹⁰ Elyo Simoni Petelo, uwakwete ulupanga, alusomwene nokukwepula umubomfi wa muli bashimapepo bakalamba no kuputula ukutwi kwa kulyo kwakwe. Nomba ishina lya mubomfi ni Maliki. ¹¹ Yesu atile kuli Petele, "Biika ulupanga mucitubo caluko. Bushe teti nwe kulukombo ulo Taata ampela?" ¹² Eico ibumba lya bashilika naba kalamba, na bacilolo ba ba Yuda, baikete Yesu Nokumukaka. ¹³ Babalilepo ukumutwala kuli Aanasi, pantu ewali shifyala wakwa Kayafa, uwali shimapepo mukalamba ulya mwaka. ¹⁴ Nomba Kayafa eumo uwapandile amano kuba Yuda ati cawamapo ukuti umuntu umo afwila abantu. ¹⁵ Simoni Petelo akonkele Yesy, no musambi umbi efyo acitile. Nomba ulya musambi alishibikwe kuli bashimapepo mukalamba, elyo aingile pamo na Yesu mulubansa lwa kwa shimapepo mukalamba; ¹⁶ Lelo Petelo aiminine panse pamwinshi. Elo umusambi umbi, uwaishibikwe kumukalamba wabashimapepo, aile no kusosa kuli kalinda wapa mwinshi eluo wene aingishe petelo mukati. ¹⁷ Elyo umubomfi umwanakashi, kalinda wapamwinshi, atile kuli Petele, "Bushe naiwe tauli umo uwamubasambi ba uyu mwaume?" Atile, "Awe teine." ¹⁸ Nomba ababomfi nabacilolo baiminine palya, elyo bakoseshe nomulilo wamalasha, pantu kwalitalele, elyo baleikafya abene. Petelo Nao alipamo nabo naiminina palya aleikafya umwine. ¹⁹ Elyo shimapepo mukalamba aipwishe Yesu palwa basambi bakwe napama fundisho yakwe. ²⁰ Yesu epakumwasuka, "Nalisosa palwalala kuba Pacalo. Lyonse nalesambilisha muma Sinagogi namwi tempele umo aba Yuda bonse balelongana. Nsha sosele nangu cimo mubumfisolo. ²¹ Ninshi wanjipusisha? Ipusha abo abaumfwile pafyo nasosele. Lolesha, aba bantu balishiba ifyo nasosele." ²² Ilyo Yesu asosele ifi, umo pali bacilolo uwaiminine palya atobele Yesu nokutila, "Bushe ifyo efyo wingasuka shimapepo mukalamba?" ²³ Yesu epakumwasuka, "Nganalufyanya mukusosa, nshinina pafilubo, lelo nga ninungika, ninshi wangumina?" ²⁴ Elyo Anasi amutumine kuli Kayafa shimapepo mukalamba. ²⁵ Nomba Simoni Peyelo aliminine aleikafya umwine. Elyo abantu basosele kuli wene, "Bushe iwe tuli umo uwamuba sambi bakwe?" Alikene nokusosa ati, "Awe teine." ²⁶ Umo pa babomfi bakwa shimapepo, uyo uwali lupwa mwaume uo Petelo akwempwileko ukutwi atile, "Bushe iwe nshakumwene na wene mwibala?" ²⁷ Elyo Petele akene ici nakabili; palya pene na mukolwe alilile. ²⁸ Elyo bafumishe Yesu kuli Kayafa nokumutwala kwi sano lya mulashi. Cali nikuma caca, lelo bena tabaingile mwisano lya, mushi pakutila beikowesha lelo babe aba kulya icakucilila. ²⁹ Pilato epakufumina kuli bene elyo atile, "mulandunshi muleleta pali uyu muntu?" ³⁰ Nabo balyaswike nokusosa kuli wene, "ngacakuti uyu muntu tencita tubi, ngatatumupele kuli webo." ³¹ Eico Pilato asosele kuli bene, "Musendeni mwebene nokupingula umwabela ifunde lyenu." Aba Yuda basosele kuli wene, "Tefunde kuli ifwe ukubika umuntu kukufwa. ³² Basosele ifi pakuti icebo cakwa Yesu cifikilishiwe ico asosele ku kulangilila nimfwa yamusango nshi akafwa. ³³ Elyo Pilato aingile mwisano lya mulasi nakabili no kwita Yesu nokusosa kuli ena, "Bushe uli mfumu yaba Yuda?" ³⁴ Yesu Ayasuka, "Bushe uleisosela wemwine nangu bushe bambi balisosapo kuli iwe palwaine?" ³⁵ Pilato ayasuka, "Ninshi mu Yuda bushe nine? Abantu bobe nabashimapepo bakalamba ebakuletele kuli ine. Ninshi wacitile?" ³⁶ Yesu ayasuka, "ubufumu bwandi tebwa pano calo ngacakuti ubufumu bwandi bwali bwa pano calo ababomfi bandi ngakuti balwa pakuti nimpelwa kuba Yuda. Lelo nomba ubufumu bwandi tabewafuma pano." ³⁷ Pilato asosele kuli wene, "Bushe naiwe uli mfumu Kanshi?" Yesu ayaswike ati, "Nausosa ukuti ndi mfumu. Pamulandu waici nalifyelwe, kabili ni pamulandu waici nashile mu calo ku kushimika iciine uyo onse uwaba mucine akakutika kwi shiwi lyandi. ³⁸ Pilato asosele kuli wene, "icishinka ninshi?" Ilyo asosele ifi aafumine nakabili kuba Yuda noku sosa kuli bene, Nshisangilemp umulandu muli uyu muntu. ³⁹ Lelo mwalikwata ulutambi ulwakuti ndalekelako umuntu umo kuli imwe pabushikju bwakucilila. Kanshi bushe mulefwaya ndekeleko imfumu ya ba Yuda kuli imwe?" ⁴⁰ Elyo babilikishe nakabili no kusosa abati, "Tauyu muntu. Iyoo kanofye Baraba." Nomba Baraba aali cipondo.