¹ La iyali ndambo e bo ondesi katsi e Kilisito, la iyali ndambo e bo okofesi pasi katsi e lokundo, la iyali ndambo e bosangesi bo yelimo, la iyali ndambo e bowaowa bo lokundo pe ndambo e bowaowa bo Mongalima, ² bo aesi yenanga ye basemba, boyali la kinda emoi e kamo, kinda emoi e lokundo, kinda emoi e yelimo, kinda emoi e bakanesi. ³ Botsi kele yema kwa yelimo ye bofakani too kwa boya lilesi likolo lilumbi tsina, kasi mina ine boya iseisi bo liteli onu basiaka aine bebai likolo lya ino matuke. ⁴ Mina ine omoi la omi waino, isikani ine a lite basiaka litomba liahe matuke, a lite pe line li basiaka. ⁵ Bo ike katsi e ino kamo ene ete yalaka katsi e Yezu Kilisito, ⁶ ano, boyalanesi la lolenge lo Mongalima, etsi te lita nama e bo olaki po boluholi po e bokokani la Mongalima, ⁷ kasi ete ya okofesa loteto yee matuke, la bosili lolenge lo mosalesi, la bolengi lolenge lomoi la baito; pe bo enenasami aine mito elumbi litomba, ⁸ ete ya iseisa yee matuke, boyaesi botosi tee kwa lokoo, fimi kwa lokoo lo kuruze. ⁹ Ibai po e mbi aituta Mongalima ete molilesa likolo la bosomi, ete mo aesa lina line libai likolo li lina ngia, ¹⁰ po ine la lina li Yezu liluwi ngia li limbane katsi e likolo, likolo li mbu pe seese e mbu, ¹¹ Pe ine lolame ngia lo yambole ine Yezu Kilisito ebai Kolo, la kembo e Mongalima Aha. ¹² Sokoyo, bakundami baha, kune ete tosa onu baose ngia, bokele po boumake bo aino, la bobangi pe la bongilimi, soko po kune e yali ngo, kasi bo eteli bofela aituta sikane kune etsi yali ngo; ¹³ po ine Mongalima ano e tusesa katsi e ino lokundo pe bokeli, la kinda e yenanga eyahe ye itani. ¹⁴ Bokele bio bima so bohimi, so bobangi, ¹⁵ po ine boyale so isemia pe petwa, banuku ba Mongalima betsi eni boo la lioyi libitsi katsi e yene yelenga ye bitsi mbeko pe ikolani, katsi e mbi ingenga onu aine yohe i likisa li mbaka katsi e mwano, ¹⁶ Botolake lioyi li boumake; le koki bo yalilesi likolo, la mwasa u Kilisito, nzi te yelaka soko pamba so bosali pamba. ¹⁷ pe fimi ko lekela bo ofani po bo aesi mbeka pe po e mosala u boinoli bwa ino, lebai la yenanga po e yoo, pe lebai la yenanga po e aino koatu. ¹⁸ Onu pe, bonangele pe lokola, pe bonangele la ngo. ¹⁹ Le kanesa katsi e Kolo Yezu botomeli onu aisanga Tsimote, po ine le aesani lokulu ngo matuke la bolembeli ine i tsina yaino. ²⁰ Po ine nzi bai la mito ane ano efakane ngo laye bakamo iya, po e bo yaesi katsi e motema bakita baino; ²¹ boo ngai ko solo, be paana litomba lya ibo matuke, pe ta line li Yezu Kilisito. ²² Bolembele ine ite aesanaka katsi e monyoko, la boyaesi la mesala me Mboli nzali la ngo, kune mona la ise. ²³ Le kanesa kahe botomeli uno yee langa ena mai ndole la yeyalesani yene ye bai ngo, ²⁴ pe lebai la bo inoli katsi e Kolo ine ngo matuke pe le oko kia soko sikane. ²⁵ Nga nangela la litomba li botomeli onu mongwaya Epaphrodite, mwinina owa u ndole e mesala pe o tuma, kwa ano ete tomele onu ngo bine bisalesi ngo katsi e bolongi. ²⁶ Po ine enangeli bo litsi onu ngia, pe ete biaka la bowaoawa bopotsi ane ete okoka onu botatsi bo ahe. ²⁷ Ete tataka, ko liekela, pe kelekele e lokoo, kasi Mongalima aka mo okela bowaowa, pe soko po e elahe matuke, kasi po ela pe, po ine inzi yale la bowaowa likolo li bowaowa. ²⁸ Nga motoma kahe bofilafili bo eteli, po ine onu bonangela po e bo mo eni, po aine ngo matuke inzi yale la bowaowa bofela. ²⁹ Bo mo fuke kahe katsi e Kolo la yenanga mobimba, pe bokumesi yoo kinda yi baito. ³⁰ Po ine ibai po e mesala me Kilisito nde ite biaka ye kelekele e lokoo, bo isi boumake bo ahe po e boliki bolumbi boyaeli bo aino katsi e mosala mone mo te engesela onu ngo.