¹ Yakobo aumfwile ukuti bamwana Labani balesosa abati, “Yakobo nabuula ifyuma fyonse shifwe akwete. Kabili ubukankala buntu akwete, abufumishe ku fintu fyakwa shifwe.” ² Elyo Yakobo amona ukuti Labani talemulolesha bwino nga kale. ³ Yawe epakweba Yakobo ati, “Bwelelamo ku calo ca fikolwe fyobe na ba mu lupwa lobe, elyo na ine nakulaba na iwe.” ⁴ Kanshi Yakobo atumine amashiwi kuli Rakeli na Leya ukuti bese mu mpanga ukwali ifitekwa fyakwe. ⁵ Elyo abeba ati, “Nimona ukuti bawiso tabandolesha bwino nga filya cali kale. Lelo Lesa wa batata aba na ine. ⁶ Imwe namwishiba ukuti nalibombela bawiso na maka yandi yonse, ⁷ lelo bawiso balincenjesha pakwalula amalipilo yandi imiku ikumi. Lelo Lesa tabaleka ukuti bancitile icakungonawila umutende. ⁸ Nga cakuti basosa abati, ‘Ifitekwa ifya mabala efikaba amalipilo yobe, lyena ninshi ifitekwa fyonse fyalafyala utwana utwa mabala.’ Kabili nga cakuti basosa abati, ‘Ifitekwa fya mindoloshi efikaba amalipilo yobe,’ nalyo ninshi ifitekwa fyonse fyalafyala utwana utwa mindoloshi. ⁹ Kanshi Lesa napokolola bawiso ifitekwa, nomba afipeele kuli ine. ¹⁰ “Pa nshita inama shitamfyanya, limo nalilotele iciloto. Muli ici ciloto namwene ukuti basawe baletamfya bali aba mindoloshi, bamo aba fisemba, bambi nabo abamabala. ¹¹ Kabili muli ici ciloto malaika wakwa Lesa anjeba ati, ‘Yakobo!’ Na ine nayasuka nati, ‘Epo ndi. ¹² Malaika epakunjeba ati, ‘Inuna amenso, mona basawe bonse abaletamfya, bamo ba mindoloshi, bamo ba fisemba, elyo bambi ba mabala. Ncitile ifi pantu nalimona ifyo Labani akucitila. ¹³ Nine Lesa uwakumonekele ku Betele, kulya waimike ilibwe waitilapo amafuta, elyo wandaya ne cilayo. Kanshi nomba fuma muli cino calo bwangu, ubwelele ku calo kumwenu.’” ¹⁴ Elyo Rakeli na Leya bamwaswike abati, “Bushe ifwe tucili natukwata ifyakupokako pa fyuma fya cishilano fya batata? ¹⁵ Bushe ifwe tata tatumonafye nga benafyalo? Alitushitishafye kabili alilya ne mpango apokele pali ifwe. ¹⁶ Cine cine ifyuma Lesa apoka batata, nomba fyuma fyesu na bana besu. Eico citafye ifyo Lesa akwebele.” ¹⁷ Elyo Yakobo aninika abakashi bakwe na bamwane pa ngamila, ¹⁸ atangisha pantanshi ifitekwa fyakwe fyonse, pamo pene ne fyuma fyonse anonkele mu Padani Aramu, epakulabwelelamo kuli wishi Isaki mu calo ca Kenani. ¹⁹ Ilyo Labani aile kukubeya impaanga, Rakeli ashele aiba utulubi utwali e milungu yakwa wishi iya pa ŋanda yakwe. ²⁰ Yakobo nao acenjelela Labani umwina Aramu, afyuka ukwabula ukumwebako. ²¹ Kanshi afyukile asenda ne fintu fyonse ifyo akwete, ayabuka no mumana wa Yufurate, alungama ku calo ca mpili isha mu Gileadi. ²² Pa bushiku bwalenga shitatu baisa eba Labani ukuti Yakobo alifyuka. ²³ Labani epakusenda ba lupwa lwakwe, bakonka Yakobo pa nshiku cine lubali, bamusanga mu calo ca mpili isha mu Gileadi ²⁴ Elyo ubushiku, Lesa amonekela Labani umwina Aramu mu ciloto, amweba ati, “Ucenjele, wiesha kulanda kuli Yakobo nelyo cimo, icisuma nangu icibi.” ²⁵ Labani asangile Yakobo ninshi acita inkambi mu calo ca mpili sha mu Gileadi. Elyo Labani na ba lupwa lwakwe nabo bacita inkambi uko kwine ²⁶ . Labani epakweba Yakobo ati, “Bushe cinshi ucitile ifi? Walincenjesha, kabili wasenda na bana bandi abanakashi kwati ni bankole ba mu nkondo. ²⁷ Bushe cinshi wafyukile mu bumfisolo no kuncenjesha wancenjesha? Bushe cinshi ushanjebeleko? Ala nga nalikufishapo ne nsansa, tuleimba no kulisha insombo na maseese. ²⁸ Tawalekele nokuti ntomone abeshikulu bandi na bana bandi abanakashi pakubafishapo ²⁹ Tamwali mano muco wacitile. Ine ninkwata amaka yakukucitapo cimo icibi, lelo Lesa wakwa wiso anjebele ubushiku ati, ‘Ucenjele, wiesha kulanda kuli Yakobo nelyo cimo, icisuma nelyo icibi.’ ³⁰ Kwena ico ufumineko nico walefuluka ukubwelela ku ŋanda yakwa wiso. Nomba cinshi waibile imilungu yandi?” ³¹ Yakobo ayasuka Labani ati, “Nali no mwenso, pantu naletontonkanya ukuti limbi kuti mwampoka abana benu abanakashi ku makafye. ³² Lelo nga cakuti mwasanga umo ali ne milungu yenu, wena wakwipayafye. Kanshi fwayeni mwe bene pa cinso ca ba lupwa lwesu nga palipo icintu cenu cimo ico nsendele. Elyo nga epo cili, mucibuule.” Yakobo taishibe ukuti ni Rakeli ewaibile imilungu yakwa Labani. ³³ Kanshi Labani epakuya mwitenti lyakwa Yakobo, na mwitenti lyakwa Leya, na mwitenti lya basha banakashi babili, lelo monse tatusangilemo iyoo. Ilyo afuma mwitenti lyakwa Leya, elyo aingila mwiteni lyakwa Rakeli. ³⁴ Kanshi Rakeli ninshi nafumya tulubi ele tubika mu cakwikalapo pa ngamila kabili no kwikala ninshi epo ekele. Labani afwaya mu fipe fyonsefye, awe nokuti atusange nakalya. ³⁵ Rakeli aebele wishi ati, “Mukwai mwimfulilwa ico nafilwa ukwiminina pa cinso cenu, ala nico ndi kumpepo.” Labani wena abikapofye ukulafwaya, lelo nokuti asange imilungu yakwe nakalya. ³⁶ Yakobo afulwa, alaebaula Labani. Aipusha Labani ati, “Bushe mulandu nshi nacita? Bushe bubifi nshi nacita pakuti mulenunga nge nama? ³⁷ Nomba apo mwafwaya mu fipe fyandi fyonse, bushe cipe cenu nshi musangilemo? Cibikeni pa cinso ca ba lupwa lwenu na ba lupwa lwandi uleke bapingule pali ifwe babili. ³⁸ Twikele nenu imyaka amakumi yabili. Impaanga shenu ishikota ne mbushi shenu ishikota tashaleponya mafumo, kabili nshalilepo sukusuku nangu sawe nelyo umo pa mikuni yenu. ³⁹ Ilyo ifiswango fyaleipayapo icitekwa cenu cimo, nshaleleta iyo nama ifwile kuli imwe, lelo nalepyanikishapofye icitekwa candi ne mwine. Kabili mwalenjeba no kufutilapo inama abantu baleiba akasuba nangu ubushiku. ⁴⁰ Kanshi akasuba nalepya ku cipuki, elyo ubushiku kututumafye ku mpepo ukwabula ukumona utulo. Ifi efyali ubumi bwandi. ⁴¹ Pa myaka yonse iyi amakumi yabili twaikele na imwe, efyo ubumi bwandi bwali. Namubombele imyaka ikumi limo na ine pa bana benu abanakashi babili. Kabili namucemene ifitekwa fyenu pa myaka mutanda, lelo mwabikilepofye ukwalula amalipilo yandi imiku ikumi limo. ⁴² Ukwabula ukuti Lesa wakwa tata, Lesa wakwa Abrahamu, Lesa uo tata Isaki atiina, abe na ine, awe ukwabula no kutwishika, nga mwantamfyafye nja iminwe nkutwa. Lelo Lesa alimona ifyo nacula nefyo nabombesha na maboko yandi, eico lelo ubushiku acimukalipilila.” ⁴³ Labani ayasuka Yakobo ati, “Aba banakashi bana bandi, abana nabo bana bandi, elyo ne fitekwa fine nafyo fitekwa fyandi. Fyonse ifi ulemona fyandi. Nomba kwena finshi lelo ningacitila abana bandi nangu aba bana bafyala? ⁴⁴ Ale nomba, iwe na ine natucite icipangano pakuti cibe e cakushinina pakati kesu.” ⁴⁵ Elyo Yakobo abuula ilibwe aliminika pakuti libe icakwibukishishako. ⁴⁶ Kabili aeba ba lupwa lwakwe ati, “Longanyeni amabwe,” nabo babuula amabwe bayatulika umwina. Elyo balya icakulya mupepi no mwina wa mabwe. ⁴⁷ Labani awinika ishina lya Yega Saduta, Yakobo wena awinika ishina lya Galedi. ⁴⁸ Elyo Labani asosa ati, “Uyu mwina wa mabwe ewaba lelo icakutushinina iwe na ine.” Kanshi eico uyu mwina waleitilwa Galedi. ⁴⁹ Kabili apa pene paleitwa Misipa pantu Labani asosele ati, “Yawe engalatubebeta, iwe na ine ilyo tukaleka ukwikala pamo. ⁵⁰ Elyo kabili nga walacusha abana banakashi bandi nangu waupilapo abanakashi na bambi, nangu tapali umbi na ifwe, uli nokwibukisha ukuti kambone wesu pali iwe na ine ni Lesa.” ⁵¹ Labani alundapo ukweba Yakobo nokuti, “Mona umwina wa mabwe, mona ne libwe ili, ifi njiminike pakati ka iwe na ine. ⁵² Uyu mwina wa mabwe e kambone ne libwe ili e kambone ukuti ine nshakacile uyu mwina ukwisa uko uli kukukucusha, elyo na iwe tawakacile uyu mwina neli libwe ukwisa uko ndi kukuncusha. ⁵³ Lesa wakwa Abrahamu na Lesa wakwa Naho, Lesa wa fikolwe fyabo akatupingule ifwe bonse babili.” Yakobo nao epakulapa mwishina lyakwa Lesa uo wishi Isaki atiina. ⁵⁴ Yakobo atuula ne lambo kulya kwine ku calo ca mpili, kabili aitako na ba lupwa lwakwe ku mitebeto. Panuma yakulya, basendama uko kwine ubo bushiku. ⁵⁵ Lucelocelo cilya bwaca, Labani atomona abeshikulu bakwe na bamwane pakubashalikapo, kabili abapaala elyo aima, abwelelamo na kumwakwe.