¹ Eliya umwina Tishbe ukufuma ku Tishbe mu Giledi, atile kuli Ahab, ''Nga Yawe, Lesa wa bena Isreali wa mweo, naiminina ku ntanshi yakwe , takwakabe icime nangu imfwa ino imyaka kanofye inkasose.'' ² Icebo cakwa Yawe caishile kuli Eliya catile, ³ ''Fumeni pamo na ukuya ku citungu ca ku kabanga; ufise we mwine na mumana wa mukuku wa Kerithi, ku kabanga ka Yodani. ⁴ cikacitika ukutila ukanwa ukufuma mu mumana wa mukuku, kabili nkakonkomesha ba mwankole ukulakulisha kulya.'' ⁵ Eico Eliya aile na ukucita ifyo icebo cakwa Yawe camukonkomenshe. Aile mukwikala ku mumama wa mukuku uwa Keliti, ku kabanga ka Yodani. ⁶ Ba mwankole bamuletele umukate ne nama ulucelo na umukate na inama icungulo bushiku, kabili alenwa ukufuma mu mumana wa mukuku. ⁷ Lelo panuma ya kashita akanono umumana wa mukuku walyumine pa mulandu tamwali imfula mu calo. ⁸ Elyo ishiwi lyakwa Yawe lyaisa kuli Eliya aliti, ⁹ “Ima nombaline kabiye ku Sarepati iya ba ku Sidoni eko uye wikale. Ninkonkomesha namfwilwa wa kuli ilya ncende ukuya kupeelako ifyakulya.” ¹⁰ Kanshi Eliya epakuya ku Sarepati. Ilyo afika pa mpongolo ya musumba, aya sanga namfwilwa aleteba inkuni. Elyo amwita no kumweba ati, “Mpeelako amenshi mu lukombo ayakuti nwe?” ¹¹ Cilya aima ukuya mukubuula amenshi, kabili amubilikisha ati, “Napapata undeteleko na kamukate.” ¹² Namfwilwa ayasuka ati, “Mu cishinkafye cakwa Yawe Lesa obe uwamweo, ine nshikwete umukate nangu umo. Nkwetefye utubunga utunono mu mpakwilo no tumafuta utunono mu musukupala. Ndeteba inkuni, ntwale ku ŋanda ishakuya ipikila utwakuti ine no mwana wandi umwaume tulye, elyo tufwe.” ¹³ Eliya amweba ati, “Witiina iyoo. Kabiye ku ŋanda no kuya cita ifyo walanda. Nomba icantanshi upange akamukate akanono aka ine ukufuma pali uto twine ukwete no kuleta kuli ine, elyo upange iya iwe no mwana obe umwaume. ¹⁴ Pantu ifi efyo Yawe Lesa wa bena Israeli asosa ati, ‘Ubunga tabwakapwe mu mpakwilo elyo na mafuta tayali nakupwa mu musukupala obe ukushintafye na pa bushiku Yawe akalokesha imfula muno calo.’” ¹⁵ Namfwilwa aya no kuya cita ifyo Eliya amwebele. Kanshi cila bushiku kwalaba ifyakulya fyakwa Eliya, ifyakwa namfwilwa na ba mu ŋanda yakwe. ¹⁶ Kabili ubunga tabwatalile abupwa mu mpakwilo, elyo na mafuta tayatalile ayapwa mu musukupala ukulingana ne shiwi lyakwa Yawe ilyasosele Eliya. ¹⁷ Panuma ya nshita iyitali, umwana umwaume wa mwine ŋanda alwala. Ubulwele bwakoselako, na pakulekelesha umwana afwa. ¹⁸ Elyo umwine ŋanda aeba Eliya ati, “Finshi wamfulilwa, we muntu wakwa Lesa? Bushe wacisa mukuncinkula pa fyabubifi fyandi eco waipaila umwana?” ¹⁹ Eliya amweba ati, “Mpeela umwana obe,” Amubuula ukufuma mu minwe yakwe, amusenda ku muputule wa pamulu umo aleikala, elyo amulalika pa musengele wakwe. ²⁰ Elyo alomba kuli Yawe ati, “We Yawe, Lesa wandi, bushe niwe uletele ubu busanso pali uyu namfwilwa ndeikalako, pakulenga umwana wakwe ukufwa?” ²¹ Elyo Eliya alambalala pa citumbi ca mwana imiku itatu, nakabili alomba kuli Yawe ati, “We Yawe, Lesa wandi, suminisha umweo wa uyu mwana ubwelelemo muli ena.” ²² Yawe aumfwa ukulila kwakwa Eliya, no mweo wa mwana wabwelela muli ena, aba umutuntulu, ²³ Eliya aimya umwana amusenda, batentemukila mu muputule wa panshi. Amupeela kuli nyina elyo atila, “Mona umwana obe mutuntulu.” ²⁴ Elyo umwanakashi aeba Eliya ati, “Nomba naishiba ukuti uli muntu wakwa Lesa, kabili nokuti ishiwi lyakwa Yawe ilifuma mu kanwa kobe lyacishinka.”