¹ Umupashi wakwa Lesa waishile pali Asariya umwana wakwa Odedi. ² Elyo aima aya mukukumanya Asa, aya mweba ati, “Umfwa kuli ine iwe Asa, abena Yuda bonse elyo na bena Benjamini. Yawe ali na imwe lintu na imwe muli nankwe. Nga cakuti mwamufwaya, muli nokumusanga. Lelo nga mwamusuula, nao ali nokumusuula. ³ Elyo pa nshita iyitali nganshi abena Israeli baikele ukwabula Lesa wacine, ukwabula shimapepo uwakubafunda kabili ababula amafunde. ⁴ Nomba ilyo baumfwile ubulanda, balipilibwike no kubwelela kuli Yawe Lesa wa bena Israeli, no kumufwaya mpaka bamusanga. ⁵ Muli shilya nshiku tacali icayanguka ukwendauka apo ulefwaila, pa mulandu wakuti abekalacalo bonse bali mu mafya ayakosa nganshi. ⁶ Kwaleba ukuti umushobo umo waima mukonaula umushobo unankwe, no musumba nao waima mukonaula umusumba unankwe. Neci cacitike pa mulandu wakuti Lesa alebacusha ku macushi aya misango misango. ⁷ Lelo imwe mube abakosa kabili mwibwelela numa, pantu imilimo yenu ili nokulambulwa ⁸ Ilyo Asa aumfwile aya mashiwi ya kusesema kwakwa Asariya mwana Odedi uwali kasesema, lyena akwata amaka. Abomba umulimo wakufumya utulubi utwamuselu ukufuma mu calo conse ica bena Yuda ne ca bena Benjamini elyo na mu misumba iyo apokolwele mu mpili sha Efulemu. Alungisha no bulambo bwakwa Yawe ubwali pa ntanshi ya lubansa lwa ŋanda yakwa Yawe. ⁹ Elyo alonganika abantu bonse aba mu Yuda, abena Benjamini elyo na bantu ba ku Efulemu, Manase na Simeoni abaishile ikala nabo, pantu abantu abengi balishile ukufuma ku Israeli ilyo bamwene ukuti Yawe Lesa wakwe ali nankwe. ¹⁰ Balongana mu Yerusalemu mu mweshi wabutatu mu mwaka walenga ikumi limo na isano uwakwa Asa ukuba pa bufumu. ¹¹ Pa nshita ine ilya batuula amalambo kuli Yawe aya ŋombe imyanda cine lubali, elyo impaanga pamo ne mbushi amakana cine lubali ukufuma pa fitapwa ifyo babwelele nafyo. ¹² Kabili bapangana ne cipangano icakufwaya Yawe, Lesa wa fikolwe fyabo, ne mitima yabo yonse ne myeo yabo yonse. ¹³ Elyo abo abafilwa ukufwaya Yawe, Lesa wa bena Israeli, bena kubepaya, abe muntu umwaice nangu umukalamba, umwaume nangu umwanakashi. ¹⁴ Bapanga umulapo kuli Yawe mu mashiwi ayakalamba ninshi balepunda, balelisha amapenga no kupuuta insengo. ¹⁵ Abena Yuda bonse balisekelele pali uyu mulapo pantu baucitile ne mitima yabo yonse. Bafwaile Lesa ninshi nabatemwa kabili balimusangile. Kanshi Yawe nao epakubapeela ukutuusha ku mbali shonse. ¹⁶ Kabili imfumu Asa yafumya Maaka uwali nakulu pa cifulo cakwe ica bunyina wakwa namfumu pa mulandu wakuti alipangile icamuselu ca luceshi lwa mulungu uwanakashi Ashera ku cimuti. Asa atema ici cimuti, aciputaula acocela na mu mukonko wa Kidironi. ¹⁷ Lelo nangu afililwe ukufumya incende shakupepelako isho balecindika mu Israeli, umutima wakwa Asa wali uwaipeelesha nganshi kuli Yawe mu nshiku sha bumi bwakwe bonse. ¹⁸ Aletele mu ŋanda yakwa Lesa silifa na golide ne fipe fyonse ifyo ena na wishi batuulile. ¹⁹ Takwatalile akuba inkondo mpaka ukufika mu mwaka uwalenga amakumi yatatu na isano uwa pa bufumu bwakwa Asa.