¹ Kabili pakwaluka kwa mwaka pa nshita ilya imfumu shifuma ukuya ku nkondo, Dabidi atumine Yoabu pamo na bacilolo bakwe elyo ne fita fyonse ifya bena Israeli. Nabo baya ipaulula abena Amoni no kupokolola umusumba onse uwa Raba. Lelo Dabidi wena ninshi nashala mu Yerusalemu. ² Icungulo cimo Dabidi aima pa busanshi bwakwe no kwamba ukwendauka pa mutenge wa ŋanda ye sano. Lintu acili pa mutenge, alolesha panshi amona umwanakashi aleowa. Uyu mwanakashi ali umusuma nganshi. ³ Elyo Dabidi atuma uwakwipusha pali uyu mwanakashi. Umwaume asosa ati, “Bushe uyu, te Batisheba, umwana umwanakashi wakwa Eliamu kabili umukashi wakwa Uria umwina Hiti?” ⁴ Elyo Dabidi atuma abakuya mubuula. Awe nao aisa kuli Dabidi no kulala nankwe. Pali iyi nshita ninshi Batisheba ali uwasanguluka ku kukowela kwakwe. Elyo abwelela kumwakwe. ⁵ Umwanakashi uyu, aimita elyo atuma amashiwi kuli Dabidi atila, “Ine ninjimita.” ⁶ Dabidi kanshi epakutuma amashiwi kuli Yoabu ati, “Ntumina Uria umwina Hiti.” Nao Yoabu atuma Uria kuli Dabidi. ⁷ Ilyo Uria afikile kuli Dabidi, amwipusha umutende wakwa Yoabu ifyo uli, ifyo ifita fili elyo nefyo inkondo ileenda. ⁸ Elyo Dabidi aeba Uria ati, “Kabiye, tentemukila ku ŋanda yobe no kusamba amakasa yobe.” Awe Uria afuma mwisano aya. Kabili imfumu yamukonkesha icabupe ukufuma kwisano kwine. ⁹ Lelo Uria taile kumwakwe ngefyo bamwebele, asendeme pa mwinshi wa mpongolo pamo pene na bonse ababomfi bakwa shikulu wakwe. ¹⁰ Ilyo Davidi aumfwa ukuti Uria taciya ku ŋanda, amwipusha ati, “Bushe taufumine pa lwendo ulutali? Cinshi ico tawailile ku ŋanda?” ¹¹ Uria atile kuli Davidi, “Imbokoshi ya Cipangano, abena Israeli elyo na bena Yuda bonse bekala mu matenti. Kabili shikulu Yoabu elyo na babomfi bakwa shikulu nabo bacita inkambi mu mpanga, pa lwalala. Nga ine kuti naya shani ku ŋanda yandi kukulya, kukunwa elyo no kulala no mukashi wandi? Icine cine apo iwe uli no bumi, teti ncite icintu ica musango ngoyu!” ¹² Elyo Dabidi atila kuli ena, “Cisuma ikala pano pene ubushiku bwa lelofye, mailo nkakuleka ukubwelelamo.” Kanshi Uria epakushala mu Yerusalemu pali bulya bushiku elyo nobwakonkelepo. ¹³ Elyo Dabidi aita Uria kukulya no kunwa nankwe, amulenga no kukolwa. Lelo mu cungulo Uria aya mukusendama pa butanda bwakwe pamo na babomfi bakwa shikulu wakwe. Kumwakwe ku ŋanda kwena taileko iyoo. ¹⁴ Ubushiku bwakonkelepo ulucelo, Davidi alemba inkalata kuli Yoabu no kupeela Uria ukusenda. ¹⁵ Muli kalata alemba atila, “Bika Uria apo ubulwi bulumishe mu mulongo wantanshi. Elyo mubwelele kunuma yakwe pakuti bamukome no kufwa.” ¹⁶ Kanshi cilya Yoabu aba pakushinguluka uyu musumba, alishibe apali ifita ifyakosa nganshi mukucingilila uyu musumba, epo abika Uria. ¹⁷ Ilyo abantu ba mu musumba bafuma mukulwisha Yoabu, bamo abaume bakwa Davidi abali ifita fyakwe baipaiwa pamo pene na Uria umwina Hiti nao afwila kumo. ¹⁸ Elyo Yoabu atumine kuli Dabidi amashiwi yonse aya pa mulandu wa bulwi. ¹⁹ Akonkomesha kapaso ati, “Ilyo uleya pwisha ukusosa imilandu yonse iyi iya bulwi ku mfumu, ²⁰ limbi aya mashiwi kuti yaimya ubukali ku mfumu, kabili kuti yakwipusha aiti, ‘Nga mulandu nshi mwapalamineko ku musumba kukulwa? Bushe tamwaishibe ukuti aba pa cibumba kuti bamilasa imifwi? ²¹ Nga uwaipaye Abimeleki mwana Yerubesheti nani? Bushe te mwanakashi amulashile impelo ye libwe ukufuma pelinga pakuti afwe mu Tebeshi? Mulandu nshi mwaikalile mupepi ne linga?’ Nga cakuti yakwipusha pali ici, elyo utile kuli yena, ‘No mubomfi wenu Uria umwina Hiti nao nafwa.’” ²² Awe inkombe yalile, elyo ilyo yafika, yaeba Davidi amashiwi yonse bamutumine ukusosa. ²³ Inkombe yaeba Dabidi aiti, “Abantu balitucila amaka no kwisa mukutulwisha pa lwalala. Lelo kwena twali bafulumuna mpakafye na ku mwinshi wakwingilila pa mpongolo ya musumba. ²⁴ Elyo abali na mata balashile ababomfi benu ne mifwi ukufuma pa cibumba no kwipayapo bamo abantu ba mfumu. Nakabili no mubomfi wenu Uria umwina Hiti nao nafwa.” ²⁵ Elyo Dabidi aeba inkombe ati, “Eba Yoabu utile, ‘Ici, ciikusakamika, ulupanga lwena lwipaya uyu elyo noyu wine. Ikatishafye ukulwisha umusumba no kuonaula. Umwebe Yoabu ifi pakumukoselesha.’” ²⁶ Ilyo muka Uria aumfwile ukuti umulume wakwe nafwa, alaloosha umulume wakwe. ²⁷ Na panuma ya nshita yakuloosha, Davidi atuma abakuya leta muka Uria ku ŋanda kumwakwe. Awe nao aisa ba umukashi wakwe. Kabili amufyalila umwana umwaume. Lelo ici cintu Davidi acitile tacasekeshe Yawe