¹ Panuma ya myaka amakumi yabili, inshita iyo Solomoni akuulilemo iŋanda yakwa Yawe elyo ne sano lyakwe, ² atendeke ukukuula imisumba iyo Hiramu amupeele, elyo apeela na bena Israeli ukwikalamo. ³ Solomoni epakuya lwisha umusumba wa Hamati Soba no kuupoka. ⁴ Kabili akuula Tadimo mu matololo elyo ne misumba iya matala iyo akuulile mu Hamati. ⁵ Akuula cipya cipya Beti Horoni wa pamulu elyo na Beti Horoni wa pesamba nge misumba iyacingililwa na malinga. Kwaba ne fibumba ne mipilikisho yakwisalilako. ⁶ Kabili akuula umusumba wa Baalati, ne misumba umwali amatala. Akuula ne misumba umwali ifita na maceleta ayo akwete na bakabalwe bakwe. Elyo Solomoni akuula na fyonse ifyo atemenwe ukukuula mu Yerusalemu, mu Lebanoni na mu ncende shonse umo aleteeka. ⁷ Kwaliko abantu bambi abashele mu calo abo abashali abena Israeli pamo nga bena Hiti, abena Amoni, abena Perisi, abena Hifi na bena Yebusi. ⁸ Aba bali abana ba mishobo iyo abena Israeli bafililwe ukulofya. Kanshi Solomoni epakubabuula abacita abasha bamulaasa ngefyo caba ukufika na pa bushiku bwa lelo. ⁹ Lelo Solomoni tapangilepo abena Israeli ukuba abasha abakubomba imilimo yakwe, bena balifye ifita fya bulwi, abakalamba bakutungulula bakangalila ba fita, abakalamba bakutungulula amaceleta na bamushiika bakutungulula abakwensha amaceleta. ¹⁰ Aba ebali bacilolo bakalamba abakwa Solomoni imfumu, bonse pamo bali 250 abakwangalila abanabo. ¹¹ Elyo Solomoni ayakuusha mwana Farao ukufuma ku musumba wakwa Davidi, amuleta kwisano amukuulile. Pantu atile, “Umukashi wandi tafwile kwikala mwisano lyakwa Davidi imfumu ya bena Israeli pa mulandu wakuti incende apeshile Imbokoshi ya Cipangano cakwa Yawe yamushilo.” ¹² Elyo Solomoni atuula amalambo yakoca kuli Yawe pa bulambo akuulile Yawe pantanshi ya muputule uwakwingililamo. ¹³ Atuula ukulakonka ififwaikwa cila bushiku umwabela amafunde yakwa Mose palwa Masabata, imyeshi iyipya elyo ne nshikunkulu shitatu isha cila mwaka, ekutila inshikunkulu ya mukate ushatutumuka, inshikunkulu ya milungu ne nshikunkulu ya nsakwe. ¹⁴ Umwabela ifipope fyapeele wishi Davidi emo Solomoni apeelele imilimo kuli bashimapepo, elyo na ku bena Levi abali nokutungulula mukulumbanya no kwafwilisha bashimapepo mu milimo ya cila bushiku. Asonta na bakalinda wa mpongolo mu mpuka shabo ukulingana ne mpongolo, pantu ifi efyo Davidi umuntu wakwa Lesa akonkomeshe. ¹⁵ Tabatalile abafuma kufyo imfumu yakonkomeshe bashimapepo nangu abena Levi mu cintu conse na pa mulandu onse uwakusunga icuma. ¹⁶ Kanshi imilimo yonse iyakwa Solomoni yalibombeke, ukutula apo umufula wa ŋanda yakwa Yawe wayambile mpaka no kupwisha. Kanshi iŋanda yakwa Yawe efyo yapwile. ¹⁷ Kabili Solomoni aya ku Esioni Geberi na ku Elati ku lulamba lwa bemba mu calo ca Edomu. ¹⁸ Elyo Hiramu amutumina amato ayaleensha abantu bakwe, abaishibe icimana bwino. Kanshi aba pamo na bantu bakwa Solomoni epakuya ku Ofiri no kuya letako golide amatalanta 450 no kupeela ku mfumu Solomoni.