¹ Yawe alandile kuli Mose ati, “Basa amabwe yabili ayapapatala ayapala yalya yene ayantanshi, na ine nkalembapo amashiwi yalya yene yali pa mabwe yantanshi yantu watobele. ² Ukaipekanye mailo ulucelo, kabili ukanine ulupili lwa Sinai mailo ulucelo, ukese kuli ine palya pene pa mulu wa lupili. ³ Wikaleka muntu nangu umo akakukonke nangu ukumonekela apali ponse pa lupili. Ne fitekwa fine ifinono ne fikulu fikalaliila mupepi no lupili.” ⁴ Kanshi Mose epakubasa amabwe yabili ayapapatala ayali nga yalya yene ayantanshi. Kabili ulucelocelo aya nina no lupili lwa Sinai nga fintu Yawe amukonkomeshe, nasenda na mabwe yabili mu minwe yakwe. ⁵ Yawe nao aikile mwikumbi, aisa iminina nankwe apo ali, abila ne shina lyakwe ati nine Yawe. ⁶ Yawe apitile pantanshi yakwa Mose alebilikisha ati, “Nine Yawe, nine Yawe, Lesa uwaluse ne cikuku, uushifulwa bwangu, uwacitemwiko icishipwa, kabili uwacishinka. ⁷ Ntwalilila ukulanga icitemwiko icishipwa ku makana na makana ya bantu, no kubabelela uluse pali bucisanguka, bumpulamafunde no bubifi. Lelo nshilekafye bampulamafunde ukwabula ukukandwa, ndakanda abana babo na beshikulu babo ukufika ku nkulo yalenga butatu ne yalenga bune, pa mulandu wa bubifi bwa bashibo.” ⁸ Awe Mose ilyo line afukama akontama panshi, alapepa ati, ⁹ “We Mfumu nga cingakusekesha, shileka tuleya nobe. Nangu bali bankosa mitwe, we Mfumu, utubeleleko uluse pa fibi fyesu na pa fyabubifi fyesu, utubuule nge cuma cobe ca cishilano.” ¹⁰ Elyo Yawe aebele Mose ati, “Ine napanga icipangano na iwe. Pa menso ya bantu bobe bonse epo ndi nokucitila ifipeshamano ifishatala aficitwa mu mushobo nangu umo uwa pano isonde. Abantu mwikala nabo bonse bakamona imilimo yakutiinya intu ine ne Yawe nkamucitila. ¹¹ Mulesunga ifyo namukonkomesha mu bushiku bwa lelo. Ine nkamufulumwina abena Amoli, abena Kenani, abena Hiti, abena Perisi, abena Hifi na bena Yebusi. ¹² Mukabe abacenjela, mwikalacita icipangano na bakaya ba mu calo muleyamo, pantu bakesa ba iciteyo kuli imwe. ¹³ Mukabongolole ifibumbili fya malambo fyabo, mukatobolole na mabwe yabo bacindikisha, mukaputaule ne nceshi sha Ashera, umulungu wabo. ¹⁴ Tecakwesha ukulapepa umulungu umbi, pantu ishina lyakwa Yawe ni Bufuba, ni Lesa wabufuba. ¹⁵ “Mukabe abacenjela, mwikalacita icipangano na bakaya ba mu calo, pantu ilyo bacita bucilende bwa mukutuula amalambo ku milungu yabo kuti bamo bamwitako kabili mwalyako ku malambo yabo. ¹⁶ Kabili ilyo mwabuula abana babo abanakashi no kubofya ku bana benu abaume, elyo abo bana babo abanakashi balacita bucilende bwa mukupepa imilungu yabo, bakalenga na bana benu abaume ukulacita bucilende bwa mukupepa imilungu yabo. ¹⁷ “Mwilapanga imilungu iyaengwa ku cela. ¹⁸ “Mukalesefya inshikunkulu ya Mikate Ishatutumuka. Pa nshiku cine lubali mukalelya umukate umushaba intutumushi ngefyo namukonkomeshe. Mukalecita ici pa nshita yasontwa mu mweshi wa Abibu, pantu ni muli uyu mweshi mwafumine mu calo ca Egupto. ¹⁹ “Conse icabalilapo ukufyalwa kuli nyina candi, pamo pene na mabeli yonse ayalume ya fitekwa fyonse aya ŋombe nangu impaanga. ²⁰ Ibeli lyakwa punda mukalilubule pakuleka umwana wa mpaanga. Nga tamulilubwile ninshi mukalifune umukoshi. Mukalelubula abana benu bonse abaume amabeli. “Kabili pekalaba muntu nelyo umo uwakumonekela pa cinso candi iminwe nkutwa. ²¹ “Ulebomba mu nshiku mutanda shonse, lelo pa bushiku bwalenga cine lubali pena ufwile ukutuusha. Nangufye ni mu nshita yakulima nangu ukulobolola ufwile ukutuusha. ²² “Ukalesefya inshikunkulu ya milungu mukutuula iŋanu shantanshi mwalobolola, ukalesefya ne nshikunkulu yakulonganika ifisabo pa kupwa kwa mwaka. ²³ Imiku itatu cila mwaka abaume benu bonse bafwile ukwisa monekela pa cinso ca Mfumu Yawe, Lesa wakwa Israeli. ²⁴ Nkafulumunamo imishobo ku cinso cenu no kukushako icalo cenu. Ilyo mukalaya mukumonekela ku cinso candi ne Yawe Lesa wenu imiku itatu pa mwaka, takwakabe umuntu nangu umo uwakumupokolola icalo cenu. ²⁵ “Wilantuula mulopa we lambo pamo pene na conse icilimo intutumushi. Kabili wikalaleka icipande ca nama ye lambo ye Pasaka, inshikunkulu ya Cakucilila, cishale mpaka ukufika na ku lucelo. ²⁶ “Ukaleleta ifisabo fyantanshi ifyawamishapo ifya mu mabala yobe ku ŋanda yakwa Yawe Lesa obe. “Wikalaipikila akana ka mbushi mu mukaka wakwa nyina.” ²⁷ Kabili Yawe aebele Mose ati, “Lemba aya mashiwi pantu ukulingana na ya mashiwi natupanga nobe icipangano pamo na bena Israeli bene.” ²⁸ Mose ali kulya pamo na Yawe inshiku amakumi yane akasuba no bushiku, ukwabula ukulya umukate nangu ukunwa amenshi. Kabili alembele pa mabwe ayapapatala amashiwi ya cipangano, amafunde ikumi limo. ²⁹ Ilyo Mose atentemwike ulupili lwa Sinai, ninshi nasenda amabwe ya cipangano yabili mu minwe yakwe, taishibe ukuti impumi yakwe ilebengeshima pantu acilanda na Lesa. ³⁰ Aroni na bena Israeli bonse pakumona impumi yakwa Mose ilebengeshima, baiketwe no mwenso bafilwa no kumupalama. ³¹ Lelo Mose epakubeta. Kanshi Aroni ne ntungulushi sha mu lukuta epakuya mupalama, nao alalanda nabo. ³² Panuma abena Israeli bonse baisa mupalamina, elyo abapeela amafunde yonse Yawe amwebele pa lupili lwa Sinai. ³³ Ilyo Mose apwa ukulanda nabo, abuula insalu afimba na pa mpumi yakwe. ³⁴ Lelo lyonse ilyo Mose aingila mwi Tenti pa cinso cakwa Yawe kukulanda nankwe, lyena alefimbulapo insalu mpaka afumamo. Kabili aleti nga afumamo aleeba ulukuta lwa bena Israeli ifyo bamukonkomeshe. ³⁵ Abena Israeli nabo balemona impumi yakwe nakabili ilebengeshima. Eco Mose alefimba pa mpumi yakwe mpaka ilyo akaya mukulanda na Yawe.