¹ Icacitikile cakuti munshiku shakwa Amraphel, imfumu yaku Shinar, Arioki, imfumu yaku Elasa, Kedorlaoma, imfumu yaku Elam, elo na Tidal, imfumu yaku Goiim, ² balwile inkondo na Bera, imfumu yaku Sodoma, Birsha, imfumu yaku Gomorrah, Shinabi, imfumu yaku Admah, Shemeber, imfumu yaku Zeboyin, elo nemfumu yaku Bela(kabili uwitwa Zoar). ³ Ishi imfumu shisano shalikatene capamo muupokapoka wa Siddim (kabili uwitwa bemba wamucele). ⁴ Pamyaka ikumi naibili balibombele Kedorlaomer, nomba mumwaka wakulenga ikumi naitatu balimusangukile. ⁵ Nomba mumwaka wakulenga ikumi naine, Kedorlaomer elo nemfumu ishali naye shaishile elo nokusansa abena Rephaim mu Ashteroth Karnaim, abena Zuzite mu Ham, Abena Emite mu Shaveh Kiriathaim, ⁶ elo nabena Horite mufyalo fyabo ifyampili ifyabena Seir, nokucila ku El Paran, ifyo ifyapalamina kuciswebebe. ⁷ Eluntu baishile kubweluluka elo nokwisa ku En Mishpat (kabili uwitwa Kadeshi), elo nokucimfya fyonse ifyalo fyabena Amaleke, elo kabili nabena Amore abali kwikala mu Hozezon Tamar. ⁸ Eluntu imfumu yaku Sodoma, imfumu yaku Gomorra, imfumu yaku Adma, imfumu yaku Zeboyin, elo nemfumu yaku Bela (kabili uwitwa Zoar) baile elo nokuipekanya pabulwi mumupokapoka wa Siddim ⁹ ukwimina Kedorlaomer, imfumu yaku Elam, Tidal, imfumu yaku Goiim, Amraphel, imfumu yaku Shinar. Arioki, imfumu yaku Ellasa; imfumu shine ukwimina imfumu shisano. ¹⁰ Lelo umupokapoka wa Siddim waiswilemo nefilindi fyamanenekela, elo imfumu shaku Sodoma elo na Gomorra shafulumukile, nokuponena mulya mwine. Abo abashele bafulumukile kumpili. ¹¹ Eico imfumu shasendele ifipe fyonse ifyamu Sodoma elo na Gomorra elo na fyonse ifyakulya, elo nokuya. ¹² Uluntu baile, basendele na Loti, mwana munyina wakwa Abram, uwali kwikala mu Sodoma, pamo nefyakaniko fyakwe fyonse. ¹³ Umo uwabutukile aishile elo nokweba Abram umu Yuda. Alikwikala mupepi nefimuti fya oaki ifyo ifyakwa Mamre, umwina Amore, uwali munyina wakwa Eshkol elo na Anere, uwali mucipangano na Abram. ¹⁴ Lelo uluntu Abram aumfwile ukuti abalwani balikete lupwa wakwe, asendele abaume imyanda itatu elo nekumi limo nacine konsekonse (318) abakanshiwa abafyalilwe mung'anda yakwe, elo alibapepekele ukufika fye naku Dan. ¹⁵ Apatwile abaume bakwe pali bo ubushiku elo nokubasansa, elo nokubapepeka ukufikafye naku Hobah, icaba kapinda kakukulyo akaku Damascus. ¹⁶ Eluntu aishile kubwesha ifipe fyonse, elo kabili nokubwesha lupwa wakwe Loti elo nefipe fyakwe, nabanakashi elo nabantu bambi. ¹⁷ Panuma Abram abwelulukile ukufuma kukucimfya kedorloamer elo nemfumu ishali naye, imfumu yaku Sodoma yaishile kuya kukumukumanya pamupokapoka wa Shaveh (kabili uwitwa umupokapoka wamfumu). ¹⁸ Mekisedeki, imfumu yaku Salemu, aletele umukate elo nomwangashi. Ali nishimapepo wakwa Lesa mukulu. ¹⁹ Alimupalile nokulanda ati, '' Apalwe Abram pali Lesa mukulu, Kabumba wamulu elo necalo. ²⁰ Apalwe Lesa mukulu, uupele abalwani bobe mumaboko yobe.'' Eluntu Abram aishile kumupela icekumi capali fyonse. ²¹ Imfumu yaku Sodoma yalandile kuli Abram, '' Mpela abantu, elo isendele wemwine ifipe.'' ²² Abram alandile kumfumu yaku Sodoma, '' Ndimishe ukuboko kwandi kuli Yaweh, Lesa mukulu, Kabumba wamulu elo necalo, ²³ ukuti ntakasende ubushishi, inshinga shapandyato, nangula icili conse icobe, pakwebati taulandile ati, '' Ndilengele Abram ukunonka! ²⁴ Ntakasende akali konse kanofye ifyo bakalume balile elo necakaniko cabaume abo abaile nanebo. Leka Anere, Eshkol, elo na Mamre basende ifyakaniko fyabo.''