¹ Solomoni mwana Dabidi aikele bwino pa bufumu bwakwe, pantu Yawe Lesa wakwe ali nankwe elyo no kumulenga ukucindama nganshi. ² Elyo Solomoni alanda ku bena Israeli bonse ku bakalamba ba pa fita amakana, na ku bakalamba ba pa fita imyanda, kuli bashicilye elyo na ku ntungulushi shonse isha mu Israeli, na ku bakalamba ba mayanda ya bashibo. ³ Elyo Solomoni na bantu bonse abalongene baya pa ncende yakupepelapo iyo balecindika ku Gibeoni, pantu kulya kwine ekwali Itenti Lyakukumaninamo ilyakwa Lesa lilya Mose umubomfi wakwa Lesa apangile mu matololo. ⁴ Nomba Davidi panuma yakupekanya Itenti mu Yerusalemu, alile senda Imbokoshi ya Cipangano iyakwa Lesa ukufuma ku Kiriati Yarimu, aleta ku Yerusalemu. ⁵ Lelo ubulambo bwa mukuba ubwapangile Besaleli mwana Uri, nao uwali mwana Huri, bwena bwali ku Gibeoni kuntanshi ye Tenti lyakwa Yawe. Kanshi Solomoni na bantu alongene nabo epakuya pepela kulya kwine. ⁶ Solomoni anina aya fika apali ubulambo bwa mukuba ubwali pa cinso cakwa Yawe mwi Tenti lyakukumaninamo epo atuulila amalambo yakoca ikana limo. ⁷ Mu nshita ya bushiku bwine bulya Lesa amonekela kuli Solomoni elyo amweba ati, “Lomba icintu conse ico wingafwaya ukuti nkupeele.” ⁸ Solomoni ayaswike Lesa ati, “Walilanga uluse ulukalamba nganshi kuli tata Davidi, elyo na ine naunenga ukuba imfumu pa cipuna cakwa tata. ⁹ Eico we Yawe Lesa leka ubufwayo bobe kuli tata Davidi bufikilishiwe, pantu naunenga ukuba imfumu pa bantu abafula ngo lukungu lwa pano isonde. ¹⁰ Nomba umpeeleko amano no kwishiba, pakuti ntungulule aba bantu. Nga nani uwingabomba umulimo wakutungulula abantu bobe aba abacindami?” ¹¹ Lesa aeba Solomoni ati, “Pa mulandu wakukabila ici mu mutima obe, kabili icakuti taulombele icuma, ubunonshi nangu ubucindami nangu ukwipaya abalwani bobe, kabili taulombele ubumi bwakwikalila pe, lelo walomba amano no kwishiba pakutungulula abantu bandi pali abo nkusontele ukuba imfumu, ¹² eico nalakupeela amano elyo no kwishiba. Kabili ndi nokukupeela ubunonshi, icuma elyo no mucinshi ifyo imfumu ishakutangilile shishatalile ashikwata nangu ishikakonkapo tashakatale ashikwata.” ¹³ Elyo Solomoni afuma ku ncende yakupepelapo ku Gibeoni ukwali Itenti lyakukumaninamo, aya ku Yerusalemu. Elyo ayamba no kuteeka abena Israeli. ¹⁴ Solomoni alonganika amaceleta na bakabalwe. Akwete amaceleta ikana limo ne myanda ine elyo na bakabalwe amakana ikumi limo na yabili ifyo asungile mu misumba ya maceleta elyo fimbi aba nafyo mu Yerusalemu. ¹⁵ Imfumu yalenga silifa na golide ukufula nga mabwe mu Yerusalemu. Kabili yalenga ifimuti ifyalepesha ifya keda ukufula nge mikunyu ya mwisamba lya mpili. ¹⁶ Bakabalwe bakwa Solomoni babashitile ku calo ca Egupto na ku Kuwe. Bashimakwebo ba mfumu ebabashitile ukufuma ku Kuwe. ¹⁷ Umutengo we celeta limo ukufuma ku Egupto wali indalama amashekeli ya silifa imyanda mutanda elyo kabalwe umo pa mashekeli ya silifa 150. Bashimakwebo bakwa Solomoni nabo baleshitisha ku shamfumu shonse isha bena Hiti na bena Aramu.