¹ Manase afikile pa myaka yakufyalwa ikumi limo na ibili ilyo atendeke ukuteeka pa bufumu, kabili aikele pa bufumu mu Yerusalemu pa myaka amakumi yasano na isano . ² Acitile ifyabipa pa cinso cakwa Yawe mukucita ifyamuselu ifyalecitako imishobo ilya Yawe atamfishe no kubatalusha ku bena Israeli. ³ Abwekeshepo ukukuula incende shakupepelapo isho balecindika shilya wishi Hesekia aonawile. Kabili akuulile imilungu ba Baali ifibumbili fya malambo no kwimika inceshi sha mulungu Ashera. Alapepa ne fita fyonse fya mu mulu no kufitumika. ⁴ Mu kati ka ŋanda yakwa Yawe akuulamo ifibumbili fya malambo fimbi, mu ncende umo Yawe asosele ukuti, “Mu Yerusalemu emukaba ishina lyandi pe na pe.” ⁵ Mu mansa shonse shibili isha mu ŋanda yakwa Yawe akuulilemo ifita fyonse fya mu mulu ifibumbili fya malambo. ⁶ Atuula amalambo yakupisha abana bakwe abaume mu mulilo mu mupokapoka wa Beni Hinomu, alependula, alebuka, alecita ubuloshi, no kubomba na bomfwana ne mipashi ya bafwa ne ngulu. Acitile ifyabubifi ifingi pa cinso cakwa Yawe no kumulenga ukufulwa ⁷ Elyo abuula ne cilubi ico abashile ayacibika mu ŋanda yakwa Lesa, umo Lesa akonkomeshe Davidi elyo no mwana wakwe Solomoni ukuti, “Muli ino ŋanda na muno mu Yerusalemu, incende iyo nsalile pa nko shonse isha bena Israeli emo ndi nokubika ishina lyandi pe na pe. ⁸ Nshakatale nakabili ndeka amakasa ya bena Israeli ukufuma muli cino calo napeele ifikolwe fyabo nga cakuti bateka imitima mukucita fyonse ifyo nabakonkomesha mu mafunde yandi, mu fipope na mu fyebo fyandi ifyalandilwe ukupitila muli Mose.” ⁹ Lelo Manase ena alengele abena Yuda na bali mu Yerusalemu ukufuma kuli Lesa, icakuti bacita ububifi ubwingi ukucila na pa mishobo Yawe afulumwine pa ntanshi ya bena Israeli. ¹⁰ Kabili Yawe ilyo alandile kuli Manase na bantu bakwe, tabamumfwile nangu ukuposako amano. ¹¹ Eico Yawe alengele ifita fya nkondo fya bena Asiria ukubengilila. Baisa ikata Manase bamusenda umufungwa, bamwingisha ubulobo mu mona, bamukaka umunyololo wa mukuba elyo bamusenda na ku Babiloni. ¹² Lelo lilya acili alecula mu cifungo, alilila ku luse lwakwa Yawe, Lesa wakwe, no kuicefya nganshi pa cinso cakwa Lesa wa bafyashi bakwe. ¹³ Elyo alomba kuli Yawe, na Yawe amukwatila uluse. Aumfwa ukulomba no kupapata kwakwe, kanshi epakumubwesesha ku Yerusalemu na ku bufumu bwakwe. Elyo Manase aishiba ukuti Yawe, e Lesa ¹⁴ Panuma ya ifi, akuula cipya cipya ilinga lyakunse ilya ku musumba wakwa Davidi, uwali kwisamba lya mumana wa Gihoni uwali mu mukonko. Ilinga lyaya fikafye na ku Mpongolo ye Sabi lyashinguluka no lupili lwa Ofeli, kabili alipanga ukucila ilinankwe. ¹⁵ Abika abakalamba ba bashilika mu misumba yonse iya malinga iya mu Yuda. Elyo aingila mu ŋanda yakwa Yawe afumyamo imilungu imbi yonse ne cilubi abikilemo, ne fibumbili fya malambo fyonse akuulile pa lupili lwa ŋanda yakwa Lesa ulwa mu Yerusalemu no kufiposa fyonse kunse ya musumba. ¹⁶ Kabili abweseshapo ubulambo bwakwa Yawe, epo atuula ne lambo lyakwampana elyo no mutuulo wakutotela. Aeba na bena Yuda ukwamba ukulatumika Yawe, Lesa wa bena Israeli. ¹⁷ Lelo abantu bena batwalililafye ukutuula amalambo pa ncende shakupepelapo isho bacindika, Lelo, ni kuli Yawe Lesa wabo baletuula epela. ¹⁸ Palwa fintu fimbi ifyo Manase acitile pa bufumu, ukulundapofye na mapepo apepele kuli Lesa wakwe, elyo na mashiwi ayo bakamona balandile kuli ena mwishina lyakwa Yawe, Lesa wa bena Israeli, fyonse fyalilembwa mu fitabo fya mfumu sha bena Israeli. ¹⁹ Ifyali ipepo lyakwe, nefyo Lesa amumfwilile uluse, na pa milandu ya fya bubifi bwakwe no kukanakwata icishinka, nefyo akuulilepo incende shakupepelamo, no kwimika inceshi sha mulungu Ashera no tulubi lintu talati aicefye kuli Yawe, fyonse ifi fyalilembwa mu fitabo fya bakamona. ²⁰ Ilyo Manase afwile no kuya lala ukwalala ifikolwe fyakwe, bamushiikile mwisano lyakwe. Elyo umwana wakwe Amoni amupyana pa bufumu. ²¹ Amoni akwete imyaka yakufyalwa amakumi yabili na ibili ilyo atendeke ukuteeka pa bufumu, kabili aikele pa bufumu imyakafye ibili mu Yerusalemu. ²² Acitile ifyabipa pa cinso cakwa Yawe, filya fine wishi Manase acitile. Amoni ayambile ukupepa no kutuula amalambo ku tulubi tonse tulya Manase wishi apangile. ²³ Lelo tali nga wishi Manase uwaishile icefya kuli Yawe, ena alifililwe no kuicefya. Ico Amoni acitile, kulundapofye ububifi. ²⁴ Bacilolo bakwe epakumupangila mpaka bamwipaila mu ŋanda ye sano lyakwe. ²⁵ Lelo abekalacalo nabo baipaya bonse abaimine no kwipaya imfumu Amoni, babuula no mwana wakwe Yosaya eo bapyanika pa bufumu.