¹ “Ifi efyo uli nokucita kuli Aroni na bana bakwe abaume pakubasangulula pakuti bakalemombela umulimo wa bushimapepo. Ukabuule iciponti na basukusuku babili ababula akalema. ² Kabili ku bunga bwa ŋanu ubwapeleka bwino ukapangeko imikate iyabulamo intutumushi. Elyo ukapangeko utumikate utwasakanishiwamo na mafuta, no tumikate utwapapatala utwashingwako amafuta, tonse umwabula intutumushi. ³ Ukaibike mu museke no kuletela pamo ne ciponti na basukusuku babili. ⁴ “Elyo ukalete Aroni na bana bakwe abaume pa mwinshi we Tenti Lyakukumaninamo no kubasamba na menshi. ⁵ Ukabuule ne fyakufwala, ukafwike Aroni ilaya, umwingila wakufwala mukati ka efodi wine, icakufwala ca efodi, na tumba wa pa cifuba. “Ukamukake mu musana umushipi wa efodi uwapikulwa ubusaka. ⁶ Ukamupombe ne nsalu ya ku mutwe, ukakambatikepo na kalilata kamushilo. ⁷ Ukabuule amafuta yakumusuba pakuba shimapepo, ukayapongolwele pa mutwe wakwe pakumusuba. ⁸ “Ukalete na bana bakwe abaume, nabo ukabafwike imingila. ⁹ Kabili ukabafwike amalamba ya mu musana no kubapomba insalu ku mitwe. Bushimapepo bwabo bukaba ukukonkana umwabela ifunde lyakubelelela. Muli uyo musango emo ukapeelela Aroni na bana bakwe abaume bushimapepo. ¹⁰ “Ukalete ne ciponti pa ntanshi ye Tenti Lyakukumaninamo, elyo Aroni na bana bakwe abaume bakatambalikila amaboko yabo pa mutwe wa ciponti. ¹¹ Mukacipaile pa cinso cakwa Yawe pa mwinshi wakwingilila mwi Tenti Lyakukumaninamo. ¹² Ukabuule umulopa umo uwa ciponti icilume ukaushinge ku nsengo sha bulambo ku munwe. Umulopa ukashalapo onse ukawitile mwisamba lya bulambo. ¹³ Elyo ukabuule amafuta ayaba ku fya munda, fyonse ifyalambatila ku libu, ne mfyo shonse shibili na mafuta ayabako, elyo ukafyoce pa bulambo. ¹⁴ Lelo umunofu wa ciponti icilume, umukupo na fyonse ifili mu cifu na mu mala fyena ukaye fyocela kunse ya nkambi. E mutuulo wakwelelwa pa bubifi. ¹⁵ “Ukabuulepo sukusuku umo, na Aroni na bana bakwe abaume bakatambalikepo amaboko yabo pa mutwe wakwe. ¹⁶ Elyo ukamwipaye, ukabuule no mulopa wakwe, ukaukane ku mbali shonse isha bulambo. ¹⁷ Ukaputaule sukusuku fipimfya fipimfya, ukasamfye ne fya munda ne myendo, ukafibike pa fibiye pamo no mutwe. ¹⁸ Elyo ukoce sukusuku onse pa bulambo. Ili e lambo ilyakocela Yawe, ilya cena cisuma icimusekesha, umutuulo wa cakoca kuli Yawe. ¹⁹ “Ukabuule sukusuku na umbi, Aroni na bana bakwe abaume bakatambalikepo amaboko yabo pa mutwe wakwe. ²⁰ Ukamwipaye, ukabuule no mulopa wakwe umo, ukashinge Aroni na bana bakwe abaume pa tulebelebe twa matwi ya ku kulyo kwabo, pa fikumo fya ku kulyo kwabo, na pa fikondo fikalamba fya ku kulyo. Elyo ukakane umulopa ukashalapo ku mbali shonse isha bulambo. ²¹ Elyo ukabuulepo umulopa umo uuli pa bulambo, na mafuta yamo ayakubasuba pakuba bashimapepo, ukakane pali Aroni na pa fyakufwala fyakwe, elyo na pa bana bakwe ne fyakufwala fyabo. Ninshi Aroni na bana bakwe pamo ne fyakufwala fyabo batuulwa kuli Lesa. ²² “Kabili kuli sukusuku uyu ukabuuleko amafuta, umucila, amafuta ya mu fya munda, fyonse ifyalambatila ku libu, ne mfyo shonse shibili na mafuta yabako elyo no mwendo wa ku kulyo. ²³ Mu museke wa mikate iyabulamo intutumushi iyili pa cinso cakwa Yawe ukabuulemo umukate umo na kamukate kamo akasakanishiwamo amafuta elyo na kamukate akapapatala. ²⁴ Ifyakulya fyonse ifyo ukafibike mu minwe yakwa Aroni na bana bakwe abaume, nabo bakafimishe mumulu ngo mutuulo wakutambika ukuti nafipeelwa kuli Yawe pa cinso cakwe. ²⁵ Elyo kabili ukafibuule mu minwe, ukafyocele na pa bulambo pa mulu we lambo lyakoca. Ili e lambo lyakocela Yawe lya cena cisuma icimusekesha, umutuulo wa cakoca kuli Yawe. ²⁶ “Ukabuule icisao cakwa sukusuku uo ukepaya pakupeela Aroni bushimapepo, ukacimishe mumulu ngo mutuulo wakutambika pa cinso cakwa Yawe, elyo cikabe icakaniko cobe. ²⁷ Ukasangulule icisao no mwendo ifyakwa sukusuku ifikemishiwa mumulu ngo mutuulo wakutambika pakupeela bushimapepo, ukafituule pantu fyakwa Aroni na bana bakwe abaume. ²⁸ Ifi e fipande fili nokuba icakaniko cakwa Aroni na bana bakwe abaume ifyo bali nokulapoka lyonse ku bena Israeli. E bupe ubukalafuma ku bena Israeli pafyo bakalatuula kuli Yawe, ukufuma pa mituulo yabo iyakwampana. ²⁹ “Aroni nga afwa, ifyakufwala fyakwe ifyamushilo fikapeelwe ku bana bakwe abaume, efyakusubilwamo amafuta no kupeelelwamo bushimapepo. ³⁰ Umwana uwamupyana pali bushimapepo, akalefwala ifyo ifyakufwala pa nshiku cine lubali pakuya mwi Tenti Lyakukumaninamo mukubomba mu Muputule wamushilo. ³¹ “Ukabuule inama ya sukusuku iyakupeelelapo bushimapepo no kuipikila mu cifulo camushilo. ³² Aroni na bana bakwe bakalile inama ya sukusuku pa mwinshi we Tenti Lyakukumaninamo pamo no mukate ukaba mu museke. ³³ Bakalye ifyo fintu babomfeshe pakufuta pa bubifi bwabo ilyo balepeelwa amaka ya bushimapepo kabili no kusangululwa. Umuntu umbi nelyo umo tafwile kulyako kuli ifi pantu fyamushilo. ³⁴ Lelo nga cakuti inama ya sukusuku iyakupeelelapo bushimapepo nangu umukate fyashalapo ukufika ulucelo, mukafyocefye. Tamufwile kufilya, pantu fyamushilo. ³⁵ “Ukabombe umulimo wakupeela Aroni na bana bakwe abaume bushimapepo ukulingana ngefyo nakukonkomesha. Ukubapeela bushimapepo kukapwe inshiku cine lubali. ³⁶ Cila bushiku ukaleleka cilume wa ŋombe ngo mutuulo wakwelelwa pa bubifi pakufuta pa fyabubifi. Ukasangulule ubulambo ku mutuulo wa pa bubifi pakufuta pa fyabubifi. Kabili ukabusube amafuta pakubutuula. ³⁷ Pa nshiku cine lubali ukaleleka pa bulambo ilambo lyakufuta pa fyabubifi no kubusangulula. Elyo ubulambo bukaba ubwamushilo nganshi, elyo na conse icakumyako cili nokuba icamushilo.” ³⁸ “Ifi efyo uli nokutuula pa bulambo cila bushiku, lyonsefye ukaletuula ilambo lya bana ba mpaanga babili abali no mwaka umo. ³⁹ Ukaletuula umwana wa mpaanga umo ulucelo elyo umbi nao icungulo. ⁴⁰ Pakutuula umwana wa mpaanga uwakubalilapo, ukatuulile pamo ne capekumi cimo ca cipimo ca efa wa bunga bwa ŋanu ubwapeleka bwino ubwakasawilwamo amafuta ya miolifa ayalingana na pakati ka citika wa hini umo. Kabili ukatuule icipimo ca pakati ka citika wa hini uwa mwangashi, umutuulo wa fyakunwa. ⁴¹ Ukaletuula ilambo lya mwana wa mpaanga uwabubili icungulo mu musango umo wine ngo lucelo pamo no mutuulo wa cabunga no wa fyakunwa. E lambo lyakocela Yawe ilya cena cisuma icimusekesha. ⁴² Mu nkulo shenu shonse mukaleleka ili lambo lyakoca inshita yonse pa cinso cakwa Yawe pa mwinshi we Tenti Lyakukumaninamo. Apopene epo ine nkalamukumanya no kulalanda na imwe. ⁴³ Apo pene kabili epo nkalakumanya abena Israeli, no bucindami bwandi bukalenga icifulo kuba icamushilo. ⁴⁴ Nkalenga Itenti Lyakukumaninamo pamo pene no bulambo ukuba ifyamushilo kabili nkalenga Aroni na bana bakwe ukuba abamushilo, pakuti bakalemombela umulimo wa bushimapepo. ⁴⁵ Elyo nkacita icifulo candi pakati ka bena Israeli kabili nkaba Lesa wabo. ⁴⁶ Bakeshiba nokuti nine Yawe, Lesa wabo, uwabafumishe mu calo ca Egupto pakuti nkacite icifulo candi pakati kabo. Nine Yawe, Lesa wabo.”