¹ Ilyo ifi fyonse fyapitile, Amunoni mwana Dabidi alitemenwe Tama uwali umusuma nganshi. Ali ni nkashi yakwa Abusalomu umwana wakwa Dabidi. ² Awe Amunoni tepakucululuka mu mutima, icakuti camufisha na mukulwala pa mulandu wakwa nkashi yakwe Tama. Pa mulandu wakuti Tama ali ni nacisungu, calikosele kuli Amunoni ukuti acite ico alefwaya kuli Tama. ³ Nomba Amunoni alikwetepo umunankwe ishina lyakwe ni Yonadabu umwana wakwa Shimeya, munyina wakwa Davidi. Yonadabu ali umucenjeshi nganshi. ⁴ Awe aipusha Amunoni ati, “Bushe mulandu nshi iwe, we mwana wa mfumu, ulemonekela uwabulanda cila lucelo? Bushe teti unjebeko?” Amunoni atile kuli ena, “Ine nalitemwa Tama, inkashi yakwa munyinane Abusalomu.” ⁵ Elyo Yonadabu amweba ati, “Kabiye ku busanshi bobe usendame kwati naulwala. Ilyo bawiso baleisa kukukumona, ubebe ati, ‘Ndefwaya nkashi yandi Tama ese apekanye icakulya pa cinso candi ilyo ndemonako, pakuti ese andisheko ukufuma mu minwe yakwe.’” ⁶ Awe Amunoni aya lambalala pa musengele apashanya kwati mulwele. Ilyo imfumu yaisa mukumumona, Amunoni asosa ku mfumu ati, “Kuti natemwa nkashi yandi Tama aisa mpangilako utumikate utwawamisha pa cinso candi pakuti ndye ku filefuma ku minwe yakwe.” ⁷ Elyo Davidi atumine ishiwi kuli Tama kwisano ati, “Kabiye ku ŋanda yakwa ndume yobe Amunoni uye mupekanishako ifyakulya fimo.” ⁸ Awe Tama epakuya ku ŋanda yakwa ndume yakwe Amunoni, uko asendeme. Abuula umufuba umo, aukasawila, apangamo umukate ninshi Amunoni alemonako, elyo afumbika. ⁹ Epakubuula pani afumyapo umukate nokupeela Amunoni ukuti alye, nao akaana ukulya. Elyo asosa ati, “Fumya abantu bonse kuno.” Abantu bonse epakufumamo bamusha baya. ¹⁰ Elyo Amunoni aeba Tama ati, “Ndetela ifyakulya kuno ku muputule wandi uwakusendamako pakuti undisheko ne minwe yobe.” ¹¹ Tama nao abuula umukate acipekanya no kutwala kuli ndume yakwe Amunoni ku muputule wakwe uwakusendamako. Lelo ilyo atwala kuli ena ukuti alye, Amunoni amufukukila nokutila, “Isa tulale na iwe, we nkashi yandi.” ¹² Nao Tama atila kuli Amunoni, “Tecakwesha we ndume yandi! Wimpatikisha. Pantu ica musango uyu tacatala acicitika mu bena Israeli! Wicita ici cintu icabipa. ¹³ Nomba ine, ni kwi nkatwala uyu musebanya wandi? Na iwe, uli nokubafye iciwelewele ca muntu mu bena Israeli. Nakupapata landafye ku mfumu pantu tekuti ikaanye ine ukupwa kuli iwe.” ¹⁴ Lelo Amunoni akaana ukumfwa kuli Tama, nomba ico icakuti ali na maka ukumucila, asuka amunasha, asendama nankwe ¹⁵ Elyo Amunoni apata Tama nganshi, kabili impatila yakwe kuli Tama yacilile pafyo amutemenwe. Amunoni aeba Tama ati, “Ima, no kufuma uleya!” ¹⁶ Tama nao akaana, nokutila kuli ena, “Iyoo nshaye! Ala ukuntamfya calabipishapo nganshi ukucila nefyo ucitile kale kuli ine.” Lelo Amunoni wena akaanininafye ukumfwa kuli Tama. ¹⁷ Amunoni epakwita umubomfi wakwe nokumweba ati, “Shifumya uyu mwanakashi muno elyo wisalisheko ku ciibi panuma nga afuma.” ¹⁸ Awe umubomfi wakwe amufumya elyo aisalako ne ciibi panuma ilyo Tama afuma. Tama afwele umwingila wa maboko ayatali uwamutengo, pantu efyakufwala abana ba mfumu abanakashi banacisungu balefwala. ¹⁹ Tama epakuisuba imito mu mutwe no kulepula insalu ya mwingila wakwe afwele. Abika na maboko pa mutwe wakwe, aya aleloosha apakalamba ilyo aleya. ²⁰ Elyo ndume yakwe Abusalomu asosele kuli Tama ati, “Bushe ni Amunoni ndume yobe ewakubifya? Nomba talala we nkashi yandi. Ala ni ndume yobe. Tecakwesha ukubika ici cintu ku mutima.” Elyo Tama aikala na mu ŋanda yakwa ndume yakwe Abusalomu, umweo uwa nkumbabulili. ²¹ Ilyo imfumu yaumfwile fyonse ifi, yalifulilwe nganshi. Nomba imfumu yalifililwe ukumucita icintu nelyo cimo pantu uyu ewali umwana wakwe ibeli, elyo alimutemenwe nganshi. ²² Lelo Abusalomu tatalile alanda ishiwi nangu limo kuli Amunoni, ilibi nangu ilisuma, pantu alimupatile pakupatikisha ukusendama na nkashi yakwe. ²³ Panuma ya myaka ibili, ilyo bakabeya ba mpaanga shakwa Abusalomu bali ku Baali Hasori mupepi no mupaka wa ku Efulemu, Abusalomu aitile bonse abana ba mfumu abaume. ²⁴ Abusalomu epakuya ku mfumu nokutila, “Umubomfi obe aisa na bakabeya ba mpaanga. Bushe imfumu na bacilolo baiko kuti batemwa ukwisa sangwako?” ²⁵ Imfumu yamwasuka aiti, “Iyoo mwana wandi. Ifwe bonse tekuti tuyeko, epali twakucushafye.” Awe Abusalomu aesha ukupatikisha imfumu, nalyo line yakaana ukuyako lelo yamupeelafye ipaalo. ²⁶ Elyo Abusalomu atile, “Nga cakuti teifyo, napapata kanshi lekeni tuleyafye na munyinane Amunoni.” Nayo imfumu epakumwipusha aiti, “Bushe mulandu nshi ulefwaila ukuya nankwe?” ²⁷ Nomba mu mupatikisha wakwa Abusalomu, imfumu epakuleka Amunoni pamo na bana ba mfumu abaume bonse ukuya nankwe. Elyo Abusalomu apeela icipope ku babomfi bakwe ati, “Umfweni! ²⁸ Ilyo mwalaisa mona Amunoni asansamuka panuma yakunwa umwangashi, na ine naisa mweba ati, ‘Ipayeni Amunoni,’ mwitiina, mumwipayefye. Bushe teine mpeele ici cipope? Mubefye abakosa kabili abashipa.” ²⁹ Eico kanshi ababomfi bakwa Abusalomu bacitile ifyo Abusalomu abakonkomeshe ukucita kuli Amunoni. Elyo abana ba mfumu abaume bonse baima, banina cila muntu pali punda wakwe no kufulumuka. ³⁰ Ilyo bacili mu nshila baleya, kwafika akasebo kuli Dabidi akakutila, “Abusalomu naipaya bonse abana ba mfumu abaume, tapali nangu umo pali bena uushelepo.” ³¹ Awe imfumu yaima apo yaikele no kulepaula ifyakufwala fyaiko no kulambalala panshi. Kabili bonse ababomfi baiko abaiminine pantu yali, nabo balepaula ifyakufwala fyabo. ³² Lelo Yonadabu mwana Shimeya, munyina wakwa Davidi asosa ati, “Mwe shikulu mwitila amuti ni bonse abana ba mfumu bepeye iyoo, ni Amunoni eufwilefye. Ifi fyalimoneke kuli Abusalomu ukuti eyali amapange yakwe nakale, ukutulafye pa bushiku Amunoni alele na nkashi yakwe Tama kumaka. ³³ Mwe shikulu wandi, cimusakamika ku kasebo kakutila abana ba mfumu abaume nabafwa. Ni Amunoni ekafye eufwile.” ³⁴ Ninshi pali iyi nshita Abusalomu nafulumuka. Nomba umulinshi umo uwaiminine ainuna amenso lwa pamulu elyo amona abantu abengi bali mu musebo, lwa ku masamba yakwe baleisa mu mbali ya lupili. Elyo umulinshi aya eba imfumu ukutila, “Ine namona abantu ku ntunga ya ku Horonaimu, mu mbali ya lupili.” ³⁵ Yonadabu nao asosa ku mfumu ati, “Moneni abana ba mfumu abaume aba pano, neci cacitikafye pamo ngefyo umubomfi wenu asosele.” ³⁶ Ilyofye apwa ukulanda, awe abana ba mfumu abaume baingila, balalila imisowa mukwikatisha. Imfumu nayo pamo na babomfi baiko, balaloosha apakalamba. ³⁷ Lelo Abusalomu afulumwike no kuya kuli Talimai mwana Amihudi, imfumu ya Geshuri. Lelo imfumu Davidi yena yalalooshafye umwana waiko inshiku shonse. ³⁸ Panuma yakufulumuka kwakwa Abusalomu aile ikala ku Geshuri pa myaka itatu. ³⁹ Kabili umupashi wa mfumu Davidi walefuluka ukuya kuli Abusalomu, pantu balimukoselesheko pa mulandu wa mfwa yakwa Amunoni.