¹ Kanshi Isaki aitile Yakobo no kumupaala, amukonkomesha ati, “Iwe wikopa umwanakashi umwina Kenani. ² Ima akuya ku calo ca Padani Aramu kwa Betueli, sokulu uwafyala banoko. Uli nokuupa umo pa bakashana bamwana Labani ndume ya banoko ³ Lesa Umwine wa maka yonse engakupaala, akakupeele ubufyashi, akakusandulule, mpaka ukabe ibumba lya mishobo ya bantu. ⁴ Lesa engakupeela iwe pamo na ba mu lupwa lobe ipaalo apeele Abrahamu, pakuti cino calo umo nomba wikala ngo mweni, ukacipoke cikabe calo cobe.” ⁵ Elyo Isaki aleka Yakobo ukuya, nao aya ku calo ca Padani Aramu, kuli Labani mwana Betueli umwina Aramu, ndume yakwa Rebeka, nyina wakwa Yakobo na Esau. ⁶ Nomba Esau aumfwile ukuti Isaki alipaala Yakobo kabili alimutuma ku Padani Aramu pakuti eko akaye upila. Kabili aumfwile nokuti, ilyo amupaalile, alimukonkomeshe ati, “Wikopa umwanakashi umwina Kenani” ⁷ elyo nokuti Yakobo nao alibeela wishi na nyina aliya na ku Padani Aramu. ⁸ Esau epakushininkisha ukuti wishi Isaki tatemwa abanakashi abena Kenani. ⁹ Kanshi Esau ekuya kuli Ishimaeli mwana Abrahamu, aupa na Mahalati mwana Ishimaeli, nkashimbiye kwa Nebaiyoti, ukulunda pa bakashi akwete kale. ¹⁰ Yakobo afumine ku Beresheba, alungama ku Harani. ¹¹ Ilyo afikile pa ncende imo, ico akasuba kawa, epo asendama ubo bushiku. Abuulapo ilibwe limo epo asaila, alala nokulala. ¹² Alota iciloto umo amwene umutanto ushimpile panshi, kabili ufikile na mu mulu. Elyo bamalaika bakwa Lesa balenina no kwika pa mutanto. ¹³ Pa mulu wauko, amona Yawe naiminina. Elyo amweba ati, “Nine Yawe, Lesa wakwa wiso Abrahamu kabili Lesa wakwa Isaki. Ici calo ulelepo niwe nkapeela pamo na ba mu lupwa lobe. ¹⁴ Aba mu lupwa lobe bakafula kwati lukungu lwa pano isonde. Mukasalangana ukufika na ku masamba, ku kabanga, ku kapinda ka kuso na ku kapinda ka kulyo. Kabili imishobo yonse iya pano isonde ikapaalilwa muli iwe no lupwa lobe. ¹⁵ Mona, ine naba nobe lyonse, nakulakusunga konse uko wakulaya. Kabili nkakubwesesha kuli cino cine calo. Nshakakulekeleshe mpaka nkacite fyonse ifyo nakulaya.” ¹⁶ Cilya Yakobo abuuka mu tulo, asosa ati, “Cine cine pano pantu Yawe epo ali, na ine nshacishiba.” ¹⁷ Yakobo epakumfwa umwenso, asosa nokuti, “We ncende nobe ulakatama! Iyi ncende teyafye, ni ŋanda yakwa Lesa! Iyi e mpongolo ya ku mulu.” ¹⁸ Ubushiku bwakonkelepo lucelocelo, Yakobo abuula ilibwe asailepo, alimika pakuti libe icakwibukishishako. ¹⁹ Elyo aitila amafuta pa mulu we libwe. Yakobo ainika iyo ncende ishina lya Betele, nangu uyu musumba kale waleitwa Lusi. ²⁰ Elyo Yakobo alaya icilayo ati, “Nga cakuti Lesa akulaba na ine, no kunsunga pali ulu lwendo ndipo, no kulampeela ifyakulya ne fyakufwala, ²¹ pakuti nkabwelele na ku ŋanda ya batata umutende, ninshi Yawe ewakulaba Lesa wandi. Kabili ilibwe njiminike lyakulaba e ŋanda yakupepelapo Lesa. ²² Kabili pali fyonse ifyo ukampeela, nkalabuulapo cimo pekumi no kukupeela.”