¹ Pe nga okoka mohehe umoi une ute tswa katsi e tempelo, pe ute bekela ba anzelu mbai-twele: Boke pe bo utake likolo li mbu bakeni mbai-twele i bwango bo Mongalima. ² O felo akakia pe aka utaka keni elahe likolo li mbu. Pe limbo libitsi pe li pasi lika tatesa baito bane bete yalaka la yelembo ye nama pe bane be kumesa yelima-lima ye ahe. ³ O baele aka utaka keni elahe katsi e libange li mokwa. Pe lika lenga ngelo, kune e ene ngelo i lokoo; pe yema ye umake ngia ye ka wa, ine ngia i te biaka katsi e libange li mokwa. ⁴ O basaso aka utaka keni elahe katsi e babange pe katsi e bakaka ba baye. Pe bika lenga ngelo. ⁵ Pe nga okoka anzelu o baye ano e beka: o bai semba, Oye ano eyali, ete yalaka; po ine obai tsanga, po ine oka kela yoo yesambi. ⁶ Po ine baka utaka ngelo i ba tsanga pe i ba profeta, pe okaesa boo ngelo po e bonoyi: be koki la yoo. ⁷ Pe nga okoka meza me losambo mene me beka: Koyo, Kolo Mongalima e eteli la lokulu, bisambi bi aho biyali liekela pe sembo. ⁸ O mekeleka aka utaka keni elahe likolo li mwasa. Ika mo aesanela bo ambaki baito la yohe, ⁹ pe baito baka hiakana la lumbe lo eteli pe baka sekakola lina li Mongalima ano ebai la bokumi likolo li bio menyoko, pe betsi lengesa motema po e bo mo lilesi likolo. ¹⁰ O hoomoi aka utaka keni elahe likolo li keka e bokumi li nama. Pe bokumi bo ahe boka likama la nzima pe baito baka ya mata lolame po e pasi, ¹¹ pe baka sekakola Mongalima u likolo, po e tsina e pasi yaibo pe bolimbo bwaibo pe betsi lengesa motema po e mesala me aibo. ¹² O mbale-emoi aka utaka keni elahe likolo li libange lifulaku, Efrate. Pe baye baye baka omela, po ine ndole i bakumi ine elwa muku u esti ekengelane. ¹³ Pe nga ena botswi katsi e monwa u fele e yohe pe katsi e monwa u nama, pe katsi e monwa u ba profeta ba isuma , melimo mesaso me bitsi, me ulani la lika. ¹⁴ Po ine me bai melimo me zabulu, mene me kela bikamwisi, mene meki ngia, bokumi bo mbu ngia, po e bosangesi boo po e tuma e mwasa u fulaku u Mongalima u eteli lokulu. ¹⁵ Ena, lelwa aine mito o bwiba, ayale la yenanga ano etsi engala, pe ano e kenga tulu iyahe, po ine atsi yele bolimbo pe ine batsi ene bolimbo bo ahe! ¹⁶ Baka sangesa boo isikani ine i etaki boo la monwa u hebreo "Harmaguedon". ¹⁷ O mbai-twele aka utaka keni elahe katsi e yefofo. Pe ika tswa katsi tempelo, katsi e keka e bokumi, mohehe upotsi une u beka: Ika kelama. ¹⁸ Pe ika tswa mebeli-beli, mehehe, kaki pe bonongi bo mbu bopotsi, ine itsi te yalaka ko felo tee ko ane ete yalaka mito likolo li mbu, loo kinda e bonongani. ¹⁹ Pe lohia lofulaku loka fakana la bilingi bisaso, pe hia i fulaku i meki ika lwa, pe Mongalima, aka enesa Babilone efulaku, po e bo aesi keni elahe e fino e bwango bo potsi. ²⁰ Pe bisanga ngia bika tsila, pe bitsikolo bitsi ukolani. ²¹ Pe limukeli li monele, line li menele me kekeli me lihi lopalata lomoi, loka kwa likolo li baito; pe baito be lefola Mongalima, po e tsina e menyoko mete yalaka mefulaku.