¹ Aya e mashiwi yakulekelesha ayakwa Davidi. “Ubusesemo bwakwa Davidi mwana Yese, ubusesemo bwa muntu uwasansabalikwa no Wapulamo. Umuntu umusubwa wakwa Lesa wakwa Yakobo, kabili kemba wa nyimbo sha bena Israeli. ² “Umupashi wakwa Yawe ulandila muli ine. Kabili amashiwi yakwe yabafye pa lulimi lwandi. ³ Lesa wakwa Israeli nalanda, Icilibwe cakwa Israeli casosa kuli ine aciti, ‘Umuntu uuteeka abantu mukulungika, kabili uuteeka mukatiina kakwa Lesa, ⁴ aba kwati lubuuto lwa kacelo, kwati ilyo akasuba katula ukushili na makumbi, icilenga umulemfwe ukubengeshima pesonde.’ ⁵ Bushe iŋanda yandi tayaba ifi kuli Lesa? Pantu alipangana na ine icipangano ca pe na pe Alicilondolola bwino muli fyonse kabili icakosa. Bushe takalete ipusukilo lyandi no kucita conse ico mfwaya? ⁶ Lelo abantu babifi bena baba nge myunga ya mu matololo iyakuposafye, iyishingakuswa ne minwe. ⁷ Elyo umuntu onse pakuikatako, afwile ukubomfya icela nangu umusako we fumo, lyena kuti ayocela apo pene ibelele.” ⁸ Aya e mashina ya mpalume shabulwi shakwa Davidi: Yoshebu Basebeti umwina Takemoni, umukalamba wa baume bene bene batatu. Aimishe ifumo lyakwe mukulwisha abantu imyanda cine konse konse, abo aipeye pa muku umofye. ⁹ Kabili uwamukonkelepo pali bumpalume ali ni Eleasa umwana umwaume wakwa Dodo umwina Ahoyi. Pamo nga umo uwali pa mpalume shitatu, ali na Davidi ilyo baile sonsomba Abafilisiti uko balongene ku bulwi ku Pasi Damimu. Elyo abena Israeli bafulumuka. ¹⁰ Awe Eleasa wena ashipa, alaipaya na Bafilisiti mpakafye amaboko yakwe yanakuka, ne minwe yalambatila ku lupanga. Nao Yawe alenga nokuti bacimfye apakalamba pa bushiku bulya. Awe ne fita fyonse fyabwelela na kuli Eleasa, kukubuulako ifitapwa ku bafwa. ¹¹ Uwakonka pali Eleasa ni Shamaya umwana mwaume wakwa Age umwina Harari. Ilyo Abafilisiti balongene pamo mu mpuka shabo pa cifulo cimo apali ibala lye landa, abena Israeli balifulumwikepo. ¹² Lelo Shamaya wena ashipa, aiminina na pakati ke bala. Alicingilila, elyo aipaya Abafilisiti. Awe Yawe nao alengele ukuti bacimfye apakalamba. ¹³ Elyo batatu pa ntungulushi amakumi yatatu, batentemwike baisa kuli Davidi ku lucengo lwa Adulamu, mu nshiku shabulobololo, ninshi impuka ya Bafilisiti nabacita inkambi mwishika lya Refaimu. ¹⁴ Pa nshita ilya Davidi ali mwilinga, elyo akamba ka bashilika ba Bafilisiti nako kaleikala mu Betelemu. ¹⁵ Awe Davidi nao alefwaisha amenshi elyo asosa ati, “Yangu ifyo ningatemwa nga cakuti umo andetelako amenshi yakunwa ukufuma mu cishima ca mupepi ne mpongolo ya ku Betelehemu.” ¹⁶ Awe impalume shitatu shaima, shalalanya pakati ka mipaka ya Bafilisiti, shatapa na menshi ukufuma mu cishima caba mupepi ne mpongolo ya Betelehemu no kusenda ukutwala kuli Davidi. Lelo Davidi akaana ukunwa amenshi. Mu cifulo cakunwa Davidi ayetila kukuyatuula ku cinso cakwa Yawe. ¹⁷ Atile ati, “Yawe nampusushe, nacibe ukutali ici cintu! Bushe uku tekunwa umulopa wa bantu abaile nabashitika ubumi bwabo abene kukufwa?” Kanshi Davidi akaana ukunwa. Efyo ishi mpalume shitatu shacitile. ¹⁸ Abishai munyina wakwa Yoabu umwana mwaume wakwa Seruiya ewali umukalamba pali ishi mpalume shitatu. Ena ewaimishe ifumo lyakwe alasaula abalwani imyanda itatu no kubepaya. Elyo aisa ba ne shina ilyalumbuka nga aba bene batatu. ¹⁹ Bushe ena tewalumbwike nganshi ukucila pali batatu? Icakuti aisa ba no mukalamba wabo, nangu cali ukuti tapendelwe pakati kabo. ²⁰ Benaya umwana mwaume wakwa Yehoiyada, umwina Kabiseli, ali ni mpalume yapilikita kukulwa, umuntu uwacitile ifintu ifingi ifyabulamba. Aipeye abantu abapambana abena Moabu. Elyo kabili atentemukila mu cilindi ninshi kuli na menshi makasa, no kwipayamo inkalamo. ²¹ Kabili aipaya no mwina Egupto uwalunduka nganshi. Nangu umwina Egupto akwete ifumo mu minwe yakwe, Benaya nao aile kuli ena ne nkontofye. Amusompola ifumo mu minwe, amwipaila na kwifumo lyakwe line. ²² Efintu ifyo Banaya umwana mwaume wakwa Yehoiyada acitile. Uyu nao wine ishina lyakwe lyali ilyaishibikwa kwati ni mpalume shitatu isha bantu. ²³ Ali uwacindikwa nganshi ukucila pali onse uwa pa makumi yatatu, nomba tapendelwe pali balya batatu. Elyo Davidi epakumucita ukuba kangalila wa bakalinda wakwe. ²⁴ 24Impalume shimbi isha mu ba makumi yatatu ni aba: Asaeli munyina wakwa Yoabu, Elianani umwana mwaume wakwa Dodo umwina Betelemu, ²⁵ Shamaya umwina Harodi, Elika umwina Harodi, ²⁶ Helesi umwina Paliti, Ira umwana mwaume wakwa Ikeshi umwina Tekoa, ²⁷ Abiesa umwina Anatoti, Mebunayi umwina Hushati, ²⁸ Salimoni umwina Ahoyi, Maharayi umwina Netofa, ²⁹ Helebu umwana mwaume wakwa Baanaya umwina Netofa, Itai umwana mwaume wakwa Ribai umwina Gibea wa ku Benjamini, ³⁰ Benaya umwina Piratoni, Hidayi wa ku tumimana twa ku Gashi, ³¹ Abi Aliboni umwina Aribati,Asimafeti umwina Baharumi, ³² Eliaba umwina Shaaliboni abana baume bakwa Yesheni, ³³ Yonatani umwana mwaume wakwa Shamaya umwina Harari, Ahiamu umwana mwaume wakwa Sharari umwina Harari, ³⁴ Elifeleti umwana mwaume wakwa Ahasibai umwina Maakati, Eliamu umwana mwaume wakwa Aitofeli umwina Gilo, ³⁵ Hesiro umwina Kameli, Palai umwina Aliba, ³⁶ Igali umwana mwaume wakwa Natani umwina Soba, umwana mwaume wakwa Hagiri, ³⁷ Seleki umwina Amoni, Naharai umwina Beroti, kasenda wa fyanso fyakwa Yoabu umwana mwaume wakwa Seruiya, ³⁸ Ira umwina Itira, Garebu umwina Itira elyo na, ³⁹ Uria umwina Hiti. Bonse pamo bali amakumi yatatu na cine lubali.