¹ Yoshua alimine ulucelocelo, kabili balifumine mu shitimu. Balifikile ku Yordani, ena nabena Israeli bonse, kabili balipangile inkambi kulya ulo tabalabuka. ² Panuma ya nshiu shitatu, ba cilolo bapitile pakati ka nkambi; ³ balikambishe abantu ukwebati, "Ulo mukomona icipao cacipangano cakwa Yawe Lesa wenu, naba shimapepo ukufuma mu bena Lebi balicisendele, mufwile mwafuma pali cino cifulo nokucikonka. ⁴ Pafwile paba incende pakati kenu nacena iili kubati imikono amakana yabili mu mulingo. Tamulingile kupalama kuli cena, pakwebati mwamona inshila yakuyamo, apo tamwatala amupitamo muliyi nshila." ⁵ Yoshua alilandile ku bantu ukwebati, "ishisheni mwebene, pantu mailo Yawe akacita ifipesha mano pakati kenu." ⁶ Elo Yoshua alilandile kuli bashimapepo ukwebati, "Buleni icipao cacipangano, noutangilila abantu." Eco balibulile icipao ca cipangano nokutangilila abantu. ⁷ Yawe alilandile kuli Yoshua uwebati, "Muli buno bushiku nkokukusha mu menso yabena Israeli bonse. Bakeshiba ukwebati ifyo nali na Mose, efyo nkaba webo. ⁸ Ukakambisha bashimapepo abasenda icipao ca cipangano ukwebati, 'Ulo mukafika ku lutwe lwa menshi yamu Yordani, mwifwile mwaiminina umushika mumumana wa Yordani."' ⁹ Elo Yoshua alilandile kubena Israeli ukwebati, "Iseni kuno, nokukutika ku mashiwi yakwa Yawe Lesa wenu. ¹⁰ Napalici mukeshibokwebati Lesa wa mweo ali pakati kenu kaili akafumya ku cinso abena Canaani, abena Hiti, abena Hibi, abena Perisi, abena Girgshi, na bena Amore, na bena Yebusi. ¹¹ Moneni! Icipao ca cipangano cakwa shikulu we sonde lyonse cikoabuka cikomitangilila mu Yordani. ¹² Nomba saleni abantu ikumi limo nababili ukufuma mu mikowa yakwa Israeli, umo ukufuma muli cila mukowa. ¹³ Ulo inyantilo sha makasa yabashimapepo abasenda icipao cakwa Yawe, shikulu we sonde lyonse, yakakumya amenshi yamu Yordani, amenshi yamu Yordani yakoputulwako, na menshi ayakotentemuka ukufuma ku mulu wanika yakaleka ukutentemuka kabili yakeminina umupili umo." ¹⁴ Nomba ulo abantu baimine ukuya mukwabuka Yordani, bashimapepo abasendele icipao cacipangano baalitangilile abantu. ¹⁵ Lulya lwine fye balya abasendele cipao bafika ku Yordani, na makasa yabalya abasendele icipao yatumpa ku lutwe lwa menshi (Ulu ninshi Yordani alimukubundila mu ncena shauko monse pa nshita yaku sombola), ¹⁶ Amenshi ayalimukutenteuka ukufuma ku mulu wa nika yaliminine umupili umo. Amenshi yalilekele ukutentemuka ukufuma pa ntafu ikulu. Amenshi yalilekele ukutentemuka ukufuma ku Adamu, umusumba uuli lubali Saretaini, ukuya kufika nakuli bemba wa Araba, bemba wa muecele. Abantu baluabukile mupepi na Yeriko. ¹⁷ Bashi mapepo abasendele icipao ca cipangano cakwa Yawe baiminine pa mushili wa kuma pakati ka Yirdani mpaka abena Israeli bonse baabuka pa mushili uwakuma.