¹ Mbuse e mayi ndambo e aose, Yesu akalenga eelo a Capalanaum. ane akokoba bo eyali a mbele, ² emoyi pe ofela ya aito, isikani felo e mobalia beyali, e hana bo. ³ Baito mekeleka bemotoeli mouneyi mekele. ⁴ Une etsikaki boo boukolani, po elindji, bakuhola likolo li mbele eelo eyali ye, mbuse bakisesa yelika yengali mouneyi mekele a ndole euwoli woo. ⁵ Yesu akena boinoli boiyo, akaeka a mouneyi mekele: mono owa, mbeko ibe makalimbisama. ⁶ Ba sonaki bisali bamoyi beteyalaka awo, bakabanda boekani boo la boo: ⁷ ndenge mbi ano mito eeka une? bakatangakola. Nda ekoki bolimbisi masumu, la etsiyali mongalima ye matuke? ⁸ Yesu, a luwele akalembela a molimo ine ikanisa boo katikati e ibo, aka ekela boo: po embi eyali onu a likanisi lo ndenge a metema me ino? ⁹ mbi itani boeki la mouneyi mekele: basumu iyao ika limbisama, too boeki: emala, sila yelika pe yela? ¹⁰ Aindji, mbuse bolembele ine mona o mito likololi mbu eyali a bokoki ba olimbisi basumu: ¹¹ Nga moekela, akaeka la mouneyi mekele, emala-oye, sila yelika yelaho pe kiaka a mbele elaho. ¹² pe kwamo,akemala, aka sila yelika yelae, pe aka tsua aiso baaito kwatu, aho boo kwatu bakakamwa pe bakakumesa Mongalima, baka beka: totseni ene ndenge. ¹³ Yesu aka tsua kwa lisiaka kelekele liange li mokwa, yefela belui alaye, nde e hana boo. ¹⁴ Aboeti, akena Lewi, mona o d'Alphée, eyali a bilo e libongo aka mwekela: oonge ngo, Lewi akemalapeaka moonga. ¹⁵ Bune Yesu eyalaki likolo li mesa a mbele e Lewi, ofela yee ba endesi ba mbulamatali, baito bane beti iani mbeko boo pe beyali isikani emoyi a mesa alaye la bayekoli baye; bune eyalaki boo ofela, nde baka moonga. ¹⁶ Basonaki ba bi sali la ba Falisaya, baka hena belaa boo la baendesi ba mbulamatali pe la bane betsi itani mbeko, baka beka la bayekoli: po embi ela onu pe bonua onu la baendesi la mbulamatali la bane betsi itani mbeko? ¹⁷ Ane akokoka Yesu, aka bekela boo: itsi yali bane beitani nde beko paana monganga, kasi bane betati. Ndji lui boetaki baitani, kasi ba mbeko mbe. ¹⁸ Bayekoli ba Yoane la ba Falisaya beano kela. Baka bekela Yesu po embi bayekoli ba Yoane pe bane ba Falisaya bekela, bongo bayekola ba aho betsikela? ¹⁹ Yesu akenesa boo: muinina o molome ekoki ekela nga molome eyali aho? zoka nde bune eyali boo la molome sikene, betsikela. ²⁰ Mwasa woko lwa ane e okokoa molome, nde boo bekokila baose bamoli. ²¹ Mito eti sona tulu esika la ene ekawa, emoyi ndenge yelingi ye tulu ye fai-fai ekoki bwa haki elingi ye moyi ye kalakala, pe bo ahakani bookoyala makasi. ²² Mito etsi koki bosili banaa ba fai-fai a bituka bi felo; po ine, banaa bekoki bo ahaki bituka, banaape bituka bi o kounga; kasi isa banaa ba fai-fai a yetuka ye fai-fai. ²³ i kakwa mwasa umoyi u sabato,Yesu aka tenesa yehua ye loso. Bayekoli, a boyeli boibo baka banda bo tusesi biingi. ²⁴ Ba Falisaya baka mo bekela: lita, po embi ekela boo ine e fetani tango e sabato? ²⁵ Yesu aka inesela boo: botsi tangi ine ete kela Dawidi, ane ete yalaka boo a boongi pe semba,yee la baane e yalaki boo a laye: ²⁶ ndenge mbi ete olaka ye a mbele e Mongalima, tango e kumu e mosali mo Mongalima Abiathar, nde baka laa tofoe tone to lingomba, sanga ba kumu bu mosala bo Mongalima beyali a ndingisa bi olei, beisaki pe baane be yalaki boo a ibo. ²⁷ Mbuse, aka ekela boo: sabato ekelami po e mito, pe mito taa po e sabato. ²⁸ imoli mona o mito eyali likolo ata li sabato.