¹ Elyo Yawe aebele Mose ati, “Nalaleta icinkunka na cimbi icakulekelesha pali Farao na pa calo ca Egupto. Panuma ya ifyo lyena akaleka mukafume kuno. Ilyo akacita ifyo, akamutamfyamofye bonse. ² Kanshi eba abena Israeli, abaume na banakashi bena ukuti balombe ifintu fya silifa ne fya golide ku bena mupalamano babo.” ³ Kabili Yawe alengele abena Egupto ukukwatila abena Israeli umucinshi. Mose nao ali umuntu mucindami nganshi mu calo ca Egupto, abantu na bacilolo bakwa Farao balimucindike. ⁴ Elyo Mose aebele Farao ati, “Ifi efyo Yawe asosa ati, ‘Ubushiku pakati, ndepitana mu calo conse ca Egupto. ⁵ Amabeli yonse ayaume mu calo ca Egupto yalefwa. Ukutendekelafye pebeli lyakwa Farao, ilili nokumupyana pa cipuna cabufumu, ukufika na kwibeli lya musha umwanakashi uupela ubunga, na mabeli ya fitekwa yonse yali nokufwa. ⁶ Kabili mu calo conse ica Egupto mukaba ukuloosha ukukalamba ukushatala akubamo kabili takwakatale akubamo. ⁷ Lelo mu bena Israeli mwena nangufye ni mbwa tayakabosele pa muntu nelyo umo nelyo pa citekwa.’ Elyo mukeshiba ukuti Yawe alalekanya pakati ka bena Egupto na bena Israeli. ⁸ Kabili bacilolo bobe bonse bakesa kuli ine no kumfukamina, bakasosa nokuti, ‘Kabiye, iwe na bantu bobe bonse abakukonka.’ Panuma ya ifyo ninshi nkaya.” Awe Mose afuma ne cipyu pali Farao. ⁹ Yawe aebele Mose ati, “Farao takakumfwe nakalya epakuti nkacite ifisungusho ifingi mu calo ca Egupto.” ¹⁰ Mose na Aroni bacitile ifisungusho ifi fyonse pa menso yakwa Farao. Lelo Yawe aumike umutima wakwe, nao akaana no kuleka abena Israeli ukuti bafume mu calo cakwe.