¹ Elyo Solomoni asosa ati, “Yawe alilanda ukuti akulaikala mwikumbi ilyafiita. ² Ine ninkukuulila Iŋanda iyacindama, incende yobe iyakwikalililamo umuyayaya.” ³ Ninshi ulukuta lwa bena Israeli lucili nalwiminina palya pene, imfumu yapilibuka yabapaala. ⁴ Elyo yalanda aiti, “Napaalwe na matotelo Yawe Lesa wa bena Israeli, uwasosele ne shiwi lyakwe kuli tata Davidi, elyo kabili ku kuboko kwakwe afikilishapo ubulayo alaile. ⁵ Pantu atile, ‘Ukufuma ubushiku nafumishe abantu bandi mu Egupto, nshasalapo umusumba nangu umo uwa nko sha bena Israeli umwakukuula iŋanda umwakuba ishina lyandi. ⁶ Kabili nshasala umuntu nangu umo uwakuti abe intungulushi pa bantu bandi abena Israeli. Lelo nomba ninsala Yerusalemu ukuba umusumba umwakuba ishina lyandi, kabili ninsala Davidi ukuba imfumu iyakuteeka abantu bandi abena Israeli.’ ⁷ “Cali mu mutima wakwa tata Davidi wandi ukukuula iŋanda umwakuba ishina lyakwa Yawe Lesa wakwa Israeli. ⁸ Lelo Yawe aebele tata Davidi ati, ‘Pantu cali mu mutima obe ukukuula iŋanda umwakuba ishina lyandi, caliweme ukuti ici cibe mu mutima obe. ⁹ Nomba teiwe uli nokukuula iŋanda umwakuba ishina lyandi, lelo umwana obe umwaume uo ukafyala eukankulila iŋanda umwakuba ishina lyandi.’ ¹⁰ “Yawe alisunga ubulayo apangile. Ine nimpyana tata Davidi kabili nomba nine njikele pa cipuna cabufumu ica bena Israeli, ngefyo Yawe alaile. Kabili ninkuula iŋanda umwakuba ishina lyakwa Yawe, Lesa wakwa Israeli. ¹¹ Muli iyi ŋanda emo mbikile Imbokoshi ya cipangano cakwa Yawe, umuli icipangano cakwa Yawe ico apangana na bena Israeli.” ¹² Elyo Solomoni aiminina ku ntanshi ya bulambo bwakwa Yawe pa cinso ca lukuta lwa bantu bonse abena Israeli elyo atambalika amaboko yakwe. ¹³ Nomba, Solomoni alipangile icibumbili ica mukuba icali amakubiti yasano mubutali, amakubiti yasano mubwipi elyo na makubiti yatatu ukuya pa mulu, elyo acibikile pakati ka lubansa lwakunse. Aiminina pa mulu wa cibumbili elyo afukama pantanshi ye bumba lya bena Israeli elyo asumbwila amaboko ku mulu. ¹⁴ Alanda ukuti, “We Yawe Lesa wakwa Israeli, takwaba Lesa umbi uwaba nga iwe mu mulu nangu pano isonde. Iwe we usunga icipangano cobe icacitemwiko na babomfi bobe abo abekalilila mu nshila shobe ne mitima yacishinka ukutemwa. ¹⁵ Walisunga ubulayo bobe ku mubomfi obe tata Davidi ifyo wamulaile na kanwa kobe kabili wafifikilishapo ku kuboko kobe, fino fine caba buno bushiku. ¹⁶ “Nomba we Yawe, Lesa wakwa Israeli, sungila umubomfi obe tata Davidi ifyo wamulaile ilyo wasosele auti, ‘Tawakatale aufilwa ukukwata umwana uwakwisa ikala pa cinso candi pa bufumu bwa bena Israeli. Ifi fikacitika nga cakutifye abana bobe abaume baisunga muli fyonse ifyo balecita no kwenda pa cinso candi umwabela amafunde yandi ngefyo iwe wacitile.’ ¹⁷ Eico nomba we Yawe, Lesa wakwa Israeli, leka ishiwi lyobe ilyo walaile umubomfi obe Davidi lifikilishiwe. ¹⁸ “Bushe nomba Lesa kuti aikala pano isonde na bantunse? Apofye imyulu nangufye imyulu ya pamulu teti imukumane, bushe iyi ŋanda nkuulile eingamukumana? ¹⁹ Lelo kutika kwipepo lya mubomfi obe na ku kupapata kwakwe ukwakubelelwa uluse, we Yawe Lesa wandi. Kutika ku nkuuta na kwipepo umubomfi obe alepepa pa cinso cobe. ²⁰ Shileka amenso yobe yesukile pali iyi ŋanda akasuba no bushiku pantu ni ncende apo watile epakuba ishina lyobe, wingakutika kwipepo ilyo umubomfi obe alepepela pali ino ncende. ²¹ Wingomfwa ku kupapata kwa mubomfi obe nokwa bantu bobe abena Israeli inshita yonse ilyo baisa mukupepa pali ino ncende. Shi wingalaumfwa ukufuma ku mulu, icifulo waikalako, kabili ilyo waumfwa ulebelela uluse. ²² “Ilyo umuntu abifya umwina mupalamano wakwe kabili alefwaikwa ukwisa lapa, elyo aisa lapa umulapo pa ntanshi ya bulambo muli iyi ŋanda, lyena uleumfwa ukufuma ku mulu no kwasuka. ²³ Ulepingula pakati ka babomfi bobe no kukanda imbifi mukubwesesha pa mutwe wakwe fyonse ifyo acita. Ulefumya uwakaele mu mulandu, no kubalambula pali bucishinka bwabo. ²⁴ “Nga cakuti abantu bobe abena Israeli babacimfya ku balwani pa mulandu wakucita ifibi kuli iwe, elyo babwela no kulumbula ishina lyobe, bapepa no kupapata pa cinso cobe muli ino ŋanda, ²⁵ lyena uleumfwa ukufuma ku mulu. Ulebelela abantu bobe abena Israeli uluse pa fyabubifi fyabo, elyo no kubabwesesha ku calo wabapeele pamo ne fikolwe fyabo. ²⁶ “Ilyo imyulu yaisalika elyo ne mfula yaleka ukuloka pa mulandu wakuti abantu bacita ifyabubifi kuli iwe, elyo baisa pali ino ncende bapepa no kulumbula ishina lyobe elyo bapilibuka ku fyabubifi fyabo pantu wabakanda, ²⁷ lyena uleumfwa ukufuma ku mulu no kubelela ababomfi bobe uluse pa fyabubifi fya bantu bobe abena Israeli. Ukabafunde ne mbela isuma iyakwikalilamo, elyo watuma ne mfula pa calo ico wapeela abantu bobe ukuba icuma cacishilano. ²⁸ “Ilyo icipowe nangu icikuko caisa mu calo, nangu ukukunkutana kwa mabula nangu ukufufuma, makanta nangu ifipaso, nangu abalwani babashinguluka mu musumba uuli onse, icinkunka nangu ubulwele ubuli bonse ubwaisa, ²⁹ kabili nga bantu bobe abena Israeli bapepa nangu bapapata, na cila muntu aishiba ukushikitika no bukali bwakwe elyo atambalika amaboko yakwe ninshi yasontele kuli ino ŋanda, ³⁰ lyena uleumfwa ukufuma ku mulu, icifulo waikalako. Ulebabelelako uluse no kucitila umuntu onse umwabela imicitile yakwe, apo niwe waishiba umutima wakwe. Pantu niwefye weka uwaishiba imitima ya bantu. ³¹ Kabili cikalenga ukuti bakalekutiina no kwamba ukulaenda mu nshila shobe inshita shonse, bakulaikala mu calo wapeele ifikolwe fyesu. ³² “Na pa mulandu wa mweni uushili mu bantu bobe abena Israeli, lelo afuma ku calo ca kutali pa mulandu wa kucindama kwe shina lyobe, ne minwe yobe iyabulamba no kuboko kobe ukwatambalala, ilyo aisa pepela pali ino ŋanda, ³³ lyena uleumfwa ukufuma ku mulu, icifulo waikalako. Ulecitila uyo umwinafyalo fyonse ifyo aipusha kuli iwe, pakuti abantu bonse aba pano isonde bakeshibe ishina lyobe no kulakutiina ngefyo ucita ku bantu bobe abena Israeli elyo nokwishiba ukuti ino ŋanda nkuulile iwe emwaba ishina lyobe. ³⁴ “Ilyo abantu bobe baya ku nkondo mukulwisha abalwani babo ku ncende konse uko wabatuma, elyo bapepa kuli iwe muli uno musumba usalile kabili muli ino ŋanda nkuulile umwakuba ishina lyobe, ³⁵ lyena uleumfwa ukufuma ku mulu amapepo yabo no kupapata kwabo elyo no kubapeela ukucimfya. ³⁶ Nga babifya kuli iwe, pantu takwaba nangu umo uushibifya, elyo na iwe wabafulilwa, kabili wabapeela na mu minwe ya balwani babo, elyo babasenda muli bunkole ku calo icakutali nangu icamupepi. ³⁷ Lelo nga cakuti baalula imitima yabo mu calo babasendako bunkole, no kuya lapila no kupapata kuli iwe ilyo bacili mulya mwine mu calo ca bunkole, bakailandile na mashiwi ayakuti, ³⁸ ‘Twalibifya, kabili twalilufyanya no kuilenga aba mulandu.’ Lyena nga balapila ne mitima yabo ne myeo yabo yonse ilyo bacili muli bunkole kuli cilya cine calo babasendeleko bunkole, nga bapepa balosha na menso yabo ku calo wapeela ifikolwe fyabo, ku musumba uo wasala, ku ŋanda iyi nkuulile umwakuba ishina lyobe, ³⁹ lyena uleumfwa amapepo yabo no kupapata kwabo ukufuma ku mulu icifulo waikalako, no kubafwilishako. Kabili ulebelela abantu bobe uluse abakubifya. ⁴⁰ “Nomba we Lesa wandi, leka amenso yobe yesuke na matwi yobe yomfwe ku mapepo ayapeelwa muli ino ncende. ⁴¹ Nomba ima we Yawe Lesa, kabili wise ku cifulo cobe icakutuushishamo iwe ne Mbokoshi ya Cipangano iyili cishibilo ca bulamba bobe. Uleke bashimapepo bobe we Yawe Lesa bafwikwe ipusukilo, leka abamushilo bobe basansamuke mu busuma bobe. ⁴² We Yawe Lesa wikaana uwasubwa obe. Ibukisha ubukulu bwa kutemwa kobe ukushipwa ubo walaile umubomfi obe Davidi.”