¹ Aya emashina yabana abaume bakwa Israeli abaishile ku egypti pamo na Yakobo, cila muntu naba mung'anda yakwe. ² Rebeni, Simeoni, Lebi na Yuda, ³ Isakari, Sebuluni, na Benjamini, ⁴ Dani, nefutali, Gadi na Ashere. ⁵ Nomba abantu abafumine muli Yakobo bali amakumi cine lubali. Yosefu ali kale mu Egypti. ⁶ Kabili Yosefu, na bamunyina, basukile bafwa bonse abankulo ilya. ⁷ Abaana bakwa Israeli nalifyalishe bafulile nganshi, kabili balefulilakofye na mumpendwa, nokulakwatilako na maka nganshi; kabili basukile bakumana mpanga yonse. ⁸ Awe ilyo line kwaime imfumu ipya mu Egypti ishaishibe palwa kwa Yosefu. ⁹ Yatile kubantu bakwe ati, ''Moneni, abena Israeli nabafula kabili nabakwata namaka ukutucila. ¹⁰ Iseni, lekeni tubapite pamano, pantu bakonkanyapo ukufula, nobulwi nga bwaima, bakailunda kuba lwani besu, bakalwa naifwe, bakafume na mu calo cesu.'' ¹¹ Epakusontela abakalamba abakubabomfya mu mulimo wabusha, muleke abena Israeli bakulule Farao imisumba umwali amatala. Pitomu na Raamsese. ¹² Leelo ilyo abena Egypti balebacushisha, abena Israeli nabo balefulilako mumpendwa yabo ukufula. Kabili abena Egypti baikatwa no mwenso ukalamba pa mulandu wa bana bakwa Israeli. ¹³ Neci calengele abena Egypti ukulabomfya bamwana Israeli buluku buluku. ¹⁴ Kabili bakonkenyepofye ukucusha ku milimo yakukandila iloba lyebumbano wakutama amatafwali, na kumilimo yonse iya mumpanga. Umulimo onse ilya lebombwa yali iya kosa. ¹⁵ Elyo imfumu ya mu Egypti yaebele bana cimbusa wa ba Hebere umo ishina lyakwe ni Shifra ne shina lya umbi ni Pua, ¹⁶ ukuti, ''Ilyo muleafwilisha bana mayo aba Hebere abali pabukulu ukuti bapape kabili ilyo bali pamabwe yakufyalilapo mwamona umwana umwaumwe, mukamwipaye, leelo nga mwanakashi, mukamuleke umutuntulu. ¹⁷ Leelo bana cimbusa abaletina Lesa, tabakonkele ifyo imfumu ya bena Egypti yabebele ukucita, baleleka abana abaume ukulaba no mweo. ¹⁸ Imfumu yabena Egypti yaita baana cimbusa nokubepusha ukuti, ''Cinshi ico mulelekela nabaana abaume ukuba no mweo?'' ¹⁹ Bana cimbusa nabo bayaswike Farao, ''Abanakashi aba Hebere tababa nga abanakashi abena Egypti. Apo bena balikosa, nacimbusa asangafye naipapila kale. ²⁰ Lesa alacingilila aba bana cimbusa. Kabili aba bantu bakonkenyepo fye ukufula no kulakoselako. ²¹ Nomba bana cimbusa baletina Lesa, nao abapeele indupwa. ²² Farao ayebele abantu bakwe bonse, ''Abana abaume abafyalwa mulebaposa mu mumana, lelo bena abana abanakashi mulebaleka baba no mweo.''