¹ Panuma ya mfwa yakwa Ahabu, abena Moabu basangukile abena Israeli. ² Nomba Ahasia aliponene pa ncende yakutuushishamo iyali pa mutenge wa ŋanda ya kwisano, iyali mu Samaria, no kuicena nganshi. Elyo atuma inkombe nokusheba ati, “Kabiyeni muye buka kuli Baali Sebubu, umulungu wa ku Ekironi, pakuti mwishibe nga ndi nokupola kuli ifi naicena.” ³ Lelo malaika wakwa Yawe alandile kuli Eliya umwina Tishibe ati, “Ima uye kumanya inkombe sha mfumu ya ku Samaria. Uye bepusha ati, ‘Bushe tamwaba Lesa mu Israeli pakuti muye mukubuka kuli Baali Sebubu, umulungu wa ku Ekironi?’ ⁴ Kanshi ifi efyo Yawe alanda ati, ‘Iwe tauli no kwima pa musengele ulelepo, ulifye no kufwa.’” Eliya aima aya no kuya. ⁵ Ilyo inkombe shabwelele ku mfumu, yalibepwishe aiti, “Cinshi ico mwabwelela?” ⁶ Bayasuka abati, “Umuntu aciisa tukumanya no kutweba ati, ‘Bwelelenimo ku mfumu imutumine, muye yeba amuti, ifi efyo Yawe alanda ifyakuti, bushe tamwaba Lesa mu Israeli eco watumina abakuya buka kuli Baali Sebubu, umulungu wa ku Ekironi? Eico tawaime pa musengele ulelepo. Ulifye nokufwa!’” ⁷ Imfumu yabepusha ati, “Bushe aciba muntu wa musango nshi uyo uwaciisa mukumanya no kumweba aya mashiwi?” ⁸ Bayasuka abati, “Aciba muntu umwaume nafwala ne cakufwala icamasako. Afwele no mushipi wa mpapa mu musana wakwe.” Imfumu ati, “Ni Eliya umwina Tishibe.” ⁹ Elyo imfumu yatuma umukalamba wa bashilika pamo na bashilika bakwe amakumi yasano. Umukalamba wa bashilika aya fika kuli Eliya, amusanga naikala pa mulu wa lupili no kumweba ati, “We muntu wakwa Lesa, imfumu ilekwita ika! ¹⁰ Lelo Eliya ayasuka umukalamba wa bashilika ati, “Nga cakuti ndi muntu wakwa Lesa, umulilo naufume ku mulu no koca iwe pamo na bashilika bobe amakumi yasano.” Elyo umulilo waponene ukufuma ku mulu no koca umukalamba wa bashilika pamo na bashilika bonse. ¹¹ Pa numa ya ifi, imfumu yatuma nakabili umukalamba wa bashilika na bashilika bakwe amakumi yasano kuli Eliya. Umukalamba wa bashilika amweba ati, “We muntu wakwa Lesa umfwa ifyo imfumu yasosa ukutila, ika nombalinefye.” ¹² Eliya ayasuka ati, “Nga cakuti ndi muntu wakwa Lesa, umulilo naufume ku mulu no koca iwe pamo na bashilika uli nabo amakumi yasano.” Elyo umulilo wapona ukufuma ku mulu no koca umukalamba wa bashilika pamo na bashilika ali nabo amakumi yasano. ¹³ Imfumu pa muku walenga butatu, yatuma umukalamba wa bashilika na bashilika amakumi yasano. Uyu mukalamba wa bashilika uwalenga butatu ena ilyo afika afukama pa cinso cakwa Eliya no kupapata ati, “We muntu wakwa Lesa, napapata umfwila uluse umweo wandi ne myeo ya bantu aba amakumi yasano ababomfi bobe. ¹⁴ Mona, umulilo naufuma ku mulu no koca abakalamba babili aba bashilika abacintangilila ukwisa kuno pamo na bashilika baciba nabo. Nomba umfwila uluse umweo wandi.” ¹⁵ Elyo Malaika wakwa Yawe aeba Eliya ati, “Kabiyeni nankwe, wimutiina iyoo.” Kanshi Eliya epakwima aya nankwe ku mfumu. ¹⁶ Aya eba imfumu ati, “Ifi efyo Yawe alanda ifyakutila, ‘Bushe tamwaba Lesa mu Israeli pakuti wambe ukubuka nga filya wacituma inkombe shakuya mukubuka kuli Baali Sebubu umulungu wa ku Ekironi? Pa mulandu wakucita ici, tauli nakufuma mu musengele ulelepo. Ala ulifye no kufwa!’” ¹⁷ Elyo afwa, ukulingana ne shiwi lyakwa Yawe ilyo Eliya asosele. Pa mulandu wakuti Ahasia takwete umwana mwaume, Yoramu munyina ewamupyene pa bufumu mu mwaka walenga bubili uwa pa bufumu bwakwa Yehoramu umwana mwaume wakwa Yehoshafati imfumu ya bena Yuda. ¹⁸ Lelo palwa fintu fimbi ifya pa bufumu bwakwa Ahasia, elyo nefyo acitile, bushe tafyalembwa mu citabo ca milandu ya shamfumu sha bena Israeli?