¹ Nomba Dina umwana umukashana uo Yakobo afyele muli Leya, aile alepempula abanakashi ba muli cilya calo. ² Shekemu mwana Hamori umwina Hifi uwaleteeka iyo ncende, ati amone umukashana amwikata, alala nankwe ku makafye. ³ Kanshi umutima wakwa Shekemu walifye pali Dina mwana Yakobo. Atemwa nganshi umukashana, kabili alalanda nankwe amashiwi yakumunashanasha ⁴ Elyo Shekemu aebele wishi Hamori ati, “Tata mbuulileniko uyu mukashana ukuba umukashi wandi.” ⁵ Ilyo Yakobo aumfwile ukuti mwane Dina nabamubifya, bamwane abaume bali mu mpanga balecema ifitekwa, kanshi tacitilepo nelyo cimo mpaka ilyo babwelele ku mushi. ⁶ Elyo Hamori wishi wakwa Shekemu afumine kukuya landa na Yakobo. ⁷ Nomba bamwana Yakobo ilyo baumfwile ifyacitike, apopenefye bafuma mu mpanga babwela. Baumfwile ubulanda nganshi no kufulwa apakalamba, pantu Shekemu acitile icintu icamusebanya nganshi ku bena Israeli pakulala no mwana umwanakashi wakwa Yakobo. Acitile icintu icishifwile kucitika. ⁸ Lelo Hamori abeba ati, “Umwana wandi Shekemu aposele umutima wakwe pa mwana wenu umukashana. Ndemupapata mupeeni umukashana abe umukashi wakwe. ⁹ Lekenifye tuleupana. Imwe muleufya abana benu abanakashi kuli ifwe, na ifwe tuleufya abana besu abanakashi kuli imwe. ¹⁰ Kuti mwaikala na ifwe konse uko mulefwaya muli cino calo. Muleikalamo kabili kuti mwakwata ne cuma pamo ne mpanga.” ¹¹ Elyo Shekemu aebele wishi kwa Dina na bandume yakwe ati, “Nga cingamusekesha, ine nkamupeela conse ico mukalomba. Mpingwilenifye impango pa mukashana, elyo no bukulu bwa bupe ndi nokuleta apo mutemenwe. ¹² Ine fyonse ifyo mulenjeba ndelipila, cikulufye mumpeele umukashana abe umukashi wandi.” ¹³ Pa mulandu wakuti Shekemu alibifishe nkashi yabo Dina, bamwana Yakobo bayasuka Shekemu na Hamori wishi mu bucenjeshi ¹⁴ Babeba abati, “Awe ifwe teti tucite ica musango uyo. Ifwe tekuti tupeele nkashi yesu ku muntu uushasembululwa. Ico kuti caba icamusebanya nganshi kuli ifwe. ¹⁵ Ifwe pakuti twingasumina ukulaupana na imwe, kano bonse abaume benu balasembululwa. ¹⁶ Lyena tukalaufya abakashana besu kuli imwe, na ifwe tukalaupa abakashana benu. ¹⁷ Elyo ninshi tukalaikala na imwe, tukabe umutundu umo na imwe. Lelo nga mwakaana ukusembululwa, ninshi twalasenda nkashi yesu, tuleya.” ¹⁸ Amashiwi bamwana Yakobo abaume balandile yalisansamwishe Hamori na mwane Shekemu. ¹⁹ Umulumendo wena, bwangu bwangu acita nefyo bamwana Yakobo abaume balandile, pantu alitemenwe umukashana mwana Yakobo. Uyu mulumendo ewacindamishe pali bonse pa ba mu ŋanda yakwa Hamori wishi. ²⁰ Kanshi Hamori na mwane Shekemu balimine baya na ku mpongolo ya musumba kukushimikila abantu baleikala nabo mu musumba. ²¹ Babeba abati, “Aba bantu, baliba bwino kuli ifwe. Natubaleke bekale mu calo cesu no kukwatamo icuma, pantu icalo cesu cikulu. Elyo kuti twalaupa abana babo abanakashi nabo balaupa abana besu abanakashi. ²² Lelo aba bantu bakasuminisha ukuti tuleikala nabo ngo mutundu umo, kulila abaume besu bonse basembululwa nga filya bena basembululwa. ²³ Bushe ninshi ifitekwa fyabo, ifyuma fyabo ne nama shabo shonse, tafikaba fintu fyesu fyonse? Kanshi natusuminishanye nabo, lyena bakulaikala na ifwe.” ²⁴ 24Awe abaume bonse aba mu musumba basuminisha Hamori na mwane Shekemu, na baume bonse aba mu musumba basembululwa no kusembululwa. ²⁵ Ilyo papitile inshiku shitatu, ninshi abaume bacili balekalipwa ku filonda fyakusembululwa, abana bakwa Yakobo abaume babili, Simeoni na Levi bandume yakwa Dina, babuula impanga shabo, baingila mu musumba, ninshi aba mu musumba tabenekele iyoo, baipaya na baume bonse. ²⁶ Baipaya Hamori no mwana wakwe Shekemu ku lupanga. Elyo bafumya Dina mu ŋanda yakwa Shekemu baya no kuya. ²⁷ Panuma yakwipaya aba bantu, abana bambi abakwa Yakobo baisa tapa umusumba uo babifishemo nkashi yabo. ²⁸ Basenda impaanga shabo ne mbushi, iŋombe shabo na bapunda, elyo ne fintu fyabo fyonse bakwete mu musumba na mu mabala. ²⁹ Basendafye ifyuma fyabo fyonse na bakashi babo na bana babo, elyo batapa na fyonse ifyali mu mayanda. ³⁰ Elyo Yakobo aebele Simeoni na Levi ati, “Imwe, mwandetelelafye. Aba bantu bekala muli cino calo abena Kenani na bena Perisi bakampata nganshi. Ifwe tulifye abampendwa, elyo nga cakuti baikatana pamo, bandwisha, ine na ba mu ŋanda yandi tukaloba.” ³¹ Lelo bamwane, bamwasuka abati, “Bushe bali nokucita nkashi yesu kwati ni cilende?”