¹ Ulwa ku ngomba nkalamba; ulwa bikilwa ku ''nkonka ya nsebula,'' Amalumbo yakwa Dabidi. Lesa wandi, Lesa wandi nindo mwa nkankabila? ² Nindo mwabela ukutali kukiupususha nebo kabili ukutali na mashiwi ya kulilishika kwandi? Lesa wandi, ndilila mu kasuba, lelo tamungasuka, nobushiku nshabe tondolo. ³ Lelo muli bamushilo mwikala nga mfumu nama lumbo yakwa Isreali. ⁴ Ifikolwe fyali kucetekela muli webo; fyali cetekele muli we, kabili walibapuswishe. ⁵ Bali lilile kuli webo kabili bali puswike. Bali atekele muli webo tabalengelwe insoni. ⁶ Lelo ndi mwambo nshili muntu, ndi nsoni ku bantu kabili uwakusulwa ku bantu. ⁷ Bonse abambona balankonwesha, nokupunya nebo; bopukanya imitwe yabo pali nebo. ⁸ Balanda abati, ''alicetekela muli Yawe, lekeni amupusushe ico ena abekelwa muli ena. ⁹ Pantu mwamfumishe munda mwalengile nebo ukumicetekela ulo nalifye mabele yakwa Mayo. ¹⁰ Naliposwa pali mwebo ukufuma munda; muli Lesa Wandi ukutulafye ulo nali munda muli mayo! ¹¹ Mwilakuba nandi, pantu ubwafya buli mupepi; tapali na wakungafwa. ¹² Namaombe ayalume ayengi yalinshingulwike amaombe yalume ayakukosa aya ku Bashani yashingulwikile nebo. ¹³ Beswisha utunwa pali nebo ngo kuluma kwa nkalamo ikotakanya icikatwa caiko. ¹⁴ Nkompongololwa kubati menshi namafupa yandi yalisokomweke umutima wandi wi kubati lipwa; ukosungulikila mukati kandi. ¹⁵ Nobukose bwandi bwauma ngefye bumba; ululimi lwandi lukolambatila ku ncendwa sha kanwa, muli nambalikile mu lukungu lwa mfwa. ¹⁶ Pantu imbwa shanshinguluka; ibumba lya ncita tubi lya shinguka nebo; bapopele iminwe yandi na makasa yandi. ¹⁷ Kuti napenda na mafupa yandi. Bakololesha nokutontomesha pali nebo. ¹⁸ Ba akana ne nsalu shandi pakati kabo, bakopendwila napa fyakufwala fyandi. ¹⁹ Mwilakuba kutali nandi, Yawe; angukeni ku kwafwa nebo, mwe bukose bwandi! ²⁰ Pususheni umweo wandi kulupanga umweo wandifye ukufuma mu maala ya mimbulu. ²¹ Mpususheni mu kanwa kankalamo; mpokololeni naku masengo ya mboo. ²² Nkabisha ishina lyenu kuli bamunyina, napakati kebungano nkalakulumbanya mwebo. ²³ Mwe batina Yawe, mulumbanyeni! bonse mwe bamu cikota cakwa Yakobo, mulekumucindika! iminineni pali ena, bonse mwe bamu cikota cakwa Isreali ²⁴ Pantu talekelesha nangu ukusuula ukucula kwa wa titikishiwa; Yawe tabala kufisa icinso cakwe kuli ena; ulo uwatitikishiwa ali kulilila kuli ena, alyumfwile. ²⁵ ukulumbanya kwandi kukalakuba pa mulandu obe mwibungamo likalamba, nkalakfikilisha imilapo yandi kucinso cabatina ena. ²⁶ Abatitikishiwa bakalya nokwikushiwa abo abakabila Yawe bakala kumulumbanya imitima yenu ilekubelelela. ²⁷ Abantu bonse pe sonde bakebukisha nokwalukila kuli Yawe; indupwa shonse isha mu nko shikawila ku cinso cobe. ²⁸ Pantu ubufumu bwakwa Yawe; ekateeka pa nko ²⁹ Nabonse abantu abakufunguluka pe sonde bakalya amalila nokupepa bonse abo bako tentemukila ku lukungu bakawila pa cinso cakwe. ³⁰ Nenkulo ikoisapo ikalakumupyungila; bakesa kweba ne nkulo yakukonkapo palwa kwa Shikulu. ³¹ Bakesa kulanda palwa bulungami bwenu; nkalanda nakubantu washilafyalwa ifyo acita.